Shirpur Gun Violence: धुळे जिल्ह्यातील शिरपूर तालुक्यात दहिवद येथे मुंबई-आग्रा महामार्गावरील सदाशिव पेट्रोलियम पंपावर पहाटे दरोडा पडला. पिस्तुलधारी चार दरोडेखोरांनी कर्मचाऱ्यांना मारहाण करून २२ हजार रुपयांची रोकड लुटली.
मनोज जरांगेंवर बोचरी टीका, छगन भुजबळांनी सगळंच काढलं…काय म्हणाले?
नेमकं काय घडलं?
मिळालेल्या माहितीनुसार, आज (6 ऑक्टोबर) पहाटेच्या सुमारास चार संशयित एकाच दुचाकीवर स्वार होऊन पेट्रोलियम पंपावर पोहोचले. त्यापैकी दोघांच्या हातात पिस्तुली होत्या. त्यांनी पंपावर ड्युटीवर असलेले कर्मचारी, सोमनाथ गवळी, सुनील नगराळे आणि संतोष नगराळे यांना पिस्तुलीचा धाक दाखवत रोकड मागितली. सुरुवातीला कर्मचाऱ्यांनी प्रतिकार करण्याचा प्रयत्न केला, मात्र आरोपींनी त्यांना मारहाण करायला सुरू केली.
रोकड बॅगेत भरून आरोपी फरार
यानंतर दरोडेखोरांनी कर्मचाऱ्यांना कॅश काउंटरमधील सर्व पैसे एका बॅगेत भरण्यास सांगितले. ती बॅग हिसकावून घेत आरोपी दुचाकीवरून मुंबई-आग्रा महामार्गावरून वेगाने पसार झाले. घटनेनंतर घाबरलेल्या कर्मचाऱ्यांनी तत्काळ ही माहिती पेट्रोल पंपाचे संचालक तरुण शर्मा यांना दिली. त्यांनीही तातडीने शिरपूर पोलिसांना कळवले.
माहिती मिळताच पोलिस निरीक्षक जयपाल हिरे यांच्या पथकाने घटनास्थळी धाव घेत पंचनामा केला. सीसीटीव्ही कॅमेऱ्यात संपूर्ण घटना स्पष्टपणे कैद झाली असून आरोपींची ओळख पटवण्यासाठी पोलिसांनी फुटेज तपासण्यास सुरुवात केली आहे.
नियोजनपूर्वक दरोडा?
दरोडेखोरांनी चेहऱ्यावर कापड गुंडाळलेले असल्याने त्यांची ओळख पटवणे कठीण झाले आहे. घटनेच्या वेळी पेट्रोल पंपाच्या शेजारील हॉटेल बंद होते आणि तिथला सुरक्षा रक्षक रजेवर होता, त्यामुळे ही चोरी अगोदरच नियोजनबद्धपणे आखण्यात आल्याची शक्यता पोलिसांनी वर्तवली आहे.
मनोज जरांगेंवर बोचरी टीका, छगन भुजबळांनी सगळंच काढलं…काय म्हणाले?
दरम्यान, शिरपूर तालुका पोलिसांनी या घटनेचा तपास गतीने सुरू केल्याचे सांगितले असून, “सीसीटीव्ही फुटेज आणि तांत्रिक पुराव्यांच्या आधारे आरोपी लवकरच गजाआड होतील,” असा विश्वास पोलिस निरीक्षक जयपाल हिरे यांनी व्यक्त केला आहे.
लेखकाबद्दलअजय गर्दे महाराष्ट्र टाइम्स ऑनलाईनमध्ये धुळे जिल्ह्यात फ्रिलान्सर प्रतिनिधी म्हणून कार्यरत. 8 वर्षांपूर्वी वृत्तवाहिनीतून पत्रकारितेची सुरुवात. आवाज Tv चॅनल, सोबत मटा ऑनलाईनपर्यंत वाटचाल… आणखी वाचा
