Nagpur Pregnancy Case: नागपूरातील मेयो हॉस्पिटलमध्ये घडलेला धक्कादायक प्रकार समोर आला. एका अल्पवयीन मुलीची प्रसूती बनावट आधारकार्ड वापरून करण्यात आली. मुलीचे वय लपवण्यासाठी कुटुंबीयांकडून हा प्रकार करण्यात आला.
नेमकं प्रकरण काय
या मुलीची सोशल मीडियाच्या माध्यमातून मध्य प्रदेशातील एका युवकासोबत ओळख झाली होती. पुढे या ओळखीचे प्रेमसंबंधात रूपांतर झाले. त्यातून ती गर्भवती राहिली. गर्भधारणेची माहिती समोर आल्यानंतर संबंधित युवकाने तिच्याशी संपर्क तोडल्याचे सांगण्यात येते. भीतीपोटी मुलीने ही बाब सुरुवातीला कुटुंबीयांपासून लपवून ठेवली.
मात्र, शारीरिक बदलांमुळे संशय आल्याने कुटुंबीयांनी तिला मेयो हॉस्पिटलमध्ये दाखल केले. १० जुलै रोजी तिने नवजात बालकाला जन्म दिला. प्रसूतीदरम्यान बनावट आधारकार्डाचा वापर करून तिची चुकीची जन्मतारीख नोंदविण्यात आल्याचे चौकशीत समोर आले आहे.
बालक दुसऱ्या कुटुंबाकडे
प्रसूतीनंतर नवजात बालकाला मुलीच्या आईच्या ओळखीतील एका कुटुंबाकडे बेकायदेशीररीत्या देण्यात आल्याचेही उघड झाले. याबाबत चाइल्ड हेल्पलाइनच्या १०९८ क्रमांकावर तक्रार प्राप्त झाली. त्यानंतर महिला व बाल विकास विभाग आणि इमामवाडा पोलिसांनी संयुक्त कारवाई करीत बालकाची सुटका केली.
नवजात बालकाला सुरक्षितपणे शिशुगृहात दाखल करण्यात आले आहे. ही कारवाई जिल्हा महिला व बाल विकास अधिकारी सुनील मेसरे, भांडेवाडी पोलिस ठाण्याचे वरिष्ठ पोलिस निरीक्षक नितीन चरडे आणि इमामवाडाचे वरिष्ठ पोलिस निरीक्षक जयवंत पाटील यांच्या मार्गदर्शनात करण्यात आली.
‘पोक्सो’ कायद्यांतर्गत एफआयआर दाखल
याप्रकरणी मध्य प्रदेशातील संशयित युवकाविरुद्ध ‘पोक्सो’ कायद्यांतर्गतझिरो एफआयआर नोंदविण्यात आला आहे. पुढील कायदेशीर प्रक्रिया सुरू आहे. पीडित अल्पवयीन मुलीला कायदेशीर संरक्षण, समुपदेशन आणि पुनर्वसनाच्या सुविधा उपलब्ध करून देण्याची प्रक्रिया सुरू असल्याचे अधिकाऱ्यांनी सांगितले.
मुलीचे वय वर्ष १६
हा धक्कादायक प्रकार नागपूराताील मेयो हॉस्पिटलमध्ये घडला असून.या अल्पवयीन मुलीसोबत संबंध ठेवणारा युवक हा मध्यप्रदेशातील आहे. सोशल मिडियावरुन झालेली ओळख त्यातून झालेला प्रेमसंबंध.यातून हा धक्कादायक प्रकार घडला.मुलीचे वय १६ वर्ष आहे.रुग्णालयात मुलीचे वय वाढवून दाखवण्यासाठी बनावट आधार कार्ड तयार करण्यात आल. परंतू हा सर्व प्रकार चौकशी दरम्यान उघड झाला.
लेखकाबद्दलटीम मटा ऑनलाइनमहाराष्ट्र टाइम्स ऑनलाइन हा गेल्या २६ वर्षांपासून महाराष्ट्रातील अग्रगण्य पोर्टल आहे. राजकीय, सामाजिक, आर्थिक, कला, क्रीडा, मनोरंजन, लाइफस्टाइल या विषयावर बातम्या देण्याचा आणि वाचकांना अपडेट ठेवण्याचे काम केले जाते. या टीममधील प्रत्येक पत्रकार हा वाचक हा केंद्र बिंदू मानून त्यांना बित्तमबातमी देण्याचा प्रयत्न करतो.… आणखी वाचा
