Dhule 11 Year Old Kid Died After Falling From Third Floor While Flying Kite;आईजवळ बसून जेवला, मी शाळेत जातो सांगून निघाला, पण… धुळ्यात तिसऱ्या मजल्यावरुन पडून चिमुकल्याचा मृत्यू

कापडणे येथील आदर्श माध्यमिक विद्यालयात इयत्ता सहावी वर्गात शिक्षण घेणारा रक्षित प्रभाकर पाटील (11) हा सोमवार रोजी नेहमीप्रमाणे सकाळी दहा वाजेला शाळेत जाण्यासाठी निघाला. यावेळी रस्त्याने जाताना रक्षितला आपले काही मित्र पतंग उडवत असल्याचं दिसलं यावेळी रक्षितही एका तीन मजली इमारतीवर आपल्या मित्रांकडे पोहचला आणि पतंग उडवू लागला. याचवेळी धाब्यावरील स्लॅबचा मध्यभागी असलेल्या डगमध्ये अनावधानाने तोल गेला यात खाली पडून या मुलाचा जागीच मृत्यू झाला.

तीन मजली इमारतीचे बांधकाम सुरू होते. पण, सोमवारी कामावर मजूर आले नव्हते म्हणून नजर चुकवत काही मुलं धाब्यावर चढून पतंग उडवत होते. आपले मित्र पतंग उडवत असल्याच्या मोहात रक्षितही धाब्यावर गेला आणि दुर्दैवाने पडून त्याचा मृत्यू झाला.
Death By Chicken: रविवारची सुट्टी अन् नॉनवेजचा बेत, पण त्यानेच घेतला जीव; चिकनमुळे कुटुंबाचा आधार गेला, लेकींचा आक्रोश पाहवेना

आई-वडिलांना बसला मोठा धक्का

रक्षित शाळेत जाण्यासाठी नेहमीप्रमाणे घटना घडण्याच्या काही काळाआधी आपल्या आईजवळ बसून जेवला आणि आई मी शाळेत जातो असे सांगून रक्षित शाळेत जाण्यासाठी निघाला. मात्र, रक्षितला वाटेतच मृत्यूने गाठले. यामुळे आई-वडिलांना व कुटूंबाला मोठा मानसिक धक्का बसला आहे.

मजूर आले असते तर वाचला असता रक्षित

ज्या इमारतीवरून रक्षितचा पडून मृत्यू झाला. त्या इमारतीमध्ये सध्या प्लंबिंगचे काम सुरू होते. मात्र, दररोज कामावर येणारे मजूर दुर्दैवाने सोमवारी कामावर आले नव्हते, मजूर कामावर आले असते तर कदाचित रक्षितचा मृत्यू झाला नसता, अशा भावना ग्रामस्थांनी व्यक्त केल्या आहेत.

साडे तीन महिन्यांपूर्वी झालेला वाढदिवस ठरला अखेरचा

रक्षित पाटील या चिमुकल्याचा 26 सप्टेंबर रोजी वाढदिवस होता. साडे तीन महिन्यांपूर्वी साजरा झालेला वाढदिवस दुर्दैवाने रक्षितचा शेवटचा वाढदिवस ठरला. रक्षितच्या पश्चात आई, वडील, एक भाऊ, आजोबा असा परिवार आहे.