युरोप सध्या आतापर्यंतच्या सर्वात तीव्र उष्णतेच्या झळांनी होरपळत आहे, ज्यामुळे तापमान विक्रमी उच्चांकावर पोहोचले आहे. परिणामी, मृत्यू आणि रुग्णालयात दाखल होणाऱ्यांच्या संख्येत वाढ होत असून, वैद्यकीय सुविधांवर प्रचंड ताण येत आहे.
युरोपातील उष्णतेच्या तीव्रतेची झलक दाखवणारे अनेक व्हिडिओ सध्या सोशल मीडियावर समोर व्हायरल होत आहेत, या व्हिडिओत स्पष्ट दिसत आहे की, तेथील उष्णता इतकी प्रखर आहे की लोक बाहेर ठेवलेल्या तव्यांवर अन्न शिजवू शकतात.
व्हायरल झालेल्या एका व्हिडिओत उन्हात ठेवलेल्या तव्यांवर अंडी किंवा बेकन फोडून ते काही मिनिटांतच शिजवल्याचे दिसत आहे. जर्मनीतील स्थानिक वृत्तांनुसार, उष्णतेमुळे ट्रामचे रूळ वितळल्याचे काही फोटो आणि व्हिडिओमध्ये दिसत होते. यामुळे आठवड्याच्या अखेरीस जर्मनीच्या लाइपझिग शहरात ट्राम धावल्या नाहीत, असे DW ने वृत्त दिले आहे.
🚨 Europe is in the grip of a historic heatwave
– WHO links 1,300+ excess deaths to the extreme heat since 21 June
– Germany hit 41.7°C, Poland 40.5°C, and the Czech Republic 41.1°C
– France alone has reported around 1,000 excess deaths#Europe #heatwave #Germany pic.twitter.com/V1mBrC824Q
— GlobeUpdate (@Globupdate) June 29, 2026
चॉकलेट्स आणि खाद्यपदार्थ वितळले
सोशल मीडियावर व्हायरल झालेल्या काही व्हिडिओंमध्ये एका दुकानामध्ये चॉकलेट्स आणि इतर खाद्यपदार्थ वितळताना, उन्हात ठेवलेली शॉपिंग कार्ट वितळताना, बूट वितळताना, टांगलेली केळी सालींविना गळून पडताना दिसते. युरोपातील धक्कादायक आणि प्रचंड मोठ्या संकटाची नांदी असल्याचे चित्रच या व्हिडिओतून समोर आले आहे.
काही दृश्यांमध्ये बर्लिन पोलीस पाण्याचे फवारे वापरत असल्याचे आणि रहिवासी थंड होण्यासाठी त्यात अंघोळ करत असल्याचेही दिसून आले.
जागतिक आरोग्य संघटनेचे प्रमुख टेड्रोस अधानोम गेब्रेयसस यांनी शनिवारी सांगितले की, युरोप हा “पृथ्वीवरील सर्वात वेगाने उष्ण होणारा खंड” आहे आणि तो जागतिक सरासरीच्या दुप्पट वेगाने तापत आहे. “सध्या १५ कोटी लोक तीव्र उष्णतेखाली जगत आहेत, शेकडो लोकांचा मृत्यू झाला आहे, शाळा बंद आहेत, आणि वीजपुरवठा यंत्रणा कोलमडत आहे,” असे ते म्हणाले. त्यांनी पुढे सांगितले की, २१ जूनपासून युरोपमधील उच्च तापमानामुळे १,३०० हून अधिक अतिरिक्त मृत्यूंची नोंद झाली आहे.
युरोपातील हे देश आणखी तापणार
“उष्णतेच्या ताणाला अनेकदा ‘मूक मारेकरी’ म्हटले जाते – आणि युरोपमधील घरे, कामाची ठिकाणे आणि शाळा या तापमानासाठी बांधलेली नव्हती,” असे त्यांनी X वर लिहिले. आठवड्याच्या अखेरीस चेक प्रजासत्ताक, जर्मनी आणि पोलंडमध्ये अनुक्रमे ४१.९ अंश सेल्सिअस, ४१.७ अंश सेल्सिअस आणि ४०.५ अंश सेल्सिअस तापमानाची नोंद झाली.
पॅरिसमधील शवागृहे खचाखच भरली
मिळालेल्या माहितीनुसार फ्रेंच आरोग्य अधिकाऱ्यांनी रविवारी सांगितले की, गेल्या आठवड्यातील बुधवारपासून, वर्षाच्या या वेळेस नेहमीपेक्षा सुमारे १,००० अधिक मृत्यू झाले आहेत.
नॅशनल फ्युनरल फेडरेशनच्या एलिझाबेथ कॅरियर यांनी सांगितले की, देशभरात अंत्यसंस्कार गृहांमधील जागांची उपलब्धता ६० टक्क्यांहून अधिक झाली आहे, तर उन्हाळ्यात हे प्रमाण साधारणपणे ३० ते ४५ टक्क्यांच्या दरम्यान असते, असे वृत्तसंस्था एएफपीने म्हटले आहे.
“मुख्य अडचण मध्य पॅरिसमध्ये आहे, जिथे एकमेव दोन अंत्यसंस्कार गृहे गेल्या शुक्रवारपासून पूर्ण क्षमतेने भरलेली आहेत,” असे शॅरियर म्हणाले.
“लोकांना जागा शोधण्यासाठी आणि श्रद्धांजली वाहण्यासाठी पॅरिसच्या बाहेर – शहराच्या आतील किंवा बाहेरील उपनगरांमध्ये, किंवा त्याहूनही दूर जावे लागेल,” असे सांगून त्यांनी येऊ घातलेल्या “डोमिनो इफेक्ट”बद्दल इशारा दिला.
“दहनविधीसाठी किंवा दफनभूमीतील जागेसाठी प्रतीक्षा कालावधी वाढल्याने परिस्थिती अधिक गुंतागुंतीची होऊ शकते. दफनभूमीतील कर्मचारी अधिक वेगाने कबरी खोदू शकत नाहीत आणि दहनविधीच्या जागा खूप लवकर भरून जातात,” असे त्या म्हणाल्या.
युक्रेनमध्ये वीज कपात
रशियासोबत सुरू असलेल्या युद्धामुळे पायाभूत सुविधांचे नुकसान झाल्याने आधीच त्रस्त असलेल्या युक्रेनला सोमवारी आणखी एक धक्का बसला, कारण उष्णतेमुळे देशाच्या वीज यंत्रणांवर परिणाम झाला.
युक्रेनच्या पश्चिम रिव्हने प्रदेशात तापमान वाढल्याने वीज वितरण प्रणालीवरील ताण कमी करण्यासाठी आपत्कालीन वीजपुरवठा खंडित करण्याचे आदेश देण्यात आले.
युक्रेनमधील पाच प्रदेशांतील कुटुंबे आणि व्यवसायांना सोमवारी इशारा देण्यात आला की, मंगळवारी वीजपुरवठा खंडित होऊ शकतो.
