Vidhan Parishad Election 2026 Result Parbhani Eknath Shinde led Shiv Sena Saeed Khan won; ठाकरेंना डिवचणाऱ्या शिंदेंचाही परभणीत ‘खान’ आमदार, विधान परिषेदवर झेंडा फडकवला

तिरंगी लढतीमुळे चुरस

परभणी हिंगोली विधान परिषदेची निवडणूक सुरुवातीपासूनच चर्चेत आली होती. महायुतीकडून ही जागा शिवसेनेला सुटली. त्यानंतर मात्र त्यांच्या विरोधात महाविकास आघाडीने ही जागा शिवसेना उद्धव बाळासाहेब ठाकरे या पक्षाकडे दिली. त्यामुळे या निवडणुकीत शिवसेना विरुद्ध शिवसेना असा सामना रंगला. पण या विधानपरिषद मतदारसंघामध्ये महायुतीकडे प्रचंड बहुमताचा आकडा होता, त्यामुळे ही निवडणूक चुरशीची होईल असे सुरुवातीला वाटत नव्हते. पण त्यातच अपक्ष उमेदवारांनी एन्ट्री घेतल्यामुळे या निवडणुकीत प्रचंड चुरस निर्माण झाली. तिरंगी झालेल्या या लढतीमध्ये शिवसेना शिंदे गटाचे उमेदवार सईद खान यांचा दणदणीत विजय झाला आहे.

466 जणांपैकी या निवडणुकीमध्ये 465 मतदारांनी मतदान केले त्यापैकी 242 पहिल्या पसंतीची मते ही शिवसेना शिंदे गटाच्या सईद खान यांना मिळाली आहेत. त्या पाठोपाठ महाविकास आघाडीचे शिवसेना उद्धव बाळासाहेब ठाकरे पक्षाचे उमेदवार डॉक्टर विवेक नावंदर यांना 159 मते मिळाली आहेत तर तिसऱ्या स्थानावर अपक्ष उमेदवार सुशील देशमुख यांना केवळ 56 मते मिळाली, तर आठ मते बाद झाली. महायुतीकडे तब्बल 300 च्या वर मतदार असताना देखील सईद खान यांना केवळ 242 मते मिळाल्याने महायुतीमध्ये देखील कुठेतरी मतांचे विभाजन झाले असल्याचे आता समोर आलेले आहे. असे असले तरी महायुतीचा विजय झाल्यामुळे जिल्हाभरात शिवसेना शिंदे गटाचे कार्यकर्ते सध्या जल्लोष करत आहेत.
Gokul Gite : नाशकात शिंदेसेनेचा गेम, अपक्ष गोकुळ गितेंचा विजयाचा गुलाल; पराभवानंतर शिंदेंची नवी खेळी, एका फोनवर बाजू पालटणार?

उद्धव ठाकरेंचा बालेकिल्ला आता एकनाथ शिंदेंचा होणार?

परभणी जिल्हा हा आजपर्यंत शिवसेना उद्धव बाळासाहेब ठाकरे पक्षाचा बालेकिल्ला म्हणून ओळखला जात असे. शिवसेनेमध्ये फूट पडल्यानंतर झालेल्या लोकसभा आणि विधानसभा निवडणुकीमध्ये परभणी जिल्ह्यातील नागरिकांनी उद्धव ठाकरे यांच्या पाठीशी खंबीरपणे उभे राहून एक खासदार आणि एक आमदार निवडून दिला. त्यामुळे राज्यामध्ये जरी उपमुख्यमंत्री एकनाथ शिंदे यांना यश आले तरी परभणी जिल्ह्यामध्ये मात्र त्यांना यश मिळत नव्हते.

नुकत्याच झालेल्या विधान परिषद निवडणुकीमध्ये मात्र उपमुख्यमंत्री एकनाथ शिंदे यांनी यश खेचून आणले आहे. सईद खान यांच्या रुपाने त्यांचा पहिला शिवसेनेचा आमदार म्हणून विजयी झालेला आहे. त्याचबरोबर शिवसेना शिंदे गटाला दुसरी लॉटरी देखील लागलेली आहे. परभणीचे खासदार संजय जाधव यांनी उद्धव ठाकरेंची साथ सोडत आता एकनाथ शिंदेंसोबत जाण्याचा निर्णय घेतला आहे. त्यामुळे येणाऱ्या काळात परभणी जिल्हा हा शिवसेना म्हणजेच उपमुख्यमंत्री एकनाथ शिंदे यांचा बालेकिल्ला होणार का असा प्रश्न मात्र आता पडला आहे.

सईद खान यांच्या रूपाने अल्पसंख्याक आमदार नेतृत्व

उपमुख्यमंत्री एकनाथ शिंदे यांनी शिवसेनेच्या माध्यमातून हिंदुत्वाचा एल्गार केला. भाजपच्या हिंदुत्वासोबतच एकनाथ शिंदे यांनी आपलं देखील हिंदुत्व कडवं असल्याचं जाहीर केलं. उद्धव ठाकरे यांना काँग्रेससोबत गेल्यामुळे पराभवाला सामोरे जावे लागत आहे. त्यांना मुस्लिमांना गोंजारावं लागत आहे असं देखील म्हटले गेले पण त्याच उपमुख्यमंत्री एकनाथ शिंदे यांनी आपल्याकडे मुस्लिम मते वळवण्यासाठी एका अल्पसंख्याक उमेदवाराला परभणी हिंगोली विधान परिषदेमध्ये उमेदवारी दिली आणि त्यांना निवडून देखील आणलं आहे.
Bhaskar Jadhav : मिलिंद नार्वेकर एवढे हळवे आहेत माहिती नव्हतं, भास्कर जाधवांची सारवासारव, राहुल नार्वेकर समजून विधान केल्याचा दावा
येणाऱ्या काळामध्ये मुस्लिमांची मतही केवळ काँग्रेस आणि राष्ट्रवादी काँग्रेस पूर्ती मर्यादित न राहता महायुतीला देखील मिळणार असल्याचे आता स्पष्ट झाले आहे. सईद खान यांच्या रूपाने अल्पसंख्याक नेतृत्व उपमुख्यमंत्री एकनाथ शिंदे यांनी राज्यापुढे ठेवल्यामुळे राज्यातील मुस्लिम मतदार देखील आता त्यांच्या पाठीमागे जाणार का हे येणाऱ्या काळामध्ये स्पष्ट होईल.