N Chandrasekaran Success Story; छोट्या गावातील शेतकरी कुटुंबात जन्मलेला मुलगा, इंटर्नशिपसाठी आले अन् टाटांचे झाले; फक्त पैसा नाही, तर देशाचं भविष्य उभं केलं

एन. चंद्रशेखरन तब्बल नऊ वर्षांनंतर टाटा सन्सच्या अध्यक्षपदावरून पायउतार झाले आणि यासह टाटा समूहातील जवळपास चार दशकांच्या कारकिर्दीचा शेवट झाला. 1963 मध्ये तामिळनाडूतील नामक्कलजवळील मोहनूर या छोट्या गावात जन्मलेल्या चंद्रशेखरन यांनी टाटा समूहात प्रशिक्षणार्थी म्हणजे इंटर्न प्रोग्रामर म्हणून कारकिर्दीला सुरुवात केली आणि 1987 मध्ये पूर्णवेळ कर्मचारी म्हणून रुजू झाले.

चंद्रशेखरन यांनी सुरुवातीपासून आपली संपूर्ण कारकीर्द टाटा ग्रुपमध्ये घालवली. यादरम्यान, त्यांनी जवळपास 10 वर्षे भारताबाहेर अमेरिका, ब्रिटन आणि स्वीडनमध्ये टाटा ग्रुपसाठी काम केले. त्यानंतर TCS या भारतातील दिग्गज आयटी कंपनीतील आपला सहभाग वाढवला आणि कंपनीमध्ये हळूहळू स्थान उंचावले. आपल्या नेतृत्व कौशल्याने टाटा ग्रुपचे तत्कालीन प्रमुख रतन टाटांना प्रभावित केले. 2009 मध्ये चंद्रशेखरन यांच्या कारकिर्दीतील महत्त्वाचा टप्पा आला, जेव्हा टीसीएसचे सीईओ आणि व्यवस्थापकीय संचालक बनले. त्यांनी आठ वर्षे पदभार सांभाळला आणि या काळात ही आयटी सेवा कंपनी जगातील आघाडीच्या तंत्रज्ञान व सल्लागार कंपन्यांपैकी बनली.

रतन टाटांनी ऑक्टोबर 2016 मध्ये चंद्रशेखरन यांना टाटा सन्सच्या संचालक मंडळात सामील करून घेतले आणि काही महिन्यांनी जानेवारी 2017 मध्ये सायरस मिस्त्रीं च्या जागी त्यांची अध्यक्षपदी नियुक्ती झाली. या काळात रतन टाटा आणि सायरस मिस्त्री यांच्यातील वाद माध्यमांच्या केंद्रस्थानी राहिला.

टाटा समूहामध्ये बरीच अटकळ आणि तर्कवितर्क सुरू असताना चंद्रशेखरन टाटा सन्सच्या अध्यक्षपदावर विराजमान होणारे पहिले बिगर-पारशी व्यक्तिमत्व होते. चंद्रशेखरन यांच्या पहिल्या कार्यकाळाचा मोठा भाग मिस्त्री अँड कंपनीसोबत समूहाच्या प्रदीर्घ कायदेशीर लढाईतच गेला. एका टप्प्यावर NCLAT ने त्यांची नियुक्ती बेकायदेशीर घोषित केली आणि मिस्त्रींना सर्वोच्च पदावर पुन्हा नियुक्त करण्याचे आदेश दिलेले पण, नंतर सर्वोच्च न्यायालयाने निर्णय रद्द केला.

1984 मध्ये एन चंद्रशेखरन यांनी कोयंबतूर इन्स्टिट्यूट ऑफ टेक्नॉलॉजीमधून उपयोजित विज्ञान शाखेतील विज्ञान स्नातक पदवी पूर्ण केली. त्यानंतर 1986 मध्ये आता NIT त्रिची म्हणून ओळखले जाणारे प्रादेशिक अभियांत्रिकी महाविद्यालय येथून संगणक अनुप्रयोग शाखेतील पदव्युत्तर पदवी घेतली.

टाटा ग्रुपमधील आपल्या कार्यकाळात चंद्रशेखरन यांनी मीठापासून सॉफ्टवेअर आणि ऑटोमोबाईलपर्यंत सर्व गोष्टींचे उत्पादन करणाऱ्या टाटा समूहाला पूर्णपणे नवे स्वरूप दिले. विमानचालन, सेमीकंडक्टर, इलेक्ट्रॉनिक्स आणि डिजिटल प्लॅटफॉर्म यांसारख्या भविष्यवेधी उद्योगांमध्ये टाटा समूहाचा विस्तार केला तर, आता काही महिन्यांतच त्यांचा कार्यकाळ संपणार असताना चंद्रशेखरन यांच्या कार्यकाळानंतर सुमारे 40 वर्षांनी टाटा समूहाची उलाढाल 400 अब्ज डॉलर्सवर पोहोचली आहे.