सोशल मिडियावरील जाहिरात पडली महागात, पोलिसालाच ५५ लाखांचा ऑनलाईन गंडा| Maharashtra Times

या प्रकरणात फसवणूक झालेले ५४ वर्षीय पोलिस कर्मचारी खारघरमध्ये कुटुंबासह राहण्यास आहेत. ते मुंबई पोलिस दलात संरक्षण शाखेत कार्यरत आहेत. १५ जानेवारी रोजी त्यांना फेसबुकवर १८ हजार रुपये गुंतवल्यास दररोज १२०० रुपयांचा नफा मिळेल, अशी उद्योगपती मुकेश अंबानी यांच्या नावाने गुंतवणुकीबाबतची जाहिरात निदर्शनास आली. या पोलिसाने त्या जाहिरातीतील लिंकवर जाऊन आपला मोबाइल क्रमांक नोंदवला. त्यानंतर सायबर टोळीतील आशिष मिश्रा नावाच्या व्यक्तीने फिनब्रिज कॅपिटल या कंपनीचा सल्लागार असल्याचे भासवून त्यांच्याशी संपर्क साधला. त्यांना २२ हजार रुपये गुंतवणुकीवर चांगला नफा मिळेल, असे सांगितले.
Pune Fraud News : मॅट्रिमोनियल साईटवर ओळख, ऑस्ट्रेलियाहून पुण्यात राहायला, घटस्फोटित महिलेच्या 5 कोटींच्या पोटगीवर डोळा, पोलिसांनी प्रकरण कसं बाहेर काढलं?
सुरुवातीला पोलिसाने क्रेडिट कार्डद्वारे १९,५०० रुपये गुंतवले. त्यानंतर सायबर टोळीने त्याला दररोज नफ्याचे बनावट स्क्रीनशॉट पाठवून त्यांचा विश्वास संपादन केला. त्यानंतर सायबरचोरांनी सांगितल्यानुसार गुंतवणुकीच्या दुसऱ्या प्लॅनमध्ये टप्प्याटप्प्याने विविध बँक खात्यांवर ३ लाख ५० हजार रुपये भरले. या गुंतवणुकीवर या पोलिसाला ८३ लाख ९६ हजार रुपये नफा झाल्याचे वेबपेजवर दाखवण्यात आले. त्यानंतर सायबर टोळीने या पोलिसाला सेबीच्या बनावट ईमेल आयडीवरून पाठवून विविध कारणे सांगून आणखी पैशांची मागणी केली.

त्यानुसार या पोलिसाने पैसे पाठवले. सायबर टोळीकडून त्यांना बार्कलेस बँकेच्या नावाने बनावट पावत्या पाठवण्यात येत होत्या. त्यानंतर या पोलिसाने सायबर टोळीवर विश्वास ठेवून त्यांच्या व मुलाच्या खात्यांमधून एकूण ५५ लाख ६५ हजार रुपये पाठवून दिले. मात्र त्यानंतरही त्यांना रक्कम परत न मिळाल्याने शेवटी त्यांनी २३ जून रोजी एनसीसीआरपी पोर्टलवर तक्रार दाखल केली. त्यानंतर त्यांनी सायबर पोलिस ठाण्यात तक्रार दिली.