अमेरिकेचे अध्यक्ष डोनाल्ड ट्रम्प यांनी देशातील पहिल्या ‘स्पेस अकॅडमी’च्या स्थापनेसाठी कार्यकारी आदेशावर स्वाक्षरी केली आहे. या ऐतिहासिक उपक्रमाचा मुख्य उद्देश अंतराळवीर, अभियंते आणि अंतराळ क्षेत्रातील भविष्यातील नेत्यांना प्रशिक्षित करणे हा आहे. ही अकॅडमी अमेरिकेच्या अंतराळ मोहिमांना अधिक बळकट करण्यासाठी महत्त्वपूर्ण भूमिका बजावेल. दरम्यान, यावेळी राष्ट्राध्यक्ष ट्रम्प यांना खास ’45-47’ फ्लाईट जॅकेट भेट देण्यात आले.
काल, 28 ऑगस्ट 2026 रोजी नासाच्या जॉन्सन स्पेस सेंटरमध्ये एका विशेष कार्यक्रमाचे आयोजन करण्यात आले होते. या कार्यक्रमात ‘आर्टेमिस 2’ मोहिमेचे पायलट व्हिक्टर ग्लोव्हर यांनी राष्ट्राध्यक्ष डोनाल्ड ट्रम्प यांना नासाचे अधिकृत निळे फ्लाईट जॅकेट भेट म्हणून दिले.
जॅकेटवरील “45-47” चा अर्थ काय?
या फ्लाईट जॅकेटवर ‘आर्टेमिस मिशन पॅच’ सोबत “45-47” असे लिहिलेले आहे. अमेरिकेच्या राजकीय इतिहासात डोनाल्ड ट्रम्प हे देशाचे 45 वे राष्ट्राध्यक्ष होते आणि सध्या ते 47 वे राष्ट्राध्यक्ष (47th President) म्हणून कार्यरत आहेत. हे जॅकेट ट्रम्प यांच्या या दोन्ही कार्यकाळांचे आणि त्यांनी अंतराळ मोहिमेला दिलेल्या पाठिंब्याचे प्रतीक आहे.
व्हिक्टर ग्लोव्हर नेमके काय म्हणाले?
जॅकेट भेट देताना पायलट व्हिक्टर ग्लोव्हर यांनी ट्रम्प यांच्या जुन्या भेटीची आठवण करून दिली. ते म्हणाले की. “जेव्हा आम्ही तुमच्या कार्यालयात (ओव्हल ऑफिस) आलो होतो, तेव्हा तुम्ही आम्हाला भरपूर वेळ दिला आणि अनेक भेटवस्तू दिल्या. त्याच वेळी आम्ही तुम्हाला हे निळे फ्लाईट जॅकेट देण्याबद्दल बोललो होतो. आज आम्ही तुमचे हे जॅकेट घेऊन आलो आहोत. सर्वांसमोर तुम्हाला ही भेट देणे आमच्यासाठी अत्यंत आनंदाची गोष्ट आहे.”
अमेरिकेचे राष्ट्राध्यक्ष डोनाल्ड ट्रम्प यांनी अंतराळ संशोधनाच्या क्षेत्रात एका नव्या युगाची सुरुवात केली आहे. देशातील पहिल्या ‘युएस स्पेस अकॅडमी’ची स्थापना करण्यासाठी ट्रम्प यांनी एका महत्त्वपूर्ण कार्यकारी आदेशावर स्वाक्षरी केली आहे.
‘टाईम्स ऑफ इंडिया’ने दिलेल्या वृत्तानुसार, या ऐतिहासिक उपक्रमाचा मुख्य उद्देश अंतराळवीर, अभियंते आणि अंतराळ क्षेत्रातील भविष्यातील जागतिक नेत्यांना अत्याधुनिक प्रशिक्षण देणे हा आहे. ही अकॅडमी केवळ चंद्रापुरती मर्यादित न राहता, खोल अंतराळात अमेरिकेचे वर्चस्व निर्माण करण्यासाठी पायाभरणी करणार आहे.
चंद्रावर बेस आणि ‘ऑर्बिटल इकॉनॉमी’वर भर
ट्रम्प प्रशासनाची ही नवीन मोहीम मानवाला पुन्हा चंद्रावर पाठवण्याच्या ‘आर्टेमिस’ मोहिमेला गती देणार आहे. मात्र, यावेळी केवळ चंद्रावर पाऊल ठेवणे एवढाच अमेरिकेचा उद्देश नाही, तर तिथे कायमस्वरूपी ‘मून बेस’ म्हणजेच मानवी तळ उभारण्याची योजना आहे. याशिवाय, अंतराळात आण्विक ऊर्जेचा वापर वाढवणे आणि ‘ऑर्बिटल इकॉनॉमी’ला चालना देणे यावर या अकॅडमीच्या माध्यमातून विशेष संशोधन आणि काम केले जाईल.
