नागपूरच्या ‘लोक भवन’ जैवविविधता उद्यानात शालेय विद्यार्थ्यांसाठी वर्षभर चालणाऱ्या पर्यावरण शिक्षण कार्यक्रमाचा प्रारंभ झाला आहे. या उपक्रमामुळे विद्यार्थ्यांना निसर्गाचा प्रत्यक्ष अनुभव घेण्याची संधी मिळणार आहे. नागपूर शहराच्या मध्यभागी असलेल्या सेमिनरी हिल्सच्या 49 हेक्टर वनक्षेत्रात हे उद्यान पसरलेले आहे. पूर्वी ते राजभवन जैवविविधता उद्यान म्हणून ओळखले जात असे. हे उद्यान स्थानिक वृक्ष, औषधी वनस्पती, फुलपाखरे, पक्षी आणि सरपटणाऱ्या प्राण्यांनी समृद्ध आहे.
सृष्टी कन्झर्व्हेशन फाउंडेशनच्या वतीने हा उपक्रम राबवला जात आहे. या कार्यक्रमांतर्गत पाचवी ते बारावीच्या विद्यार्थ्यांना शिक्षकांच्या देखरेखीखाली निसर्गाचा अभ्यास करता येणार आहे.
निसर्गभ्रमण, जैवविविधतेचे निरीक्षण आणि संवादात्मक उपक्रमांच्या माध्यमातून विद्यार्थ्यांमध्ये पर्यावरणाबद्दल जागरूकता निर्माण करणे आणि त्यांच्या निरीक्षण क्षमता विकसित करणे हा या कार्यक्रमाचा मुख्य उद्देश आहे.
राज्यपाल कार्यालयाचे अतिरिक्त नियंत्रक रमेश येवले यांनी नागपूर जिल्ह्यातील सर्व शाळांना या उपक्रमात सक्रिय सहभाग नोंदवण्याचे आवाहन केले आहे. नोंदणीसाठी शाळांनी कार्यक्रम समन्वयक संजय करकरे (मो. ९५५२५९५९६२) यांच्याशी संपर्क साधावा.
Source link
