Pen-Panvel Local: पेण तालुक्यात ‘तिसरी मुंबई’; तरी थेट पेण-पनवेल लोकलची प्रतीक्षाच, हजारो प्रवाशांचे दररोज हाल

पेणपर्यंत लोकलची मागणी

पेण ग्रोथ सेंटर’ प्रकल्पामुळे पेण, रसायनी, नागोठणे परिसरात औद्योगिक आणि व्यावसायिक विकासाचा नवा अध्याय सुरू होणार असल्याचे चित्र आहे. पेण आणि आसपासचा परिसर गेल्या काही वर्षांत वेगाने विकसित होत आहे. मुंबई-गोवा महामार्गाचे विस्तारीकरण, औद्योगिक वाढ, जेएनपीटीचा विस्तार, नवी मुंबई आंतरराष्ट्रीय विमानतळाचा प्रभाव, तसेच अलिबाग-रायगड पर्यटनामुळे पेणचे महत्त्व वाढले आहे. या पार्श्वभूमीवर पेणपर्यंत लोकल ट्रेन सेवा सुरू करण्याची मागणी जोर धरत आहे.

Navi Mumbai News: नवी मुंबईतील स्थानकांचा तिढा कायम; ‘सिडको’कडून मध्य रेल्वेकडे ताबा देणार, रेल्वे प्रवाशांची गैरसोय कायम राहणार

सध्या पेण, अलिबाग, नागोठणे, रोहा या भागातील हजारो नागरिक रोज नोकरी, शिक्षण आणि व्यवसायासाठी मुंबई, नवी मुंबई किंवा पनवेलच्या दिशेने प्रवास करतात. बहुतांश प्रवास एसटी, खासगी वाहने किंवा महामार्गावर अवलंबून असल्याने वाहतूककोंडी, अपघात आणि प्रवासाचा वाढता खर्च या समस्यांचा सामना प्रवाशांना करावा लागतो. हजारो प्रवासी असल्याने नियमित लोकल सेवा हा प्रवाशांना मोठा दिलासा ठरू शकतो.

मर्यादित एक्सप्रेस आणि मेमू गाड्या

मुंबई महानगर प्रदेशाचा विस्तार रायगडकडे झपाट्याने होत असताना, भविष्यात लाखो प्रवाशांची रेल्वेवर अवलंबित्व वाढणार असल्याचे स्थानिकांचे म्हणणे आहे. सध्या पेण ते पनवेल दरम्यान एक्सप्रेस आणि मेमू गाड्या धावत असल्या, तरी त्यांची संख्या मर्यादित आहे. नियमित लोकल सेवा नसल्याने प्रवाशांना मोठ्या अडचणींचा सामना करावा लागत आहे. याच मुद्द्यावरून अभियंता जीवन पाटील यांनी ३ सप्टेंबर २०२५ रोजी केंद्रीय रेल्वेमंत्री अश्विनी वैष्णव यांना पत्र पाठवत पेण-पनवेल लोकल तातडीने सुरू करण्याची मागणी केली आहे. मात्र, अद्याप रेल्वे प्रशासनाकडून त्यावर कोणतेही ठोस उत्तर मिळाले नसल्याची नाराजी व्यक्त होत आहे. यावर स्थानिक लोकप्रतिनिधींनी केंद्राकडे याकरिता पाठवपुरवा करावा अशी मागणी होत आहे.

‘तिसरी मुंबई उभी करायची असेल तर आधी रेल्वे सुविधा सक्षम करा’ अशी भूमिका आता नागरिकांकडून घेतली जात आहे. रायगडच्या विकासाला ‘मुंबईची नवी दिशा’ म्हणून पाहिले जात असताना, आता पेण-पनवेल लोकलचा प्रश्न पुन्हा ऐरणीवर आला आहे.

“पेण परिसरातील कंपन्यांमध्ये काम करणारे तसेच शिक्षण व्यवसाय व नोकरीनिमित्त पनवेल व मुंबईत दररोज ये-जा करणारे हजारो लोक आहेत. ही संख्या दिवसोंदिवस वाढत आहे. पेण-पनवेल दरम्यान एसटी बस फारच कमी आहेत. सायंकाळी पनवेलहून पेणकडे येणे कठीण होऊन बसते. दिव्यांग व महिलांची सर्वाधिक अडचण होते. दोन्ही बाजूने सकाळी व संध्याकाळी सहा ते नऊ या वेळेत प्रवाशांची तुफान गर्दी असल्याने पेण-पनवेल मार्गावर लोकल सेवा सुरू करणे अत्यंत आवश्यक आहे,” जीवन पाटील, निवृत्त अभियंता, मुंबई महानगरपालिका

Third Mumbai: ‘मिठागर, खारफुटी, जलस्रोत नष्ट होणार’; तिसरी मुंबई वादाच्या भोवऱ्यात, थेट मुख्यमंत्र्यांकडे तक्रार

लोकल सुरू झाल्यास फायदे…

• लोकल ट्रेनमुळे रोजच्या प्रवाशांचा वेळ आणि खर्च कमी होईल
• महामार्गावरील वाहतूक ताण कमी होईल
• औद्योगिक गुंतवणूक आणि रोजगार वाढीस मदत होईल
• पर्यटनाला चालना मिळेल
• विद्यार्थ्यांना आणि नोकरदारांना सुरक्षित व स्वस्त प्रवास पर्याय मिळेल