मॉस्को : अमेरिका आणि रशियामधील तणावाच्या पार्श्वभूमीवर एका अमेरिकन लष्करी विमानाने रशियातील व्ह्नुकोव्हो विमानतळावर लँडिंग केल्याने आंतरराष्ट्रीय पातळीवर चर्चांना उधाण आले आहे. या विमानाच्या रशियातील आगमनामागील नेमके कारण अद्याप स्पष्ट झालेले नसल्याने विविध तर्क-वितर्कांना सुरुवात झाली आहे.
फ्लाइट ट्रॅकिंगशी संबंधित माहितीनुसार, हे विमान बोईंग C-17 ग्लोबमास्टर III असण्याची शक्यता व्यक्त करण्यात आली आहे. C-17 हे अमेरिकन हवाई दलाकडून प्रामुख्याने लांब पल्ल्याच्या वाहतुकीसाठी वापरले जाणारे लष्करी मालवाहू विमान आहे.
या विमानाचा वापर लष्करी जवान, उपकरणे, साहित्य आणि विविध प्रकारच्या मालवाहतुकीसाठी केला जातो. त्यामुळे अशा प्रकारच्या विमानाने रशियात अचानक लँडिंग केल्याने त्यामागील कारणाबाबत उत्सुकता निर्माण झाली आहे.
विशेष म्हणजे, युक्रेन युद्धाच्या पार्श्वभूमीवर अमेरिका आणि रशियामधील संबंध तणावपूर्ण असताना ही घटना घडली आहे. त्यामुळे विमानाचे आगमन नेमक्या कोणत्या कारणासाठी झाले, याबाबत सोशल मीडिया आणि विविध माध्यमांमध्ये अनेक शक्यता व्यक्त केल्या जात आहेत.
मात्र, विमान रशियात का उतरले, त्यामध्ये कोण होते किंवा कोणत्या प्रकारची सामग्री होती, याबाबत अधिकृत स्तरावर स्पष्ट माहिती समोर आलेली नाही. त्यामुळे सध्या या लँडिंगबाबत सुरू असलेल्या चर्चांना अधिकृत पुष्टी मिळालेली नाही.
