मुंबईकरांचा प्रवास वेगवान करणाऱ्या कोस्टल रोडवर रविवारी सकाळी एक भीषण अपघात घडला. एका भरधाव पोर्शे या लक्झरी स्पोर्ट्स कारचा ताबा सुटल्याने ती थेट रस्त्याच्या दुभाजकाला जाऊन धडकली. ही धडक इतकी जोरदार होती की, कारच्या पुढच्या भागाचा अक्षरशः चक्काचूर झाला. मात्र, या भीषण अपघातात एक मोठी दैवी किमाया पाहायला मिळाली. कारमधील एअरबॅग वेळेत उघडल्यामुळे चालक आणि त्याच्यासोबत असलेल्या प्रवाशाचे प्राण थोडक्यात वाचले आहेत. मिळालेल्या प्राथमिक माहितीनुसार, ही घटना आज (रविवार, १९ जुलै २०२६) सकाळी ८ वाजेच्या सुमारास घडली. कोस्टल रोडवरून ही कार अत्यंत वेगाने धावत असताना अचानक चालकाचे गाडीवरील नियंत्रण सुटले आणि कार रस्त्याच्या मधोमध असलेल्या दुभाजकावर आदळली. अपघाताचा आवाज होताच परिसरात एकच खळबळ उडाली. घटनेची माहिती मिळताच अवघ्या आठ मिनिटांत पोलिस प्रशासन आणि बचाव पथक घटनास्थळी हजर झाले. त्यांनी तातडीने कारमधील दोन्ही प्रवाशांना सुखरूप बाहेर काढले. या अपघातात कारचे कोट्यवधी रुपयांचे नुकसान झाले असले, तरी दोन्ही प्रवाशांना कोणतीही गंभीर दुखापत झालेली नाही. अतिवेग आणि रॅश ड्रायव्हिंगवर तज्ज्ञांनी व्यक्त केली चिंता शनिवारपासून मुंबईत सुरू असलेल्या पावसामुळे कोस्टल रोडचा रस्ता ओला आणि निसरडा झाला होता, जे अपघाताचे एक प्रमुख कारण मानले जात आहे. या अपघाताबाबत ‘टॅप टर्बो इंजिनिअर्स प्रायव्हेट लिमिटेड’चे फील्ड इंचार्ज रवी गुप्ता यांनी चिंता व्यक्त केली. ते म्हणाले, “विशेषतः वीकेंडला (शनिवार-रविवार) कोस्टल रोडवर वाहनांच्या गतीचे नियम धाब्यावर बसवून बेदरकारपणे हाय-स्पीडवर गाड्या चालवणे ही आता एक सामान्य बाब बनली आहे. त्यातच शनिवारपासून सुरू असलेल्या पावसामुळे रस्ता ओला होता. सध्या आम्ही घटनास्थळावरून अपघातग्रस्त गाडी हटवण्यासाठी आणि वाहतूक सुरळीत करण्यासाठी पोलिसांना पूर्ण सहकार्य करत आहोत.” वाहतूक काही काळ विस्कळीत या भीषण अपघातामुळे कोस्टल रोडच्या संबंधित मार्गावरील वाहतूक काही काळासाठी पूर्णपणे विस्कळीत झाली होती. पोलिसांनी युद्धपातळीवर प्रयत्न करून क्रेनच्या साहाय्याने अपघातग्रस्त पोर्शे कार रस्त्यावरून बाजूला हटवली आणि रस्ता साफ केला. त्यानंतर रखडलेली वाहतूक पुन्हा पूर्ववत करण्यात आली. सध्या पोलिस या अपघाताच्या मूळ कारणाचा सखोल तपास करत आहेत. हा अपघात गाडीत झालेल्या एखाद्या तांत्रिक बिघाडामुळे झाला की अतिवेगामुळे चालकाचे नियंत्रण सुटल्याने घडला, हे स्पष्ट करण्यासाठी पोलिसांकडून चौकशी सुरू आहे. हे ही वाचा… खलील शेख आत्महत्या प्रकरण:रवींद्र धंगेकर दाम्पत्य ‘नॉट रिचेबल’; अटकपूर्व जामिनासाठी कोर्टात धाव, पोलिसांची पथके रवाना पुण्यातील बांधकाम व्यावसायिक आणि लेबर काँट्रॅक्टर खलील शेख यांच्या आत्महत्या प्रकरणाने आता मोठे राजकीय वळण घेतले आहे. या प्रकरणात गुन्हा दाखल झाल्यानंतर माजी आमदार आणि एकनाथ शिंदेंच्या शिवसेनेचे नेते रवींद्र धंगेकर यांच्या अडचणीत कमालीची वाढ झाली आहे. धंगेकर आणि त्यांच्या पत्नीवर अटकेची टांगती तलवार असल्याने हे दाम्पत्य सध्या ‘नॉट रिचेबल’ झाले आहे. पोलिसांची विशेष पथके त्यांच्या शोधासाठी रवाना झाली असून, दुसरीकडे धंगेकर यांनी अटकेपासून संरक्षण मिळवण्यासाठी कायदेशीर हालचाली सुरू केल्या आहेत. सविस्तर वाचा…
Source link
मुंबई कोस्टल रोडवर 'पोर्शे'चा भीषण अपघात:भरधाव वेगात दुभाजकाला धडक, कारचा पुढचा भाग चक्काचूर; एअरबॅगमुळे दोघांचे वाचले प्राण
