फडणवीसांच्या बाजूला बसले, शिंदेंच्या कार्यालयात भेट; विधानभवनात शरद पवार येताच काय घडलं? – ncp leader sharad pawar at vidhan bhawan for meeting on maharashtra karnataka border issue

राष्ट्रवादी काँग्रेस पक्षाचे (शरदचंद्र पवार) राष्ट्रीय अध्यक्ष शरद पवार हे तब्बल ३४ वर्षांनंतर महाराष्ट्र विधानमंडळाच्या अधिवेशन काळात मुंबईतील विधानभवनात दाखल झाले. शरद पवार येणार म्हणून आमदारांची एकच लगबग विधानभवन परिसरात पाहायला मिळाली. शरद पवार येणार असल्याच्या बातमीने विधानभवनात सकाळपासूनच कमालीची लगबग सुरू होती. ते आवारात दाखल होताच राष्ट्रवादी काँग्रेस (शरदचंद्र पवार) पक्षाच्या सर्व आमदारांनी आणि कार्यकर्त्यांनी त्यांचे जंगी स्वागत केले. महाविकास आघाडीच्या इतर नेत्यांनीही त्यांची भेट घेतली. अधिकाऱ्यांची धावपळ आणि आमदारांची झालेली गर्दी यांमुळे काही काळ संपूर्ण विधानभवनाचे लक्ष केवळ शरद पवार यांच्यावरच केंद्रित झाले होते. शरद पवार विधानभवनात येण्याचे मुख्य कारण म्हणजे महाराष्ट्र-कर्नाटक सीमावादावर चर्चा करण्यासाठी बोलावण्यात आलेली उच्चाधिकार समितीची अत्यंत महत्त्वाची बैठक. मुख्यमंत्री देवेंद्र फडणवीस यांच्या अध्यक्षतेखाली विधानभवनात ही बैठक पार पडली. आगामी काळात या प्रदीर्घ सीमाप्रश्नावर सर्वोच्च न्यायालयात अंतिम सुनावणी होण्याची शक्यता असल्याने, महाराष्ट्राची बाजू कायदेशीररीत्या कशी भक्कमपणे मांडायची, याची रणनीती आखण्यासाठी या बैठकीचे आयोजन करण्यात आले होते. शरद पवार हे सीमाप्रश्नाचे अभ्यासक आणि राज्याचे ज्येष्ठ नेते असल्याने या समितीचे सदस्य म्हणून ते या बैठकीला उपस्थित राहिले.