कमी बजेटमध्ये ॲपलचा अनुभव घेण्यासाठी अनेक ग्राहक जुना आयफोन खरेदी करण्यास प्राधान्य देतात. मात्र, योग्य माहितीअभावी बाजारात बनावट किंवा चोरीचे फोन विकले जाण्याची शक्यता असते. त्यामुळे आयफोन घेण्यापूर्वी आयक्लाउड लॉक, ओरिजिनल बिल आणि आयएमईआय नंबर यांसारख्या गोष्टी बारकाईने तपासणे अत्यंत आवश्यक आहे. चला तर मग याविषयीची माहिती ही जाणून घेऊया.
बाजारात सध्या अनेक बनावट, चोरीचे किंवा नादुरुस्त आयफोन्स विकले जाण्याचे प्रमाण वाढले आहे. त्यामुळे जुना आयफोन खरेदी करताना पुढील 10 महत्त्वाच्या गोष्टींची पडताळणी करणे अत्यंत आवश्यक आहे, ज्यामुळे तुमचे पैसे सुरक्षित राहतील.
जुना आयफोन घेताना तपासावयाच्या 10 महत्त्वाच्या गोष्टी
1. आयक्लाउड ॲक्टिव्हेशन लॉक
फोन चालू केल्यावर तो आधीच्या मालकाच्या ॲपल आयडीने (Apple ID) लॉक केलेला नाही ना, याची खात्री करा. जर ‘Find My iPhone’ चालू असेल किंवा ॲक्टिव्हेशन लॉक दिसत असेल, तर तो फोन अजिबात खरेदी करू नका. कारण मूळ मालकाच्या पासवर्डशिवाय हा फोन अनलॉक होऊ शकत नाही आणि तो चोरीचा असण्याची शक्यता जास्त असते.
2. ओरिजिनल बिल आणि बॉक्स
फोन खरेदी करताना त्याचे मूळ खरेदी बिल, IMEI नंबर जुळणारा बॉक्स आणि मूळ चार्जर नक्की मागून घ्या. बिल असल्यामुळे फोन चोरीचा नसल्याची खात्री पटते आणि भविष्यात गरज पडल्यास अधिकृत सर्व्हिस सेंटरमध्ये काम करणे सोपे होते.
3. IMEI नंबर तपासणे
आयफोनच्या डायल पॅडवर *#06# डायल करून किंवा ‘Settings > General > About’ मध्ये जाऊन IMEI नंबर तपासा. हा नंबर ॲपलच्या अधिकृत वेबसाईटवर किंवा सेंट्रल इक्विपमेंट आयडेंटिटी रजिस्टर (CEIR) पोर्टलवर टाकून फोन ब्लॅकलिस्टेड किंवा ब्लॉक केलेला नाही ना, याची पडताळणी करा.
4. बॅटरी हेल्थ
‘Settings > Battery > Battery Health’ मध्ये जाऊन बॅटरीची क्षमता तपासा. जर बॅटरी हेल्थ 80 टक्के पेक्षा कमी असेल, तर ती बॅटरी लवकरच बदलावी लागेल. अशा वेळी फोनच्या किमतीवर घासाघीस करणे किंवा तो फोन न घेणेच फायद्याचे ठरते.
5. डिस्प्ले आणि ट्रू टोन फीचर
आयफोनचा डिस्प्ले ओरिजिनल आहे की अनधिकृत सेंटरवरून बदलला आहे, हे तपासण्यासाठी ‘True Tone’ फिचर तपासा. ‘Settings > Display & Brightness’ मध्ये जाऊन ट्रू टोन चालू होते का ते पहा. जर हे फिचर काम करत नसेल, तर स्क्रीन डुप्लिकेट असण्याची दाट शक्यता असते.
6. पार्ट आणि सर्व्हिस हिस्ट्री
आयफोनमधील iOS 15 आणि त्यावरील व्हर्जनमध्ये ‘Settings > General > About’ मध्ये गेल्यास फोनचे कोणते पार्ट (उदा. कॅमेरा, बॅटरी, डिस्प्ले) बदलले आहेत की नाही, याची माहिती मिळते. तिथे ‘Unknown Part’ लिहून आल्यास तो भाग अनधिकृतपणे बदलला गेला आहे हे स्पष्ट होते.
7. कॅमेरा टेस्ट
आयफोन त्याच्या उत्कृष्ट कॅमेऱ्यासाठी ओळखला जातो. जुन्या फोनचे सर्व लेन्स (वाईड, अल्ट्रा-वाईड, टेलिफोटो) तपासा. फोटो काढून पहा, व्हिडिओ रेकॉर्ड करा आणि ऑटो-फोकस तसेच स्टेबिलायझेशन व्यवस्थित काम करत असल्याची खात्री करा.
