कुवेत, बहरीन, जॉर्डनवर एकापाठोपाठ एक ड्रोन डागल्याने घबराट : ट्रम्प यांच्याकडून इराणला पुन्हा धमकी
वृत्तसंस्था/ तेहरान, वॉशिंग्टन
इराण आणि अमेरिका यांच्यातील ताज्या हल्ल्यांमुळे आखाती देशांमध्ये पुन्हा एकदा चिंता वाढली आहे. आपल्या हद्दीत इराणकडून सातत्याने लष्करावर हवाई हल्ले होत असल्याचे कुवेतने सोमवारी सांगितले. दरम्यान, बहरीनमध्येही ड्रोनहल्ले होत असून देशात सायरन वाजवून लोकांना सतर्क करण्यात येत आहे. इराणकडून होत असलेल्या वाढत्या हल्ल्यांच्या पार्श्वभूमीवर लोकांना जवळच्या सुरक्षित ठिकाणी स्थलांतरित होण्याचे आवाहन करण्यात आले आहे. दुसरीकडे, अमेरिकेकडूनही हल्ल्यांसोबतच धमकी आणि इशारे सुरू असल्याने दोन्ही देशांमधील वातावरण तप्त होताना दिसत आहे.
कुवेत आणि बहरीन व्यतिरिक्त जॉर्डननेही हवेत अनेक ड्रोन पाडल्याचा दावा केला आहे. आखाती देशांवरील हल्ल्यांबाबत अमेरिकेने त्यांच्या भूभागावर केलेल्या हल्ल्यांना प्रत्युत्तर म्हणून ते संपूर्ण प्रदेशात हल्ले करत असल्याचे इराणने म्हटले आहे. इराणच्या निम-सरकारी ‘फर्स न्यूज एजन्सी’नुसार, बहरीनमधील इस्लामिक रिव्होल्यूशनरी गार्ड कॉर्प्सने त्यांच्या हवाई दलाने ‘ईसा एअर बेस’वर हल्ला केला. क्षेपणास्त्र रोखल्यानंतर झालेल्या अमेरिकेच्या हल्ल्यांना प्रत्युत्तर म्हणून जॉर्डनमधील प्रिन्स हसन हवाई तळावर क्षेपणास्त्रs आणि ड्रोनद्वारे हल्ला करण्यात आला. प्रत्युत्तराच्या दुसऱ्या टप्प्यात बहरीनमधील ईसा हवाई तळावरील अमेरिकेच्या हेलिकॉप्टर देखभाल आणि दुरुस्ती केंद्रावर, पी-8 इलेक्ट्रॉनिक युद्ध विमानांच्या हँगरवर आणि अमेरिकेच्या लष्करी ड्रोन कारवायांच्या कमांड-अँड-कंट्रोल केंद्रावर हल्ला करण्यात आला.
कुवेतमधील हल्ल्यात मोठी हानी
प्रत्युत्तराच्या तिसऱ्या आणि चौथ्या टप्प्यात कुवेतमधील अमेरिकेच्या लष्करी तळांना लक्ष्य करण्यात आले. आयआरजीसीच्या एरोस्पेस फोर्सने कुवेतमधील अली अल सालेम येथील अमेरिकेच्या तळावरील इंधन साठवण टाक्या, एक पॅट्रियट हवाई संरक्षण प्रणाली आणि एक एफपीएस स्ट्रॅटेजिक रडार प्रणाली पूर्णपणे नष्ट केली. तसेच कुवेतमधील अमेरिकेच्या जमिनीवरून जमिनीवर मारा करणाऱ्या क्षेपणास्त्रांच्या तळावर हल्ला करून दोन हाय मोबिलिटी आर्टिलरी रॉकेट सिस्टीम आणि क्षेपणास्त्रांनी भरलेले दारूगोळ्याचे गोदाम पूर्णपणे नष्ट केले.
नागरिकांना केले सतर्क
कुवैती लष्कराने ‘एक्स’ या सोशल मीडिया प्लॅटफॉर्मवर एक निवेदन जारी करून नागरिकांना सुरक्षा सूचनांचे पालन करण्याचे आवाहन केले आहे. सुरक्षा दल सध्या कुवैती हवाई क्षेत्रात शत्रूच्या हवाई लक्ष्यांवर कारवाई करत असल्याचे कुवैती लष्कराने सांगितले. बहरीनच्या गृह मंत्रालयाने नागरिकांना शांत राहण्याचे आणि जवळच्या सुरक्षित ठिकाणी जाण्याचे आवाहन केले आहे. धोक्याचा सायरन वाजल्यानंतर नागरिक आणि रहिवाशांना शांत राहण्याचे आणि जवळच्या सुरक्षित ठिकाणी जाण्याचे आवाहन करण्यात येत असल्याचे बहरीनच्या गृह मंत्रालयाने सांगितले.
इराणने होर्मुझमध्ये दोन जहाजे अडवली
एकीकडे आखाती देशांमध्ये हल्लासत्र सुरू ठेवतानाच इराणने होर्मुझ सामुद्रधुनीवरही लक्ष केंद्रीत केलेले दिसून येत आहे. या मार्गातून जाणारी दोन जहाजे अडवण्यात आली. सदर जहाजांनी ट्रॅकिंग सिस्टीम बंद केल्यामुळे कारवाई करण्यात आली. परवानगीशिवाय होर्मुझच्या सामुद्रधुनीतून प्रवास केल्यामुळे इराणने जहाजे रोखली आहेत.
रशियाचे सर्वात गुप्त विमान इराणमध्ये दाखल : हवेतून युद्धावर नियंत्रण ठेवण्याची क्षमता
मध्यपूर्वेतील वाढत्या तणावाच्या पार्श्वभूमीवर, रशियाने आपले अत्यंत सुरक्षित ‘टीयू-214पीयू’ हवाई कमांड विमान तेहरानला पाठवले आहे. जगभरात उडणाऱ्या विमानांचे रिअल-टाइम लोकेशन दाखवणाऱ्या फ्लाईटरडार-24 या वेबसाइटने हा दावा केला आहे. ‘टीयू-214पीयू’ हे एक सामान्य व्हीआयपी विमान नाही. ते एका सुरक्षित आणि एनक्रिप्टेड कम्युनिकेशन सिस्टीम, कमांड आणि कंट्रोल सिस्टीम आणि विशेष डेटा लिंक्सने सुसज्ज असल्यामुळे रशियाच्या सर्वोच्च नेत्यांना संकटकाळातही विमानातून प्रवास करत असताना लष्कर आणि सरकारचे कामकाज चालवता येते. ‘टीयू-214पीयू’ च्या मोहिमांचा संपूर्ण तपशील सार्वजनिक केलेला नाही. मात्र, युक्रेन युद्धादरम्यान हे विमान अनेक वेळा उडताना दिसले होते. रशियाकडे अशी किती विमाने आहेत याची माहितीही सार्वजनिक नाही.
