Tukaram Mundhe led FDA cancels Parsi Dairy Farm License after fungus found on walls in raid Crime News; भिंतीवर बुरशी, डासांचा प्रादुर्भाव; प्रसिद्ध पारसी डेअरीवर FDA चे छापे, गंभीर त्रुटींमुळे परवाना निलंबित

गंभीर आक्षेपार्ह गोष्टी आढळल्या

पारसी डेअरी फार्ममध्ये अन्नसुरक्षा आणि मानके अधिनियम २००६ तसेच अन्न व्यवसाय परवाना व नोंदणी नियम २०११ मधील विविध तरतुदींचे गंभीर उल्लंघन केल्याचे यावेळी निदर्शनास आले आहे. या त्रुटींमुळे अन्नपदार्थ दूषित होण्याची तसेच ग्राहकांच्या आरोग्यास गंभीर धोका निर्माण होण्याची शक्यता असल्याचे प्रशासनाने नमूद केले आहे. डेअरीला अन्नपदार्थांची साठवणूक तसेच वितरण करण्यास मनाई करण्यात आली.

कोणकोणत्या त्रुटी सापडल्या

कच्च्या दुधासाठी साठवण कक्ष, उत्पादन विभागातील भिंतीवर बुरशीची वाढ, कच्चा माल थेट जमिनीवर साठवणे, बुरशीग्रस्त भिंतीलगत कच्चा माल ठेवणे, उत्पादन विभागात अस्वच्छता, डासांचा मोठ्या प्रमाणात प्रादुर्भाव, कीटक, उंदिर प्रतिबंधक जाळ्यांचा अभाव, सांडपाणी प्रक्रिया यंत्रणेतील त्रुटी, अन्न हाताळणाऱ्या कर्मचाऱ्यांच्या वैद्यकीय नोंदी अपूर्ण असणे, वाहन स्वच्छतेच्या नोंदी नसणे, अन्नपदार्थांवर मुदतबाह्य, साठवणूक अशी कोणतीही माहिती नसणे या गंभीर आक्षेपांचा समावेश आहे.

राज्यभर मोहीम

अन्न व औषध प्रशासनाने १४ ते १६ जुलैदरम्यान राज्यभर विशेष तपासणी मोहीम राबवत दूध, दुग्धजन्य पदार्थ, गुटखा, पानमसाला तसेच इतर अन्नपदार्थांवर मोठी कारवाई केली. या मोहिमेत २४ धाडी टाकून एकूण १ कोटी ९० लाख ७५ हजार ८४५ रुपयांचा मुद्देमाल जप्त करण्यात आला. तसेच ११ एफआयआर, १६ जणांना अटक, ५७ हॉटेल्स व रेस्टॉरंटची तपासणी आणि २७ आस्थापनांना सुधारणा नोटिसा बजावण्यात आल्या. गोरेगावमध्ये दुधाच्या पिशव्यांमध्ये छेडछाड करून विक्री करणाऱ्यांविरोधात कारवाई करून दोन जणांना अटक करण्यात आली, तर गोवंडीत १,६८३ लिटर म्हशीचे पाश्चराइज्ड दूध नष्ट करण्यात आले. पालघर, वसई, सांगली, पुणे, नाशिक, वाशी, अमरावती या ठिकाणीही विविध कारवाया करण्यात आल्या आहेत.