मुंबईतील प्रभादेवी येथील श्री सिद्धिविनायक गणपती मंदिरातील दानपेटीतील कथित आर्थिक गैरव्यवहाराच्या आरोपांमुळे राज्यात मोठी खळबळ उडाली आहे. अयोध्येतील राम मंदिरातील कथित देणगी अपहाराच्या चर्चेदरम्यान मनसे अध्यक्ष राज ठाकरे यांनी सिद्धिविनायक मंदिरातही दरवर्षी १८ कोटी रुपयांची चोरी होत असल्याचा दावा केल्याने हा विषय अधिकच चर्चेत आला. मात्र, या दाव्यानंतर सिद्धिविनायक गणपती मंदिर न्यासाचे अध्यक्ष तथा आमदार सदा सरवणकर यांनी हा दावा फेटाळत स्पष्टीकरण दिले असून, गैरसमज निर्माण झाल्याचे म्हटले आहे. या संपूर्ण प्रकरणाची सुरुवात सिद्धिविनायक मंदिराच्या काही विश्वस्तांनी उपमुख्यमंत्री एकनाथ शिंदे यांना लिहिलेल्या पत्रापासून झाली. या पत्रात मंदिरातील दानपेटीतील आर्थिक व्यवहारांबाबत गंभीर शंका उपस्थित करण्यात आली आहे. पत्रानुसार, मंदिरातील काही कर्मचारी दानपेटीतील पैशांची अफरातफर करत असल्याचा संशय व्यक्त करण्यात आला असून, अशा नऊ कर्मचाऱ्यांना पकडण्यात आल्याचा उल्लेख आहे. तसेच या प्रकरणाची वरिष्ठ पातळीवर सखोल चौकशी करण्याची मागणीही करण्यात आली आहे. दान रकमेतील वाढीवरून संशय सिद्धिविनायक मंदिर विश्वस्तांनी पत्रात नमूद केलेल्या आकडेवारीनुसार, संबंधित कर्मचारी पकडण्यापूर्वी प्रत्येक बुधवारी दानपेटीतून साधारण ५० लाख रुपयांपर्यंत रक्कम जमा होत होती. मात्र, संबंधित कर्मचाऱ्यांवर कारवाई झाल्यानंतर सलग तीन आठवड्यांत दान रक्कम थेट दीड कोटी रुपयांच्या आसपास पोहोचल्याचे नमूद करण्यात आले आहे. याच आधारावर यापूर्वी दानपेटीतील काही रक्कम नियमितपणे लंपास होत असावी, असा संशय विश्वस्तांनी व्यक्त केला. या संभाव्य फरकाचा वार्षिक हिशोब मांडत त्यांनी मंदिराला दरवर्षी सुमारे १८ कोटी रुपयांचे नुकसान होत असल्याचा अंदाज व्यक्त केला. मात्र, हा निष्कर्ष संशयाच्या आधारे मांडण्यात आला असून, अधिकृत चौकशी अहवाल अद्याप समोर आलेला नाही. राज ठाकरे यांनी सभेत वाचून दाखवले पत्र महाराष्ट्र नवनिर्माण विद्यार्थी सेनेच्या वर्धापन दिनानिमित्त मुंबईत आयोजित मेळाव्यात राज ठाकरे यांनी हे पत्र सार्वजनिकपणे वाचून दाखवत सरकारवर जोरदार टीका केली. राम मंदिरातील कथित आर्थिक गैरव्यवहाराचा उल्लेख करत राज ठाकरे यांनी प्रश्न उपस्थित केला की, धार्मिक श्रद्धेच्या केंद्रस्थानी असलेल्या मंदिरांमध्येच जर आर्थिक गैरव्यवहार होत असतील, तर सरकारने त्यावर स्पष्ट भूमिका का घेत नाही? यावेळी त्यांनी विश्वस्तांच्या पत्रातील मजकूर उद्धृत करत सिद्धिविनायक मंदिरातून दरवर्षी १८ कोटी रुपयांचे नुकसान होत असल्याचा दावा केला. मंदिरातील दानावर भाविकांचा विश्वास असतो, त्यामुळे अशा आरोपांची गंभीर चौकशी होणे आवश्यक असल्याचेही त्यांनी नमूद केले. विश्वस्तांचा संशय नेमका काय? पत्रातील मजकुरानुसार विश्वस्तांनी थेट १८ कोटी रुपयांची चोरी झाल्याचा निष्कर्ष नोंदवलेला नाही. त्यांनी दानरकमेतील अचानक झालेली वाढ आणि कर्मचाऱ्यांवरील कारवाई या दोन बाबींचा संदर्भ देत, पूर्वी काही रक्कम अपहाराद्वारे बाहेर जात असावी, असा संशय व्यक्त केला आहे. तसेच या प्रकरणाचे धागेदोरे वरिष्ठ पातळीपर्यंत असू शकतात, अशी शंकाही त्यांनी व्यक्त केली असून, त्यासाठी स्वतंत्र चौकशीची मागणी केली आहे. सदा सरवणकर यांचे स्पष्टीकरण राज ठाकरे यांच्या वक्तव्यानंतर सिद्धिविनायक मंदिर न्यासाचे अध्यक्ष सदा सरवणकर यांनी संपूर्ण प्रकरणावर भूमिका स्पष्ट केली. त्यांच्या म्हणण्यानुसार, विश्वस्तांनी सरकारला दिलेल्या पत्रामुळे नागरिकांमध्ये गैरसमज निर्माण झाला आहे. पत्रात कुठेही “१८ कोटींची चोरी झाली” असा स्पष्ट उल्लेख नसल्याचे त्यांनी सांगितले. सरवणकर यांनी स्पष्ट केले की, मंदिरात गेल्या दोन वर्षांत प्रशासनिक स्तरावर अनेक सुधारणा करण्यात आल्या असून त्याचा सकारात्मक परिणाम मंदिराच्या उत्पन्नावर झाला आहे. उत्पन्न वाढण्यामागील कारणे कोणती? सदा सरवणकर यांनी दानरकमेतील वाढीमागे काही महत्त्वाच्या कारणांचा उल्लेख केला. त्यांच्या म्हणण्यानुसार, पूर्वी काही कंत्राटी कर्मचारी दर्शनासाठी ऑनलाइन पद्धतीने, विशेषतः GPay द्वारे, अनधिकृतरीत्या पैसे घेत असल्याचे निदर्शनास आले होते. हे लक्षात आल्यानंतर संबंधित १९ कर्मचाऱ्यांना निलंबित करण्यात आले. त्यानंतर त्यांच्याकडून शपथपत्रही घेण्यात आले. याशिवाय काही कर्मचारी हातचलाखी करून रोख रकमेची अफरातफर करत असल्याचेही समोर आले. त्यानंतर नऊ कर्मचाऱ्यांवर कारवाई करण्यात आली. तसेच काही भाविक पुजाऱ्यांना थेट पैसे देत असल्याचे आढळून आले. शासनाच्या नियमांनुसार अशी रक्कम दानपेटीत जमा करणे आवश्यक असते. या नियमांची काटेकोर अंमलबजावणी सुरू झाल्यानंतर मंदिराच्या अधिकृत उत्पन्नात वाढ झाल्याचे सदा सरवणकर यांनी स्पष्ट केले. ‘१८ कोटींची चोरी’ की ‘संभाव्य महसूल नुकसान’? सध्या सार्वजनिक चर्चेत “दरवर्षी १८ कोटींची चोरी” हा शब्दप्रयोग मोठ्या प्रमाणावर वापरला जात असला, तरी उपलब्ध माहितीनुसार ही रक्कम अधिकृत तपासातून सिद्ध झालेली चोरी नसून, दानरकमेतील वाढीच्या आधारे विश्वस्तांनी व्यक्त केलेला संभाव्य आर्थिक तोट्याचा अंदाज आहे. या प्रकरणात कर्मचाऱ्यांवर कारवाई झाल्याची माहिती उपलब्ध असली, तरी १८ कोटी रुपयांचा अपहार झाल्याचे कोणत्याही अधिकृत तपास यंत्रणेने अद्याप सिद्ध केलेले नाही. हे ही वाचा… कॉकरोज जनता पार्टीच्या अडचणी वाढणार?:विदेशी फंडिंगची ईडीकडून चौकशी सुरू; गृहराज्यमंत्री पंकज भोयर यांची माहिती दिल्लीत अभूतपूर्व आंदोलन उभे करून थेट धर्मेंद्र प्रधान यांना शिक्षणमंत्रिपदाचा राजीनामा देण्यास भाग पाडणारी ‘कॉकरोच जनता पार्टी’ आता सरकारच्या रडारवर आली आहे. ‘नीट’ पेपरफुटीविरोधात उभारलेल्या या आंदोलनाची आणि त्यात ‘जेन झी’ तरुणाईने घेतलेल्या सक्रिय सहभागाची जगभरात चर्चा झाली. मात्र, या यशस्वी आंदोलनानंतर सीजेपीला मिळणाऱ्या विदेशी देणग्यांची आता सखोल चौकशी सुरू करण्यात आली आहे, अशी माहिती राज्याचे गृहराज्यमंत्री पंकज भोयर यांनी दिली. राज्य सरकार आणि अंमलबजावणी संचालनालयाने या प्रकरणी कारवाई सुरू केल्याने नवा राजकीय संघर्ष पेटण्याची चिन्हे आहेत. सविस्तर वाचा…
Source link
सिद्धिविनायक मंदिरातून 18 कोटींच्या दानचोरीचा आरोप:राज ठाकरेंचा घणाघात, तर विश्वस्तांचेही प्रत्युत्तर; काय आहे प्रकरण?
