Gondia Bus Accident: ‘शिवशाही’ बस उलटून गोंदियात भीषण अपघात, मृतांचा आकडा वाढला; उपस्थितांचे डोळे पाणावले – gondia shivshahi bus accident 11 people died on the spot death toll feared to increase

भंडारा-गोंदिया ही लाखनी, साकोलीमार्गे जाणारी शिवशाही बस ४० प्रवासी घेऊन निघाली. सडक अर्जुनी-गोंदिया मार्गावरून जात असताना खजरी-डव्वा गावाजवळ दुचाकीला ओव्हरटेक करण्याच्या प्रयत्नांत बसचालकाचे वाहनावरील नियंत्रण सुटले आणि बस उलटली. या धक्क्याने बसमधील काही प्रवासी बाहेर फेकले गेले. यामध्ये ११ प्रवाशांचा जागीच मृत्यू झाला. जखमी प्रवाशांचा आक्रोश कानी पडताच शेजारच्या शेतात काम करीत असलेले शेतकरी आणि शेतमजूर मदतीसाठी धावून आले. यानंतर संपूर्ण गावच घटनास्थळी दाखल झाले. पोलिसांनीही घटनास्थळी धाव घेतली. रुग्णवाहिकांच्या मदतीने जखमींना तातडीने गोंदियाच्या शासकीय रुग्णालयात दाखल करण्यात आले. काही किरकोळ जखमींवर गोरेगाव ग्रामीण रुग्णालय आणि डव्वा प्राथमिक आरोग्य केंद्रात उपचार करून त्यांना घरी सोडण्यात आले. अपघातानंतर बसचालक प्रणय रायपूरकर याने घटनास्थळावरून पळ काढला. अपघाताच्या नेमक्या कारणाचा पोलिसांकडून शोध घेतला जात आहे. या अपघातानंतर गोंदिया-कोहमारा मार्गावरील वाहतूक काही काळ बंद पडली होती.
Gondia Accident : पती गेल्यावर बाळाला सांभाळलं, नोकरीवर जाताना काळाचा घाला, ३२ वर्षीय माऊलीचा करुण अंत

मृतांच्या कुटुंबियांना मदत

मृतांच्या कुटुंबीयांना एसटी महामंडळामार्फत दहा लाख रुपयांची मदत देण्यात येईल, अशी घोषणा राज्याचे काळजीवाहू मुख्यमंत्री एकनाथ शिंदे यांनी जाहीर केली. शिंदे यांनी गोंदियाच्या जिल्हाधिकाऱ्यांशी संपर्क साधून अपघातासंदर्भात माहिती घेतली. ‘अपघातातील सर्व जखमींना त्वरित उपचार मिळावेत, शासकीय खर्चातून उपचार करावेत,’ अशा सूचना त्यांनी जिल्हाधिकाऱ्यांना दिल्या. माजी उपमुख्यमंत्री देवेंद्र फडणवीस यांनी ‘एक्स’वरून शोकसंवेदना व्यक्त केल्या. ‘जखमींना खासगी रुग्णालयात उपचार द्यावे लागले, तरी तातडीने द्या. आवश्यकता भासल्यास नागपूरला पाठवा,’ अशा सूचना त्यांनी जिल्हाधिकाऱ्यांना केल्या.

अरुंद रस्ते अपघातास कारणीभूत

गोंदिया-कोहमारा या राज्य मार्गाच्या रुंदीकरणाला सुमारे तीन वर्षांपूर्वी मंजुरी मिळाली. पण, वन व वन्यजीव कायद्यात काम अडकल्याने रस्त्याचे रुंदीकरण थांबले. परिणामी गोंदिया-मुंडीपारपर्यंत या मार्गाचे रुंदीकरण झाले असले, तरी पुढे कोहमारापर्यंत मार्ग अरुंद आहे. या मार्गावर सतत अपघात होतात.

दहा प्रवाशांची प्रकृती गंभीर

या अपघातात २९ प्रवासी जखमी झाले आहेत. दहांची प्रकृती गंभीर आहे. यामध्ये नैतिक प्रकाश चौधरी (०८) रा. कामठी (नागपूर), श्रीकृष्ण रामदास उके (४७) रा. कोसंबी (भंडारा), शारदा अशोक चव्हाण (६३) रा. नागपूर, पल्लवी प्रकाश चौधरी (३३) रा. कामठी (नागपूर), लक्ष्मी धनराज भाजीपाले (३३) रा. गोंदिया, स्वप्नील सुभाष हेमणे (४०) रा. नागपूर, विद्या प्रमोद मडेकरी (६३) रा. नागपूर, भार्गवी राजेश कडू (१५) रा. नागपूर, धृविका स्वप्नील हेमणे (०६) रा. नागपूर, टिना यशवंत दिघे (१७) रा. सोमलपूर यांचा समावेश आहे. इतर १९ प्रवाशांवर उपचार करून सुट्टी देण्यात आली.