वाळपई : सावर्डे ग्रामपंचायत क्षेत्रातील तोणीर-काजरेद्या येथील धबधब्यावर ट्रेकिंगसाठी आलेल्या राहुल बिंद (वय १७, रा. बायणा, वास्को) या विद्यार्थ्याचा पाण्यात बुडून बेपत्ता झाल्याची दुर्दैवी घटना शुक्रवारी घडली. या घटनेमुळे परिसरात खळबळ उडाली असून वन खाते, पोलीस आणि स्थानिक नागरिकांकडून युद्धपातळीवर शोधमोहीम सुरू आहे.
प्राप्त माहितीनुसार, वास्को येथील एका महाविद्यालयातील सुमारे ४० विद्यार्थी आपल्या शिक्षकांसह ट्रेकिंगसाठी तोणीर-काजरेद्या येथील धबधब्यावर आले होते. संबंधित धबधबा परिसरात प्रवेश करण्यास बंदी असतानाही काही विद्यार्थ्यांनी वन खात्याच्या कर्मचाऱ्यांची नजर चुकवून धबधब्याकडे धाव घेतली.
यावेळी राहुल बिंद हा पाण्यात उतरला असता अचानक तो खोल पाण्यात जाऊन बुडाला. त्यानंतर त्याचा शोध घेण्याचा प्रयत्न करण्यात आला; मात्र तो सापडला नाही. घटनेची माहिती मिळताच वाळपई पोलीस स्थानकाचे अधिकारी व कर्मचारी, वन खात्याचे कर्मचारी तसेच स्थानिक नागरिक घटनास्थळी दाखल झाले असून राहुलचा शोध सुरू आहे.
दरम्यान, मुसळधार पावसामुळे धबधब्यातील पाण्याचा प्रवाह आणि पाण्याची पातळी वाढल्याने शोधकार्यात अडथळे निर्माण होत असल्याची माहिती मिळत आहे. परिस्थिती लक्षात घेऊन बचाव पथके अत्यंत दक्षतेने शोधमोहीम राबवत आहेत.
वन विभागाने यापूर्वीच या धबधबा परिसरात पर्यटकांच्या सुरक्षेच्या दृष्टीने प्रवेशबंदी लागू केली असून, पावसाळ्यात धबधबे, ओढे आणि नद्यांमध्ये पाण्याचा वेग व खोलीचा अचूक अंदाज येत नसल्याने अशा ठिकाणी जाणे टाळावे, असे आवाहन प्रशासनाकडून वारंवार करण्यात येत आहे.
या घटनेमुळे पावसाळी पर्यटनादरम्यान सुरक्षा नियमांचे काटेकोर पालन करणे किती आवश्यक आहे, याची पुन्हा एकदा जाणीव झाली आहे. बेपत्ता राहुल बिंद याचा शोध सुरू असून अधिकृत माहितीची प्रतीक्षा आहे.
