Sachin Ahir sends Message to Ambadas Danve about leaving Uddhav Thackeray to join Shiv Sena Eknath Shinde; ठाकरेसेनेत राहून ‘ऑपरेशन टायगर’ राबवणारे ‘धुरंधर’, सचिन अहिर यांनी अखेरपर्यंत गाफील ठेवलं, 11.30 वाजता ‘जय महाराष्ट्र’चा मेसेज

राजकारणात नाट्यमय कलाटणी

शिवसेना (उबाठा) पक्षाच्या सहा खासदारांना आपल्याकडे खेचल्यानंतर एकनाथ शिंदे यांनी पुन्हा नवी राजकीय खेळी केली. सचिन अहिर यांना गळाला लावून शिंदे यांनी फुटीर खासदारांच्या मतदारसंघांतील दौरा आटोपून मुंबईत परतलेल्या उद्धव ठाकरे यांना पुन्हा ऐन विधिमंडळाच्या अधिवेशनात जोरदार झटका दिला. विधान परिषदेच्या उपसभापतिपदाच्या निवडणुकीसाठी मंगळवारी उमेदवारी अर्ज दाखल करण्याच्या शेवटच्या दिवशी महायुतीच्या वतीने नाट्यमयरित्या सचिन अहिर यांनी अर्ज भरला. यावेळी मुख्यमंत्री देवेंद्र फडणवीस, उपमुख्यमंत्री एकनाथ शिंदे, सुनेत्रा पवार आदी उपस्थित होते.

ठाकरेंचे नेते अखेरपर्यंत गाफील

अहिर यांच्या उमेदवारीविषयी शिंदे यांच्या शिवसेनेकडून प्रचंड गोपनीयता पाळण्यात आली होती. उपसभापतिपदाच्या उमेदवारीचा अर्ज भरण्यासाठी निवडणूक निर्णय अधिकाऱ्यांच्या दालनात दाखल होईपर्यंत ठाकरे यांच्या नेत्यांना किंवा महाविकास आघाडीच्या नेत्यांना शिंदे यांच्या खेळीची कल्पना नव्हती. सचिन अहिर हे शिंदे यांच्या गोटात दाखल झाल्याची बातमी ठाकरे यांच्या बहुतांश आमदारांना प्रसारमाध्यमांद्वारे समजली. शिवसेनेच्या आमदारांनाही कोण उमेदवार आहे, हे शेवटच्या क्षणापर्यंत माहिती नव्हते.

अंबादास दानवे यांना संदेश

आपल्या निर्णयाची कुणालाही कुणकुण लागणार नाही, याची खबरदारी सचिन अहिर यांनी घेतली होती. सकाळी ११ वाजेपर्यंत ते शिवसेना ‘उबाठा’च्या आमदारांसोबत होते. मात्र, सकाळी साडेअकराच्या दरम्यान त्यांनी अंबादास दानवे यांना मोबाइलवर इंग्रजीत संदेश पाठवला. त्यात त्यांनी आपल्या निर्णयाची माहिती दिली. दानवे यांनी अहिर यांचा संदेश माध्यमांना वाचून दाखवला.
Crime News : डिनर झालं, पाईपलाईनजवळ गेले अन्… एक्स बॉयफ्रेण्डने 23 वर्षांच्या अंजलीला जिवानिशी संपवलं
अहिर यांनी आपल्या निर्णयाविषयी पक्षनेतृत्वाला शेवटपर्यंत अंधारात ठेवल्याने ‘उबाठा’च्या नेत्यांना नेमकी काय प्रतिक्रिया द्यावी, हे समजत नव्हते. उमेदवारी अर्ज दाखल केल्यानंतर सचिन अहिर हे एकनाथ शिंदे यांच्यासह शिवसेनेचे पक्ष कार्यालय असलेल्या ‘बाळासाहेब भवन’ येथे दाखल झाले. यावेळी पत्रकार परिषदेत बोलताना शिंदे यांनी सचिन अहिर यांचे कौतुक केले. ‘अहिर हे धनुष्यबाणाच्या चिन्हावर विधान परिषदेत निवडून आले आहेत. त्यांना शिवसेनेच्या लोकप्रतिनिधींनी मतदान केले आहे. त्यामुळे अहिर हे शिवसेनेचेच आमदार आहेत’, असे शिंदे यांनी सांगितले.

विधान परिषदेत महायुतीकडे बहुमत असल्याने उपसभापतिपदी अहिर यांचीच निवड होईल, असा विश्वास शिंदे यांनी व्यक्त केला. तर, उपसभापतिपदाची उमेदवारी दिल्याबद्दल अहिर यांनी शिंदे यांचे आभार मानले. ‘सर्वसामान्यांचे प्रश्न सरकारमध्ये राहून सोडवायला हवेत. उपसभापतिपदाच्या खुर्चीवरून हेच काम पुढे करत राहण्याची संधी शिंदे यांनी दिली आहे’, असे अहिर म्हणाले. शिंदे यांच्या शिवसेनेत जाण्याच्या निर्णयावरून होत असलेल्या टीकेकडे लक्ष वेधले असता, योग्य व्यासपीठावरून योग्य उत्तर देऊ, असे अहिर यांनी सांगितले. उद्धव ठाकरे, आदित्य ठाकरे यांनी माझ्यावर जी जबाबदारी दिली ती आपण यशस्वीपणे पार पाडण्याचा प्रयत्न केल्याचेही त्यांनी स्पष्ट केले.
Pabe Ghat Accident : जेवणाचं दुपारी कॉल करुन सांगतो, विश्वासचा आईला फोन ठरला अखेरचा, कुटुंबाने शेंडेफळ गमावलं, पहाटे साडेतीनला काळीज चिरणारी बातमी

ठाकरेंच्या उमेदवाराचा निभाव कठीण

विधान परिषदेच्या उपसभापतिदाच्या निवडणुकीत शिवसेना (उद्धव बाळासाहेब ठाकरे) पक्षाने मुंबई शिक्षक मतदारसंघाचे प्रतिनिधी ज. मो. अभ्यंकर यांना उमेदवारी दिली आहे. विधान परिषदेत महायुतीचे स्पष्ट बहुमत आहे. त्यामुळे अभ्यंकर यांचा अहिर यांच्यासमोर निभाव लागणे कठीण आहे.