Bhandara Teacher Ends Life: भंडाऱ्यातील एक शिक्षक शाळेत जायला घरातून निघाला, पण तो पोहोचलाच नाही. त्यानंतर जंगलात त्याचा मृतदेह सापडून आला आणि परिसरात एकच खळबळ माजली.
भंडारा तहसीलमधील मानेगाव (बाजारपेठ) येथील चैतन्य विद्यालयात काम करणाऱ्या या शिक्षकाने झाडाला दोरीने गळफास घेऊन आपल्या आयुष्याची अखेर केली. ही घटना सोमवारी 11 ऑगस्ट रोजी दुपारी 12.30 वाजता उघडकीस आली. मृत शिक्षकाचे नाव रमेश शामराव पंचबुद्धे (वय वर्ष 44) असं असल्याची माहिती आहे, ते खुर्सीपार येथील राहणारे आहेत. मानेगावच्या चैतन्य विद्यालयात काम करणारे गणिताचे शिक्षक रमेश पंचबुद्धे हे खुर्सीपार येथे राहत होते. ते खुर्सीपारहून रावणवाडी कॅम्पसमार्गे मानेगावला ये – जा करत असत.
सोमवारी दररोजप्रमाणे ते मानेगावला जाण्यासाठी घरून निघाले. पण, शाळेत पोहोचले नाहीत. या दरम्यान, दुपारी 12.30 वाजता वन विभागाचे कर्मचारी वन परिसरात गस्त घालत असताना त्यांना रस्त्याच्या काही अंतरावर एक दुचाकी पार्क केलेली दिसली. वन कर्मचाऱ्यांनी वन परिसरात जाऊन पाहिले, तर त्यांना झाडावर त्यांचा मृतदेह गळफास घेतलेल्या अवस्थेत आढळून आला. 
Bhandara News: गर्दीत गाठलं, सर्वांच्या देखत संपवलं, वाचवायला गेलेल्या मित्राचाही जीव घेतला, भंडाऱ्यात थरारक घटना
त्यानंतर या घटनेची माहिती तात्काळ पोलिसांना देण्यात आली. रावणवाडी परिसराचा हा भाग अड्याळ पोलिस ठाण्याच्या अंतर्गत येत असल्याने अड्याळ पोलिस ठाण्याचे पथक घटनास्थळी पोहोचले. त्यांनी घटनेची माहिती त्यांच्या कुटुंबियांना दिली आणि घटना स्थळाचा पंचनामा करून मृतदेह पोस्टमॉर्टमसाठी पाठवला. सध्या पोलिसांनी या प्रकरणाचा तपास सुरु केला आहे.
एक मैत्रीपूर्ण शिक्षक म्हणून ओळखले जाणारे रमेश पंचबुद्धे यांनी असे पाऊल का उचलले, त्यांनी जीव देण्याचा इतका टोकाचा निर्णय का घेतला, यामागील कारणांचा तपास सध्या पोलिस करत आहेत. पोस्टमॉर्टमनंतर मृतदेह कुटुंबियांच्या ताब्यात देण्यात आला आहे. त्यांच्या पश्चात पत्नी आणि दोन मुली आहेत. या प्रकरणी अड्याळ पोलिसांनी गुन्हा दाखल केला असून पुढील तपास सुरू असल्याची माहिती आहे.
लेखकाबद्दलनुपूर उप्पलनुपूर विकास उप्पल, महाराष्ट्र टाइम्स ऑनलाईनमध्ये सिनियर डिजिटल कंटेंट प्रोड्युसर पदावर कार्यरत आहेत.गेल्या तीन वर्षांपासून महाराष्ट्र टाइम्स ऑनलाईनसोबत काम करत आहे. राष्ट्रीय, गुन्हेगारी, राजकीय, हटके स्टोरीज या विषयांचं लिखाण करण्यात हातखंडा आहे. घटनेचं विश्लेषणात्मक लिखाण करण्यात रस. गेल्या 9 वर्षांपासून पत्रकारिता क्षेत्रात काम करत असून यापूर्वी टीव्ही ९ मराठी, साममध्ये कामाचा अनुभव आहे. यशवंतराव चव्हाण मुक्त विद्यापीठातून बॅचलर ऑफ मास कम्युनिकेशन अँड जर्नालिझमचं शिक्षण घेतलं आहे.… आणखी वाचा