Pune car plunged 60 feet into a valley while taking photos in Missing Link area; मिसिंग लिंक परिसराचं सौंदर्य कॅमेऱ्यात कैद करायला गेला अन् कार थेट ६० फूट दरीत कोसळली

म .टा. प्रतिनिधी लोणावळा: खंडाळा घाट माथा परिसरातील निसर्ग सौंदर्याची आणि नुकताच प्रकाशझोतात आलेल्या आशिया खंडातील सर्वात लांब मिसिंग लिंकची (कनेक्टिंग लिंक) सर्वांना भुरळ पडली आहे. याच मिसिंग लिंक व परिसरातील सौंदर्याचे नयनरम्य दृष्य आपल्या मोबाईलच्या कॅमेऱ्यात कैद करण्याचा मोह हरीयाणातील एका पर्यटकाला आवरला नाही. मिसिंग लिंक आणि परिसरातील सौंदर्य टिपण्यासाठी या उतावीळवीराने आपली आलिशान कार या ठिकाणी कोणत्याही प्रकारचा रस्ता नसताना येथील उंच डोंगर, टेकड्यांच्या तीव्र उतारावरून दऱ्यातून नेताना त्याचे कारवरील नियंत्रण सुटले अन् कार थेट मिसिंग लिंक बोगद्याच्या वर असलेल्या उंच डोंगरावरील दरीत सुमारे ५० ते ६० फूट खोल दरीत कोसळली. सुदैवाने ती कार दरीतील एका मोठ्या झाडाला अडकल्याने अनर्थ टळला. अन्यथा ही कार थेट मिसिंग लिंकच्या मार्गावर कोसळून मोठी दुर्घटना घडली असती. बोरघाट (दस्तुरी) मार्ग पोलिसांच्या सतर्कतेमुळे दरीत कोसळलेल्या कारमधील कारचालक पर्यटकाचा जीव वाचला आहे. मोहित स्वरूप भटनागर (वय- ५९, सध्या रा. वांद्रे, मुंबई, मूळ रा. गुरुग्राम, हरियाणा) असे कारचालक पर्यटकाचे नाव आहे.

बोरघाट (दस्तुरी) महामार्गाचे सहाय्यक पोलीस निरीक्षक स्वप्निल पाटील यांनी दिलेल्या माहितीनुसार, हरीयाणातील मोहित भटनागर हा पर्यटक त्याच्या स्कोडा कारने (क्रमांक – एमएच -०४/एफआर-७१४३) लोणावळा खंडाळा परिसरात फिरायला मुंबई पुणे द्रुतगती महामार्गाने येत होते. यावेळी त्यांना खंडाळा घाट माथा परिसरातील निसर्ग सौंदर्य आणि मिसिंग लिंकची भुरळ पडली. मिसिंग लिंकच्या बोगद्यावर असलेल्या निसर्ग सौंदर्याचा आनंद लुटण्याचा आणि येथील नयनरम्य सौंदर्य आपल्या मोबाईलच्या कॅमेऱ्यात कैद करण्याचा मोह त्यांना आवरला नाही. यासाठी त्यांनी खंडाळा घाटातून मार्ग काढत थेट गारमाळ परिसर गाठला. यावेळी त्याने कार गारमाळ रस्त्यावर उभी करण्याऐवजी ती येथील उंच डोंगर टेकड्या व दऱ्यातील तीव्र उतारावरून धोकादायकरित्या नेण्याचा प्रयत्न केला. यावेळी त्याचे कारवरील नियंत्रण सुटले अन् कार चार-पाच पलट्या खात थेट ५० ते ६० फूट खोल दरीत कोसळली. सुदैवाने ती कार दरीतील एका मोठ्या झाडाला अडकली.

दरम्यान, या घटनेची माहिती मिळताच बोरघाट दस्तुरी महामार्गाचे सहायक पोलीस निरीक्षक स्वप्निल पाटील, पोलीस कर्मचारी संदीप पवार, किरण शिंदे, भरत पावरा, गणेश खाडे आणि संतोष गुजरवार आणि गोडसे यांनी घटनास्थळी धाव घेत घटनेची पाहणी केली. दरीत उतरणे धोकादायक असतानाही पोलिसांनी स्वतःचा जीव धोक्यात घालून स्थानिकांच्या मदतीने दरीत उतरून कारमध्ये अडकलेल्या चालकाला बाहेर काढले. त्यानंतर तातडीने रुग्णवाहिकेतून उपचारासाठी रुग्णालयात हलवण्यात आले.

या अपघातात कारचालक किरकोळ जखमी झाला असला तरी, घटनेचे गांभीर्य मोठे होते. काही क्षणांचा उशीर झाला असता तर मोठी जीवितहानी होण्याची शक्यता व्यक्त केली जात आहे. महामार्ग पोलिसांनी दाखविलेली प्रसंगावधानता, धाडस आणि तत्परता यामुळे एका व्यक्तीचा जीव वाचला असून, या बचावकार्यासाठी महामार्ग पोलीस दलाचे सर्वत्र कौतुक होत आहे.