रोहितबद्दल चिंता नाही! इंग्लंडविरुद्ध तिसऱ्या वनडेपूर्वी हिटमॅनवर कोचने विश्वास दाखवला, 2027 वर्ल्डकपबाबत काय म्हणाले?

रोहितबद्दल कोणतीही काळजी नाही

तिसऱ्या आणि निर्णायक सामन्यापूर्वी आयोजित पत्रकार परिषदेत बोलताना मोर्ने मोर्कल म्हणाले की, नवीन चेंडूने फलंदाजी करणे सोपे नसते. संपूर्ण मालिकेत चेंडू खूप मूव्ह होत असल्याचे आपण पाहिले आहे, त्यामुळे सुरुवातीला फलंदाजी करणे आव्हानात्मक असते. परंतु, रोहितने यापूर्वीही अशा परिस्थितीमध्ये धावा केल्या आहेत. तो अत्यंत अनुभवी खेळाडू असून आम्हाला त्याच्या कामगिरीबद्दल किंवा फॉर्मबद्दल कोणतीही काळजी नाही, असे सांगत त्यांनी रोहितला पाठिंबा दिला.

Kapil Dev : उलट आपण आनंदी झालं पाहिजे! रोहित शर्माच्या रिटायरमेंटच्या चर्चांदरम्यान कपिल देव यांच्या वक्तव्याने वेधलं लक्ष

लॉर्ड्सच्या मैदानावर संयम आवश्यक

मोर्कल यांनी भारतीय फलंदाजांना सल्ला दिला की, लॉर्ड्सच्या आव्हानात्मक खेळपट्टीवर सुरुवातीला संयम बाळगणे अत्यंत आवश्यक असेल. नुकत्याच झालेल्या सामन्यांमध्ये लॉर्ड्सची खेळपट्टी थोडी कठीण राहिली आहे. त्यामुळे फलंदाजांनी सुरुवातीला ५-१० चेंडू अतिरिक्त खेळून खेळपट्टीचा वेग आणि उसळी समजून घेतली पाहिजे. आमचे टॉप आणि मिडल ऑर्डरचे फलंदाज अनुभवी असून भागीदारी कशी करायची हे त्यांना चांगले ठाऊक आहे, असे मोर्कल म्हणाले.

२०२७ च्या विश्वचषकावर भाष्य

दुसऱ्या सामन्यात भारताचा मध्यक्रम अपयशी ठरल्याने संघ २३३ धावांवर आटोपला होता आणि इंग्लंडने सामना जिंकला होता. यावर बोलताना मोर्कल यांनी मधल्या षटकांमध्ये विकेट घेणे महत्त्वाचे असल्याचे सांगितले. तसेच, आपल्या भविष्याबाबतच्या चर्चांदरम्यान मोर्कल यांनी २०२७ च्या वनडे विश्वचषकाबाबत मोठे संकेत दिले. हा विश्वचषक दक्षिण आफ्रिकेत होणार असून मी तिथे २० वर्षे क्रिकेट खेळलो असल्याने तिथल्या परिस्थितीचा पूर्ण फायदा भारतीय संघाला मिळवून देण्यासाठी कटिबद्ध असल्याचे त्यांनी स्पष्ट केले.