Manav Sardana DLF Penthouse Deal; मानव सरदाना कोण? बड्या सोसायटीत 271 कोटींना पेंटहाऊस घेतलं विकत, देशातील महागड्या डीलची दिल्लीपासून गल्लीपर्यंत चर्चा

भारताच्या स्थावर मालमत्ता बाजारात श्रीमंत आणि सर्वसामान्य खरेदीदारांमधील दरी सातत्याने रुंदावत असल्याचे दिसत आहे. एकीकडे अधिकाधिक लोक परवडणाऱ्या घरांच्या शोधात आहेत तर, दुसरीकडे देशातील अतिश्रीमंत लोक कोट्यवधी रुपयांची आलिशान घरे खरेदी करत आहेत. 2025 पासून अति-आलिशान मालमत्तांच्या खरेदीत मोठी वाढ दिसून आली.

यादरम्यान, भारतातील आघाडीची रिअल इस्टेट कंपनी DLF लिमिटेडने गुरुग्राममधील एका सुपर-लक्झरी प्रकल्पातील पेंटहाऊस विक्रमी 271 कोटींना विकले आणि प्रति चौरस फूट दराच्या आधारावर देशातील सर्वात महागड्या रिअल इस्टेट सौद्यांपैकी बनला. गुरुग्राममधील डीएलएफ फेज 5 ‘द डाहलियाज’ येथे पेंटहाऊस स्थित असून या प्रकल्पांतर्गत 420 सुपर-लक्झरी अपार्टमेंट्स आणि पेंटहाऊस विकसित केले जात आहेत.

प्रसिद्ध उद्योजक मानव सरदाना यांनी डीएलएफ प्रकल्पात आतापर्यंतचा सर्वात महागडा पेंटहाऊस खरेदी केला असून सरदाना इम्पीरियल ऑटो या आघाडीच्या ऑटो कंपोनंट कंपनीशी संबंधित आहेत.या पेंटहाऊसचे सुपर एरिया 17,200 चौरस फूट असून सुपर एरियानुसार दर प्रति चौरस फूट 1.58 लाख रुपये आणि कार्पेट एरिया 10,500 चौरस फूट असून कार्पेट एरियानुसार या मालमत्तेची किंमत अंदाजे प्रति चौरस फूट 2.6 लाख रुपये आहे. पण, डीएलएफने अद्याप या व्यवहारावर भाष्य केलेले नाही.

द डाहलिया प्रकल्पातील सर्वसाधारण अपार्टमेंटची किंमत 100 कोटींपासून ते 170 कोटी रुपये दरम्यान तर, पेंटहाऊसची किंमत त्याहूनही जास्त आहे. त्याचवेळी, डीएलएफला या एकाच प्रकल्पातून 40000 कोटी रुपयांपेक्षा जास्त महसूल मिळणे अपेक्षित असून प्रकल्प सुरू झाल्यापासून यातील 65% हून अधिक युनिट्सची विक्री झाली आहे.

विशेष म्हणजे देशातील रिअल इस्टेट क्षेत्रात गुरुग्रामचा झपाट्याने विकास होत असला तरी, देशातील सर्वात महागड्या घरांच्या बाबतीत मुंबई अजूनही आघाडीवर आहे. ANAROCK आणि 360 ONE Wealth च्या आकडेवारीनुसार, वरळीमध्ये गेल्या 24 महिन्यांत 40 कोटींपेक्षा जास्त किमतीची 30 हून अधिक घरे विकली गेली, ज्यांची एकूण उलाढाल 5500 कोटींपेक्षा जास्त होती. मागील वर्षी, 2025 मध्ये USV च्या अध्यक्षा लीना गांधी तिवारी यांनी वरळीतील नमन झाना येथे अंदाजे 639 कोटी रुपयांना दोन डुप्लेक्स खरेदी केलेले, तर तान्या दुबाश यांनीही याच प्रकल्पात अंदाजे 226 कोटींना डुप्लेक्स खरेदी केला.

इम्पीरियल ऑटो ग्रुपशी संबंधित मानव सरदाना यांचे वडील एस. बी. सरदाना यांनी जगजित सिंग यांच्यासोबत 1969 मध्ये फरिदाबाद येथे इम्पीरियल ऑटो इंडस्ट्रीजचा पाया घातलेला. ही कंपनी ऑटोमोटिव्ह आणि ऑफ-हायवे क्षेत्रांसाठी फ्लुइड ट्रान्समिशन उत्पादनांचे उत्पादन करते. नंतर जागतिक खासगी इक्विटी फर्म वॉरबर्ग पिन्कसने या समूहाचे अधिग्रहण केले. मानव सरदाना यांनी इम्पीरियल सिलिकॉन, क्रुझ हायड्रॉलिक्स आणि इम्पीरियल मार्टोर इंजिन ट्यूब्स यांसह डझनभर कंपन्यांमध्ये संचालक म्हणून काम केले.