Wardha Drown Death: वणा नदीत बुडून तिघांचा करुण अंत; अधिक मासानिमित्त स्नानासाठी गेलेले, वर्ध्यात हळहळ – wardha district samudrapur taluka 3 people drowned who went for swimming in vana river

मिळालेल्या माहितीनुसार, शुक्रवारी सकाळी साडेनऊ वाजताच्या सुमारास अतुल किनेकर, त्यांची मुलगी रिधिमा आणि मामकडे आलेली गुंजन हे तिघेही अधिक मासानिमित्त स्नान करण्यासाठी दुचाकीने वणा नदीवर गेले होते. बराच वेळ उलटूनही ते घरी परतले नाहीत. नातेवाइकांनी शोधाशोध सुरू केली असता नदीकाठी उभी असलेल्या दुचाकीवर त्यांचे कपडे आढळून आले. त्यामुळे तत्काळ समुद्रपूर पोलिसांना माहिती देण्यात आली.

Nagpur News: बंद घरात निमूट संपला जीवनप्रवास! नागपूरच्या दवलामेटीतील घरात सापडले वृद्ध दाम्पत्याचे मृतदेह
माहिती मिळताच उपविभागीय पोलिस अधिकारी सुशीलकुमार नायक, समुद्रपूर पोलिस ठाण्याचे ठाणेदार रवींद्र देवकर यांच्या मार्गदर्शनाखाली शोध व बचाव मोहीम हाती घेण्यात आली. पोलिस कर्मचारी रामदास चकोले, सागर वाटमोडे तसेच स्थानिक मच्छीमार किशोर बावणे, मुरलीधर बावणे आणि विकी मस्के यांनी नदीपात्रात शोधमोहीम राबविली. दुपारी तीन वाजताच्या सुमारास तिन्ही मृतदेह नदीतून बाहेर काढण्यात आले.

स्थानिक नागरिकांच्या म्हणण्यानुसार, नदीपात्रातील रेती उत्खननामुळे अनेक ठिकाणी खोल खड्डे निर्माण झाले आहेत. नदीत स्नानासाठी जाणाऱ्या नागरिकांना या खोल भागांचा अंदाज येत नसल्याने अपघाताचा धोका वाढला आहे. या घटनेमुळे शेडगाव परिसरात हळहळ व्यक्त केली जात आहे. समुद्रपूर पोलिसांनी आकस्मिक मृत्यूची नोंद केली आहे.

विहिरीत बुडून बाप-लेकाचा मृत्यू
यवतमाळ : विहिरीत पोहण्यासाठी गेलेल्या बाप-लेकाचा बुडून मृत्यू झाला आहे. ही घटना घाटंजीजवळ असलेल्या घोटी जवळ शुक्रवारी दुपारी घडली. सचिन जाधव (वय ४०) व त्यांचा मुलगा विहान जाधव (वय ९)अशी मृतांची नावे आहे. सचिन जाधव याला पोहता येत नव्हते. त्याला दारूचे व्यसन होते. त्याने मुलासह विहिरीत पोहण्यासाठी उडी घेतली असावी असा प्राथमिक अंदाज व्यक्त होत आहे. गावकऱ्यांना माहिती मिळताच त्यांनी घाटंजी पोलिसांना माहिती दिली.