गुजरात विधानसभा निवडणुकीच्या पार्श्वभूमीवर राष्ट्रवादी काँग्रेसने स्टार प्रचारकांची यादी जाहीर केली आहे. त्यात शरद पवार, अजित पवार, जयंत पाटील, सुप्रिया सुळे आदी नेत्यांचा उल्लेख आहे. त्या यादीत कोल्हे यांचे नाव नसल्याने आणि त्यांच्या नाराजीबाबत उलटसुलट चर्चा राजकीय वर्तुळात सुरु झाल्या.
त्या पार्श्वभूमीवर ‘मटा’ने डॉ. कोल्हे यांच्याशी संपर्क साधला असता त्यांनी भूमिका स्पष्ट केली. ‘राष्ट्रवादी काँग्रेसच्या शिर्डीतील शिबिरामध्ये आपल्या दातांच्या समस्येमुळे गैरहजर होतो. त्याशिवाय गुजरातच्या स्टार प्रचारकांच्या यादीत आपण नाही. ती यादी तयार करणे माझ्या हातात कुठे? दिल्ली ऑफिसमधून ही यादी तयार झाली. तो त्यांचा निर्णय आहे,’ असे खासदार डॉ. अमोल कोल्हे यांनी स्पष्ट केले.
केंद्रीय सहकार मंत्री अमित शहा यांना भेटल्यानंतर भाजपमध्ये जाण्याच्या चर्चा सुरु झाल्या, असे विचारता, ‘आपण राष्ट्रवादी काँग्रेसमध्येच आहोत. आपली कोणतीही नाराजी नाही. नाराजी असण्याचे कारण नाही. शिवनेरीवर भगवा ध्वज लावावा. तो आतापर्यंत लावण्यात आला नाही. शिवनेरीवर रोप वे करण्यात यावे अशी मागणी शहा यांच्याकडे भेटी दरम्यान केली.’ असे कोल्हेंनी सांगितले.
हेही वाचा : उद्धव ठाकरेंची गाडी परत ट्रॅकवर आली तर आनंदच, चंद्रकांत पाटलांचं मोठं विधान
माझ्या ‘शिवप्रताप गरुडझेप’ या चित्रपटाचे स्क्रिनिंग हे दिल्लीतील मान्यवर नेत्यांच्या उपस्थित व्हावे अशी आपली इच्छा होती. त्यासाठी यासाठी केंद्रीय सहकारमंत्री अमित शहा यांची वेळ मागितली होती. दिल्लीतील राज्यकर्त्यांना शिवाजी महाराजांबद्दल माहिती व्हावी हा स्वच्छ हेतू होता. त्या भेटीची शरद पवार, अजित पवार यांना माहिती दिली,’ याकडे डॉ. कोल्हे यांनी लक्ष वेधले.
हेही वाचा : राष्ट्रवादीतून शिवसेनेत, मुंबईतील दिग्गज नेत्याच्या कन्येची युवासेना कार्यकारिणीत नियुक्ती
लेखकाबद्दलमुस्तफा आतारमुस्तफा आतार हे ‘महाराष्ट्र टाइम्स’च्या पुणे आवृत्तीत ‘प्रिन्सिपल करस्पॉडंट’ पदावर काम करीत आहेत. त्यांना पत्रकारितेचा २० वर्षांचा अनुभव आहे. प्रभात, लोकसत्ता या वर्तमानपत्रात त्यांनी यापूर्वी काम केले आहे. आरोग्य, जिल्हाधिकारी कार्यालये, विभागीय आयुक्तालय, सरकारी कार्यालये, जिल्हा परिषद विषयांवर ते लेखन करीत आहेत.… आणखी वाचा
