खुशबूसोबत प्रेमविवाह, नंतर तिच्याच चारित्र्यावर संशय, वैतागून माहेरी आली, नराधम पतीचं संतापजनक कृत्य

खुशबू सूरज तिवारी असे जखमी महिलेचे नाव आहे. सूरज प्रभुनाथ तिवारी असे आरोपी पतीचे नाव आहे. खुशबू आणि सूरज यांचा प्रेमविवाह झाला होता. त्यांना एक लहान बाळ आहे. मात्र, पती कोणतेही काम धंदा करत नसून दारूच्या आहारी गेल्याने तो पत्नीला वारंवार मारहाण आणि शिवीगाळ करत होता. पतीच्या सततच्या त्रासाला कंटाळून खुशबू काही दिवसांपासून आपल्या लहान बाळासह माहेरी राहत होती.

आरोपी सासरी गेला

मिळालेल्या माहितीनुसार, 26 ऑगस्ट रोजी रात्री साडेअकराच्या सुमारास सूरज पुनापूर येथील पत्नीच्या माहेरी गेला. त्याने खुशबूला आपल्यासोबत घरी चलण्यास सांगितले. मात्र, यावेळी दोघांमध्ये वाद झाला. सूरजने पत्नीच्या चारित्र्यावर संशय घेत तिचे दुसऱ्या व्यक्तीसोबत अनैतिक संबंध असल्याचा आरोप केला. त्यानंतर तिला शिवीगाळ करत जीवे मारण्याची धमकी दिली. तसेच घराबाहेर गोंधळही घातला.

Maharashtra Rain : महाराष्ट्रात सर्वदूर पाऊस कधी येणार? पंजाबराव डख यांचा नवा हवामान अंदाज

आरोपीकडून पत्नीला जीवे मारण्याचा प्रयत्न

मात्र, या वादानंतरही सूरज थांबला नाही. त्याने दुसऱ्या दिवशी 27 ऑगस्ट रोजी सकाळी सातच्या सुमारास तो पुन्हा दुचाकी घेऊन पत्नीच्या माहेरी पोहोचला. यावेळी त्याने पुन्हा खुशबूसोबत वाद घातला. शिवीगाळ करत तिला धमकी दिल्यानंतर त्याने दुचाकीमधून बाटलीत पेट्रोल काढले आणि तिच्या अंगावर पेट्रोल ओतले. त्यानंतर माचिसची काडी पेटवून तिला जिवंत जाळण्याचा प्रयत्न केला.

नागरिकांच्या प्रसंगावधानाने अनर्थ टळला

अचानक घडलेल्या या प्रकारामुळे खुशबूने मोठ्याने आरडाओरड करण्यास सुरुवात केली. त्यावेळी तिच्या बहिणीने प्रतिकार करत आरोपी सूरजला पकडून घराच्या बाहेर ओढले, आणि तिच्या अंगावर चादर टाकली तिचा आवाज ऐकून आजूबाजूतील लोक नागरिक घटनास्थळी धावून आले. नागरिकांनी प्रसंगावधान राखत आरोपीला रोखले आणि महिलेला आरोपीपासून दूर केल्याने मोठा अनर्थ टळला. या घटनेनंतर परिसरात काही काळ तणावाचे वातावरण निर्माण झाले होते.

आरोपीचा गुन्हेगारी रेकॉर्ड, घटनेनंतर फरार

घटनेनंतर खुशबूला तातडीने उपचारासाठी मेयो रुग्णालयात दाखल करण्यात आले. तिच्यावर उपचार सुरू आहेत. दरम्यान, खुशबूने दिलेल्या तक्रारीवरून पारडी पोलिसांनी आरोपी सूरज तिवारी विरुद्ध हत्येचा प्रयत्न करण्यासह विविध कलमांनुसार गुन्हा दाखल केला आहे. आरोपीचा पूर्वीही गुन्हेगारी रेकॉर्ड असल्याची माहिती पोलिसांना मिळाली आहे. घटनेनंतर आरोपी सूरज तिवारी फरार झाला असून पारडी पोलीस त्याचा शोध घेत आहेत. या प्रकरणाचा पुढील तपास पारडी पोलीस करीत आहेत.