दिग्गजांवर सोपवली नेतृत्वाची धुरा
या संपूर्ण अंतराळ मोहिमेला गती देण्यासाठी आणि धोरणे आखण्यासाठी राष्ट्राध्यक्ष ट्रम्प यांनी एका नवीन ‘अध्यक्षीय आयोगाची’ स्थापना केली आहे. या उच्चस्तरीय आयोगाच्या अध्यक्षपदाची धुरा प्रसिद्ध अंतराळवीर आणि अब्जाधीश जॅरेड आयझॅकमन यांच्याकडे सोपवण्यात आली आहे. आयझॅकमन यांनी यापूर्वी खाजगी अंतराळ मोहिमेचे यशस्वी नेतृत्व केले आहे. तर दुसरीकडे, मॅट अँडरसन यांची या आयोगाचे कार्यकारी संचालक म्हणून नियुक्ती करण्यात आली आहे. हे नेतृत्व अमेरिकेच्या खाजगी आणि सरकारी अंतराळ क्षेत्राला एकत्र आणण्याचे काम करेल.
आर्टेमिस II च्या अंतराळवीरांचा सर्वोच्च सन्मान
या ऐतिहासिक घोषणांदरम्यान, राष्ट्राध्यक्ष ट्रम्प यांनी ‘आर्टेमिस II’ मोहिमेच्या धाडसी क्रू मेंबर्सना अमेरिकेचा अंतराळ क्षेत्रातील सर्वोच्च बहुमान म्हणजेच ‘काँग्रेशनल स्पेस मेडल ऑफ ऑनर’ प्रदान करून गौरविले. या अंतराळवीरांनी केलेल्या कामगिरीमुळेच पुढील पिढीला अंतराळात जाण्याची प्रेरणा मिळेल, असे ट्रम्प यांनी यावेळी नमूद केले.
जागतिक स्तरावर अमेरिकेचे वर्चस्व वाढणार
या स्पेस अकॅडमीच्या माध्यमातून अमेरिका आता चीन आणि इतर देशांच्या अंतराळ मोहिमांना तगडे आव्हान देण्याच्या तयारीत आहे. अंतराळात लष्करी आणि व्यावसायिक अशा दोन्ही स्तरांवर आपले स्थान मजबूत करण्यासाठी अमेरिका या संस्थेचा वापर करणार आहे. भविष्यातील मंगळ मोहीम आणि त्यापुढील मोहिमांसाठी लागणारे मनुष्यबळ याच अकॅडमीमधून तयार केले जाईल.
लेखकाबद्दलशुभम कुलकर्णीशुभम कुलकर्णी हे गेल्या नऊ वर्षांहून अधिक काळ मुख्य प्रवाहातील माध्यम क्षेत्रात सक्रिय असलेले एक व्यासंगी पत्रकार आहेत. सध्या ते ‘महाराष्ट्र टाईम्स’च्या ‘टेक आणि सायन्स’ विभागात कन्सल्टंट म्हणून आपली जबाबदारी सांभाळत आहेत. तंत्रज्ञान विश्वातील वेगाने बदलणारे आर्टिफिशियल इंटेलिजन्स (AI) चे प्रगत तंत्रज्ञान, नवनवीन गॅझेट्स, टेक ट्रेंड्स, स्मार्टफोन रिव्ह्यूज आणि सायन्स क्षेत्रातील क्लिष्ट वैज्ञानिक घडामोडी अतिशय सोप्या, सर्वसामान्यांना समजेल अशा रंजक भाषेत मांडण्यात त्यांचा विशेष हातखंडा आहे. डिजिटल मीडियातील अचूक SEO आणि Google Discover च्या बदलत्या अल्गोरिदमचा वापर करून लाखो वाचकांपर्यंत तांत्रिक माहिती पोहोचवण्यात त्यांचा मोलाचा वाटा आहे.
छत्रपती संभाजीनगर येथील नामांकित ‘MGM’ संस्थेतून ‘एम.ए. पत्रकारिता आणि जनसंवाद’ ही मास्टर पदवी संपादन केल्यानंतर, त्यांनी आपल्या कारकिर्दीची सुरुवात ‘आकाशवाणी’ या प्रतिष्ठित संस्थेतून केली. 2017 मध्ये त्यांनी ‘दैनिक सामना’ या अग्रगण्य मुखपत्रात प्रवेश करत वृत्तपत्र पत्रकारितेचा भक्कम पाया रचला. त्यानंतर मुंबईतील ABP माझा, TV9 मराठी, साम TV, पुढारी न्यूज चॅनेल आणि लोकशाही न्यूज या महाराष्ट्रातील आघाडीच्या वृत्तवाहिन्यांमध्ये ‘बुलेटिन प्रोड्यूसर’ म्हणून जबाबदारी सांभाळली आहे. राजधानी दिल्ली येथे ‘News Nation Marathi’ साठी राष्ट्रीय आणि आंतरराष्ट्रीय स्तरावरील वेगवेगळ्या न्यूज बुलेटिन्सचा दांडगा अनुभव त्यांच्या पाठीशी आहे.
प्रिंट, इलेक्ट्रॉनिक आणि डिजिटल मीडियाच्या सखोल अनुभवामुळे राजकारण, व्यापार-उद्योग, विज्ञान, तंत्रज्ञान, ऑटोमोबाईल, सायबर सुरक्षा आणि लाइफस्टाईल क्षेत्रातील गुंतागुंतीच्या विषयांचे अचूक विश्लेषण करणे ही त्यांची प्रमुख ओळख आहे. पत्रकारितेच्या या व्यस्त प्रवासातून वेळ काढत, निसर्गाच्या सानिध्यात वेळ घालवणे हा त्यांचा छंद आहे.… आणखी वाचा
