Crime News : सासऱ्याचा जावयासोबत वाद, रागाचा पारा चढला अन् भयंकर घडलं; गडचिरोलीत खळबळ – gadchiroli crime news son in law killed father in law over small disputes

मद्यपान केलेल्या सासऱ्याचा जावयासोबत वाद

पोलिसांनी दिलेल्या माहितीनुसार, मयताची मुलगी आणि जावई कर्नाटकात राहायचे. ते मागील काही दिवसांपूर्वी महागाव येथे आले होते. १४ जून रोजी सासरे रमेश दुर्गे यांनी दारूच्या नशेत आपला जावई चंद्रशेखर पवार यांच्यासोबत ‘तुम्ही इथे कशाला आले?’ असा सवाल करत वाद घातला. त्या दोघांमध्ये यावेळी कडाक्याचं भांडण झालं.

रागाच्या भरात जावई चंद्रशेखर पवार याने सासऱ्याला मारायला सुरुवात केली. जावई चंद्रशेखरची पत्नी आपल्या वडील आणि पतीमध्ये सुरू असलेलं भांडण सोडवायला गेली. मात्र जावयाने रागाच्या भरात लाथा बुक्क्याने सासऱ्याचा डोळ्यावर, छातीवर, पाठीवर, तोंडावर बेदम मारहाण केली. यात सासरा रस्त्याच्याकडेला पडला. त्यानंतर सुद्धा जावयाने मारहाण केल्याने सासऱ्याचा यात मृत्यू झाला.

सासऱ्याचे त्याच्या पत्नीसोबत सतत वाद

सासरा मृत रमेश दुर्गे याचा आपल्या पत्नीसोबत नेहमीच वाद व्हायचा. यापूर्वी झालेल्या पती-पत्नीच्या वादात रमेशची पत्नी माया गंभीर जखमी झाली होती. त्यावेळी सासऱ्यावर पत्नीला मारहाण केल्याने त्याच्यावर गुन्हा देखील दाखल होता. मृत रमेश दुर्गे हा पत्नीवर संशय घ्यायचा यातून नेहमीच वाद व्हायचे अशी माहिती समोर येत आहे. दरम्यान मागील काही वर्षांपूर्वी चंद्रशेखर पवार याचा सासरा रमेश दुर्गे यांच्या मुलीशी प्रेमविवाह झाला होता. नुकतंच काही दिवसांपूर्वी जावई आणि मुलगी महागावला आले होते.

वादानंतर मारहाणीत सासऱ्याचा मृत्यू

१४ जून रोजी रमेश दुर्गे यांनी मद्यपान करून घरी वाद घातला होता. त्याच दरम्यान बाहेरून घरी आलेल्या जावयासोबत देखील त्यांनी वाद घातला. त्यात जावयाने सासऱ्याला केलेल्या मारहाणीत सासऱ्याचा जीव गेला. तालुका मुख्यालयपासून अवघ्या ७ किलोमीटरवर ही घटना घडल्याने परिसरात एकच खळबळ उडाली आहे. अहेरी पोलिसांनी घटनास्थळ गाठत आरोपीला ताब्यात घेतलं असून या घटनेचा पुढील तपास ठाणेदार हर्षल एकरे करत आहेत.