8. नेटवर्क आणि सिम लॉक
फोन ‘Carrier Locked’ नाही ना, हे पाहण्यासाठी ‘Settings > General > About > Carrier Lock’ तपासा. तिथे ‘No SIM restrictions’ असायला हवे. तसेच स्वतःचे सिम कार्ड किंवा ई-सिम (eSIM) टाकून कॉलिंग, मोबाईल डेटा आणि 5G नेटवर्क चालवून पहा.
9. बायोमेट्रिक सिक्युरिटी
फोनचे फेस आयडी (Face ID) किंवा टच आयडी (Touch ID) व्यवस्थित काम करत आहे का, हे स्वतःचा चेहरा किंवा अंगठा सेट करून तपासा. अनेकदा वॉटर डॅमेज किंवा स्क्रीन बदलल्यामुळे ही फिचर्स कायमची बंद पडतात, जी नंतर दुरुस्त करणे अत्यंत खर्चिक असते.
10. फिजिकल डॅमेज आणि पोर्ट्स
फोनवर कुठे मोठे ओरखडे, क्रॅक्स किंवा डेंट आहेत का ते बारकाईने पहा. चार्जिंग पोर्ट, हेडफोन जॅक (असल्यास) आणि स्पीकर ग्रिलमध्ये कचरा नाही ना आणि ते व्यवस्थित काम करत आहेत ना, याची चार्जिंग केबल लावून पडताळणी करा.
लेखकाबद्दलशुभम कुलकर्णीशुभम कुलकर्णी हे गेल्या नऊ वर्षांहून अधिक काळ मुख्य प्रवाहातील माध्यम क्षेत्रात सक्रिय असलेले एक व्यासंगी पत्रकार आहेत. सध्या ते ‘महाराष्ट्र टाईम्स’च्या ‘टेक आणि सायन्स’ विभागात कन्सल्टंट म्हणून आपली जबाबदारी सांभाळत आहेत. तंत्रज्ञान विश्वातील वेगाने बदलणारे आर्टिफिशियल इंटेलिजन्स (AI) चे प्रगत तंत्रज्ञान, नवनवीन गॅझेट्स, टेक ट्रेंड्स, स्मार्टफोन रिव्ह्यूज आणि सायन्स क्षेत्रातील क्लिष्ट वैज्ञानिक घडामोडी अतिशय सोप्या, सर्वसामान्यांना समजेल अशा रंजक भाषेत मांडण्यात त्यांचा विशेष हातखंडा आहे. डिजिटल मीडियातील अचूक SEO आणि Google Discover च्या बदलत्या अल्गोरिदमचा वापर करून लाखो वाचकांपर्यंत तांत्रिक माहिती पोहोचवण्यात त्यांचा मोलाचा वाटा आहे.
छत्रपती संभाजीनगर येथील नामांकित ‘MGM’ संस्थेतून ‘एम.ए. पत्रकारिता आणि जनसंवाद’ ही मास्टर पदवी संपादन केल्यानंतर, त्यांनी आपल्या कारकिर्दीची सुरुवात ‘आकाशवाणी’ या प्रतिष्ठित संस्थेतून केली. 2017 मध्ये त्यांनी ‘दैनिक सामना’ या अग्रगण्य मुखपत्रात प्रवेश करत वृत्तपत्र पत्रकारितेचा भक्कम पाया रचला. त्यानंतर मुंबईतील ABP माझा, TV9 मराठी, साम TV, पुढारी न्यूज चॅनेल आणि लोकशाही न्यूज या महाराष्ट्रातील आघाडीच्या वृत्तवाहिन्यांमध्ये ‘बुलेटिन प्रोड्यूसर’ म्हणून जबाबदारी सांभाळली आहे. राजधानी दिल्ली येथे ‘News Nation Marathi’ साठी राष्ट्रीय आणि आंतरराष्ट्रीय स्तरावरील वेगवेगळ्या न्यूज बुलेटिन्सचा दांडगा अनुभव त्यांच्या पाठीशी आहे.
प्रिंट, इलेक्ट्रॉनिक आणि डिजिटल मीडियाच्या सखोल अनुभवामुळे राजकारण, व्यापार-उद्योग, विज्ञान, तंत्रज्ञान, ऑटोमोबाईल, सायबर सुरक्षा आणि लाइफस्टाईल क्षेत्रातील गुंतागुंतीच्या विषयांचे अचूक विश्लेषण करणे ही त्यांची प्रमुख ओळख आहे. पत्रकारितेच्या या व्यस्त प्रवासातून वेळ काढत, निसर्गाच्या सानिध्यात वेळ घालवणे हा त्यांचा छंद आहे.… आणखी वाचा