Strict orders from eknath shinde against milk adulterators in meeting with fda tukaram mundhe; तुकाराम मुंढेंच्या उपस्थितीत बैठक, एकनाथ शिंदेंचे भेसळेखोरांबद्दल कडक आदेश

म. टा. विशेष प्रतिनिधी, मुंबई: नागरिकांच्या, विशेषतः लहान मुलांच्या जीवाशी खेळणाऱ्या दूध व दुग्धजन्य पदार्थांतील भेसळखोरांवर संघटित गुन्हेगारी कायद्यांतर्गत गुन्हे दाखल करावेत, अशा सूचना उपमुख्यमंत्री एकनाथ शिंदे यांनी मंगळवारी दिल्या. सह्याद्री अतिथीगृह येथे ‘विकसित महाराष्ट्र २०४७’अंतर्गत सन २०२६-२७साठी विभागनिहाय निश्चित केलेले टप्पे आणि त्यांच्या पूर्ततेसाठी सुरू असलेल्या कार्यवाहीचा आढावा घेण्यासाठी बैठक झाली. या बैठकीत अन्न व औषध प्रशासन विभागाच्या सादरीकरणादरम्यान उपमुख्यमंत्री शिंदे यांनी या सूचना केल्या.

‘अन्नभेसळ हा साधा गुन्हा नसून तो थेट नागरिकांच्या, बालकांच्या जीवाशी खेळ आहे. बनावट पनीर, भेसळयुक्त अन्नपदार्थांमुळे कर्करोगासारख्या दुर्धर आजारांना सामोरे जावे लागू शकते. भेसळखोर समाजकंटकांवर ‘मकोका’अंतर्गत कारवाई करून त्यांच्यावर जरब बसवावी,’ असे एकनाथ शिंदे म्हणाले.

भेसळखोरांवर कारवाई करताना त्यांच्यावर अजामीनपात्र गुन्हे दाखल करावेत, जेणेकरून त्यांना कायदेशीर पळवाटा मिळणार नाहीत, असेही त्यांनी सांगितले. अशा प्रकरणांतील कायदेशीर प्रक्रिया अधिक बळकट करण्यासाठी विशेष पावले उचलण्याच्या सूचनाही त्यांनी दिल्या. कोणतीही कायदेशीर त्रुटी राहू नये, यासाठी ज्येष्ठ विधिज्ञांची मदत घ्यावी, यासाठी तातडीने विशेष कायदेशीर पथक तयार करावे, असे निर्देशही शिंदे यांनी दिले.

बैठकीस आरोग्यमंत्री प्रकाश आबिटकर, विधी व न्याय राज्यमंत्री आशीष जयस्वाल, गृह, अन्न व औषध प्रशासन राज्यमंत्री योगेश कदम, एफडीए आयुक्त तुकाराम मुंढे उपस्थित होते.

खतांच्या ‘लिंकिंग’ची येथे करा तक्रार

इतर युरिया, डीएपी किंवा खतांसोबत अनावश्यक कृषी साहित्याचे सक्तीने ‘लिकिंग’ करून त्यांची खरेदी करण्यास शेतकऱ्यांना भाग पाडणे हे बेकायदा आहे. असा प्रकार आढळल्यास शेतकऱ्यांनी कृषी विभागाच्या टोल फ्री क्रमांक १८००२३३४००० किंवा ९८२२४४६६५५ वर तक्रार करावी. लिंकिंगमध्ये वितरक, विक्रेते किंवा उत्पादकांची हातमिळवणी आढळल्यास थेट गुन्हे दाखल करण्याचे निर्देश कृषी राज्यमंत्री आशीष जयस्वाल यांनी दिले आहेत.