Murder Mystery And Tatoo : आजच्या क्राइम डायरी या खास मालिकेत अशा घटना बघणार आहोत, ज्या वाचून तुम्ही थक्क व्हाल. या घटनांमध्ये खून झाला, पण खुनी इतका हुशार होता की त्याने कुठलाही पुरावा सोडला नाही. जिथे कोणतेही साक्षीदार नव्हते, परंतु असे असूनही मारेकरी आज तुरुगांत आहे. या सगळ्या प्रकरणांमध्ये एक पुरावा असा आहे, ज्याने सगळी मर्डर मिस्ट्री उघड झाली. वाचूयात हा खास रिपोर्ट…
१) टॅटूमुळे ७ वर्षांनंतर खुनाचं प्रकरण उलगडलं…
महाराष्ट्रातील पालघरमध्ये ७ वर्षांपूर्वी एक खून झाला होता. खून केल्यानंतर मारेकऱ्याने मृतदेह गोणीत भरला आणि पळ काढला. घटना समोर आल्यानंतर पोलिसांचा शोध सुरू झाला. पण कोणताही पुरावा हाती लागला नाही. या हत्या प्रकरणाला ७ वर्षे झाली होती. जुन्या प्रकरणांची पुन्हा छाननी करताना हे प्रकरणही समोर आले. पोलिसांना खुन्याचा अस्पष्ट फोटो सापडला. या फोटोमध्ये मारेकऱ्याच्या हातावर एक टॅटू काढला होता. पोलिसांनी लिंक जोडून शोध सुरू केला आणि नंतर या टॅटूमुळे उत्तर प्रदेशातून खुनी पकडला गेला.
या खुन्याच्या हातावर दोन टॅटू होते. एका टॅटूमध्ये त्याचे नाव लिहिले होते तर दुसऱ्या टॅटूमध्ये तीन स्टार होते. एका वेगळ्या ओळखीखाली जगत असल्यामुळे त्याने आपल्या नावाचा टॅटू काढला होता, पण नाव नसलेला टॅटूही आपल्याला तुरुंगात टाकू शकतो, हे कदाचित त्याच्या लक्षात आलं नसावं.
२) टॅटू असलेल्या मुलीचा मारेकरी नोएडामध्ये सापडला…
काही महिन्यांपूर्वी नोएडामध्येही तलावात एका महिलेचा मृतदेह सापडला होता. मृतदेह पाण्यात असल्याने चेहरा पूर्णपणे विद्रूप झाला होता. प्रकरण उघड झाल्यानंतर प्रश्न होता की हा मृतदेह कोणाचा? अशात मुलीच्या मानेवर टॅटू होता. या टॅटूच्या मदतीने नोएडा पोलिसांनी साहिबा नावाच्या मुलीच्या हत्येचे गूढ उकलले. खरंतर, साहिबा नोएडामध्ये जितेंद्र भाटी नावाच्या व्यक्तीसोबत लिव्ह-इन रिलेशनशिपमध्ये राहत होती. साहिबा जितेंद्रवर लग्नासाठी दबाव टाकत होती आणि त्यामुळे आरोपीने तिला दारू पाजून तिची हत्या केली. हत्येनंतर मृतदेह ताब्यात घेऊन तलावात फेकण्यात आला. मुलीच्या अंगावर टॅटू नसता तर खुन्याचा शोध घेणे फार कठीण झाले असते.
३) ‘के’ नावाच्या टॅटूने उलगडलं हत्येचं गूढ…
के नावाच्या टॅटूमुळे छत्तीसगडमध्ये मुलीच्या हत्येचे गूढ उकलले. मुलीची हत्या केल्यानंतर तिला तलावाजवळ पुरण्यात आले. गावातील एका व्यक्तीने मुलीचा मृतदेह पाहिल्यानंतर त्याने पोलिसांना माहिती दिली. पोलिसांनी मृतदेह बाहेर काढला मात्र मुलीची ओळख पटू शकली नाही. तिच्या हातावर ‘के’ चा टॅटू असल्याचे तपासात निष्पन्न झाले. या टॅटूमुळे पोलीस खुन्यापर्यंत पोहोचले. खून करणारा हा तरुणीचा प्रियकर होता. दोघेही बऱ्याच दिवसांपासून रिलेशनशिपमध्ये होते. मात्र, काही दिवसांपूर्वी मुलाने मुलीला दुसऱ्यासोबत पाहिले आणि त्यामुळे तिची हत्या केली. खून केल्यानंतर मृतदेह जवळच्या तलावाच्या कडेला पुरण्यात आला होता.
लेखकाबद्दलरेणुका धायबररेणुका धायबर, महाराष्ट्र टाइम्समध्ये Senior Digital Content Producer आहेत. डिजिटल पत्रकारितेचा आठ वर्षांचा अनुभव आहे. २०१४ पासून पत्रकारीतेत आहेत. झी २४ तास , न्यूज १८ लोकमत, टीव्ही ९ अशा वेबसाइटसाठी त्यांनी काम केले आहे. महाराष्ट्र, राजकारण, गुन्हेगारी, देश, विदेश, स्पेशल बातम्या यासोबत व्यवसाय विषयात त्यांची आवड आहे.… आणखी वाचा
