Nagpur News : नागपूर मनपाचा ६,२०० कोटींचा अर्थसंकल्प सादर, पायाभूत सुविधा, डिजिटल सेवा आणि महिला सक्षमीकरणावर भर
नागपूर महानगरपालिकेच्या २०२६-२७ या आर्थिक वर्षासाठी स्थायी समितीच्या सभापती शिवानी दानी वाखरे यांनी शनिवारी सुरेश भट सभागृहात ६ हजार २०० कोटी रुपयांचा अर्थसंकल्प सादर केला. महापौर नीता ठाकरे, उपमहापौर लीलाताई हत्तीबेड, स्थायी समितीचे सदस्य तसेच विविध पक्षांचे नगरसेवक यावेळी उपस्थित होते. शहराचा सर्वांगीण विकास, पायाभूत सुविधांचा विस्तार, डिजिटल सेवा, महिला सक्षमीकरण, पर्यावरण संवर्धन आणि रोजगार निर्मिती या प्रमुख बाबींना अर्थसंकल्पात प्राधान्य देण्यात आले आहे. येत्या २९ जून रोजी या अर्थसंकल्पावर सविस्तर चर्चा होणार असून त्यानंतर आवश्यक सुधारणा करून अंतिम मंजुरी दिली जाणार आहे.
