Gadchiroli Paddy Scam: ‘धान खरेदी व साठवण प्रक्रियेमध्ये कोणत्याही प्रकारचा अपहार किंवा अनियमितता सहन केली जाणार नाही. दोषींवर कडक कारवाई करण्यात येईल,’असा इशारा जिल्हा प्रशासनाने दिला आहे.
गडचिरोली जिल्ह्यात आदिवासी विकास महामंडळाच्या कुरखेडा उपप्रादेशिक कार्यालयांतर्गत येणाऱ्या देऊळगावच्या धान खरेदी केंद्रावर दीड कोटी रुपयांचा घोटाळा झाल्याचे उघड झाले आहे. यासंदर्भात संबंधितांवर गुन्हे दाखल करण्याचे आदेश जिल्हाधिकारी यांनी दिले आहेत.
गडचिरोली जिल्ह्यात धानाचे उत्पादन घेतले जाते. या धानाची आदिवासी विकास महामंडळाकडून स्थानिक सोसायटीमार्फत खरेदी केली जाते. शेतकऱ्यांकडून खरेदी केलेले हे धान मिलिंगसाठी पाठविले जाते. या संपूर्ण प्रक्रियेदरम्यान खरेदी केंद्रावर गैरव्यवहार होतो. यातूनच २०२३-२४च्या हंगामात खरेदी करण्यात आलेल्या धान आणि बारदानासंदर्भात झालेल्या तपासणीत १९ हजार ८६० क्विंटल धान आणि ४९ हजार ७५१ बारदाण्यात तफावत आढळली. यात प्रामुख्याने ३ हजार ९४४ क्विंटल धान आणि १४ हजार १४८ बारदाना कमी आढळला. इतकेच नव्हे तर भरडाईसाठी पाठविण्यात आलेल्या धानात ४० ऐवजी ३० किलो धान भरण्यात आल्याचे दिसून आले आहे. या माध्यमातून १ कोटी ५३ लाखांचा गैरव्यवहार झाल्याचे स्पष्ट झाले आहे. याप्रकरणी जिल्हाधिकारी अविश्यांत पांडा यांनी आदिवासी विकास महामंडळाच्या प्रादेशिक व्यवस्थापकांना संबंधितांवर गुन्हे दाखल करण्याचे निर्देश दिले आहेत.
कुठे काय घडतेय?
अहेरी येथील शासकीय धान्य गोदामातील अपहारप्रकरणी गोदाम व्यवस्थापक व रक्षकाला निलंबित करण्यात आले आहे. या प्रकरणात २२ लाख ४२ हजार रुपयांची वसुली सुरू आहे. या प्रकरणी सहा अधिकाऱ्यांवर विभागीय चौकशी सुरू आहे.
सिरोंचा येथील २०११मधील धान्य अपहारप्रकरणी २४.८ लाखांच्या वसुलीचे आदेश देण्यात आले आहेत. या प्रकरणी दहा अधिकाऱ्यांविरुद्ध चौकशी प्रस्तावित आहे.
२०११मधील धान घोटाळ्यात २.६७ कोटींच्या दंडापैकी १.३५ कोटी रुपये वसूल करण्यात आले आहेत. उर्वरित ७२ लाख रुपयांची वसुली न करणाऱ्या १३ राईस मिलर्सच्या मालमत्तांवर जप्तीची कारवाई सुरू आहे.
साठ्याची शंभर टक्के तपासणी होणार
गडचिरोली जिल्ह्यातील सर्वच तालुक्यांतील धानाच्या साठ्याची शंभर टक्के तपासणी करण्याचे आदेशही देण्यात आले आहेत. ‘पॅडी होर्डिंग को-ऑर्डिनेशन’ कमिटीच्या बैठकीत नियमभंग करणाऱ्या राईस मिलर्सवर कारवाई प्रस्तावित करण्यात आली आहे. ‘धान खरेदी व साठवण प्रक्रियेमध्ये कोणत्याही प्रकारचा अपहार किंवा अनियमितता सहन केली जाणार नाही. दोषींवर कडक कारवाई करण्यात येईल, ‘असा इशारा जिल्हा प्रशासनाने दिला आहे.
लेखकाबद्दलकिशोरी तेलकर किशोरी तेलकर
किशोरी तेलकर महाराष्ट्र टाइम्स ऑनलाइनमध्ये कन्सल्टंट या पदावर कार्यरत आहेत. किशोरी या २०२२पासून मटा ऑनलाइन सोबत जोडलेल्या आहेत. राजकारण, हायपर लोकल स्टोरी, क्राईम बातम्या, महिलांविषयक समस्या, गाव खेड्यातल्या बातम्या करण्याचा त्यांचा अनुभव आहे.
पत्रकारितेतील अनुभव
किशोरी यांना वृत्तपत्र, टीव्ही आणि डिजिटल माध्यमांमधील ६ वर्षांचा अनुभव आहे. किशोरी यांनी सकाळ वृत्तपत्रातून पत्रकारितेला सुरुवात केली. सकाळ वृत्तपत्रात काम करतांना त्यांनी प्रिंट मीडियासोबतच सोशल मीडिया हॅंडलिंग, वेबसाईटचेही काम केलं आहे. सध्या चार वर्षांपासून त्या महाराष्ट्र टाइम्स ऑनलाईनमध्ये कार्यरत आहेत. लेखन कौशल्याच्या जोरावर सामाजिक समस्या, शाळा- कॉलेज विद्यार्थी समस्या, आरोग्य टिप्स, महिलांविषयक प्रश्न, फॅशन, लाइफस्टाइल या विविध विषयांवर त्यांनी बातम्या केल्या आहेत.
शैक्षणिक पात्रता
किशोरी तेलकर यांनी कै. बिंदू रामराव देशमुख कला व वाणिज्य महिला महाविद्यालय, नाशिकरोड येथून एम.कॉम पदवी संपादन केली. त्यानंतर गोखले एज्युकेशन सोसायटीचे एच.पी.टी आर्ट्स अँड आर.वाय.के सायन्स कॉलेजमधून कम्युनिकेशन अँड जर्नलिझम विषयात पदव्युत्तर शिक्षण घेतलं आहे. जर्नलिझमचे शिक्षण घेत असतानाच किशोरी यांनी देशदूत, दिव्यमराठी सारख्या वृत्तपत्रात इंटर्नशिप केलेली आहे. मराठी भाषेवर प्रभुत्व असून हिंदी, इंग्रजी भाषाही त्यांना अवगत आहेत.… आणखी वाचा