उद्योजक आणि प्रशासनातील समन्वयासाठी दर शुक्रवारी जिल्हाधिकाऱ्यांच्या उपस्थितीत ‘उद्योग दरबार’ भरविण्यात येणार असून, उद्योगमंत्री दर दोन महिन्यांनी जिल्ह्यातील ‘एमआयडीसीं’च्या अडचणींचा प्रत्यक्ष आढावा घेणार आहेत.
वीस उद्योग बाहेर जाण्याच्या नुसत्या चर्चा
चाकणमधून २० प्रमुख उद्योग बाहेर जाणार असल्याच्या केवळ चर्चाच असल्याचे सामंत म्हणाले. ‘अडीच ते पावणेतीन तास चाललेल्या बैठकीत एकही मिनिट या कथित उद्योग स्थलांतरावर चर्चा झाली नाही. उलट, गेल्या तीन-चार वर्षांत चाकण परिसरातील उद्योगांमध्ये दर वर्षी ३० टक्क्यांनी वाढ होत असल्याचे उद्योजकांनी सांगितले,’ असे सामंत यांनी नमूद केले. बैठकीचे संपूर्ण चित्रीकरण उपलब्ध असल्याचेही त्यांनी सांगितले.
औद्योगिक पट्ट्याला समस्यांचं ग्रहण
राज्यातील सर्वांत मोठ्या औद्योगिक पट्ट्यांपैकी एक असलेल्या चाकण-तळेगाव-शिक्रापूर परिसरात वाहतूक कोंडी, खड्डे, कचरा, प्रदूषण, पाणी आणि वीजटंचाई कायम असल्याचे चित्र आहे. या समस्यांना कंटाळून चाकण औद्योगिक वसाहतीतील २० कंपन्यांनी सातारा जिल्ह्यातील खंडाळा औद्योगिक वसाहतीत स्थलांतर करण्याचा निर्णय जाहीर केल्यानंतर खळबळ उडाली असून सामंत यांनी चाकणला भेट देत उद्योजकांशी थेट चर्चा केली. त्यानंतर त्यांनी पत्रकार परिषद घेत उपाययोजनांची माहिती जाहीर केली. या वेळी माजी उपसभापती डॉ. नीलम गोऱ्हे उपस्थित होत्या.
महिंद्र कंपनीकडे जाणाऱ्या रस्त्याच्या भूसंपादनात चार शेतकऱ्यांचा अडथळा आहे. तेथे सक्तीचे भूसंपादन करण्याचा निर्णय झाला आहे. मोबदल्याची रक्कम न्यायालयात जमा केली जाईल, संबंधितांनी ती न्यायालयामार्फत घ्यावी, असे सामंत यांनी स्पष्ट केले.
एकनाथ शिंदेंचाही चाकण प्रश्नी उहापोह
दुसरीकडे, चाकण-तळेगाव औद्योगिक क्षेत्रामधील वाहतूक कोंडी रोखण्यासाठी रस्त्यावरील खड्डे बुजविण्याला प्रशासनाने प्राधान्य द्यावे, मात्र पावसाळ्यात रस्ता दुरुस्तीसाठी येणाऱ्या अडचणी लक्षात घेता प्री-कास्ट; तसेच ‘जिओ पॉलिमर टेक्नो पॅच’ यांसारख्या आधुनिक तंत्रज्ञानाचा वापर करण्याचे निर्देश उपमुख्यमंत्री एकनाथ शिंदे यांनी रविवारी दिले. पायाभूत सुविधांच्या उभारणीसाठी जिल्हाधिकाऱ्यांच्या अध्यक्षतेखाली १४ विभागांनी एकत्र येऊन तत्काळ कृती आराखड्याची अंमलबजावणी करावी असे निर्देशही उपमुख्यमंत्र्यांनी दिले.
चाकण-तळेगाव औद्योगिक क्षेत्रातील उद्योजकांच्या विविध अडी-अडचणी जाणून घेण्यासाठी आयोजित बैठकीत उपमुख्यमंत्र्यांनी उपस्थितांशी दूरदृश्यप्रणालीद्वारे संवाद साधला. घनकचरा व्यवस्थापन प्रकल्प, पोलिस ठाणे, अग्निशमन केंद्र आणि विद्युत उपकेंद्रांसाठी ‘एमआयडीसी’कडून जागा उपलब्ध करुन देण्यासह चाकण शहराच्या विकास आराखड्याला तत्काळ मंजुरी देण्यात येईल, अशी घोषणाही उपमुख्यमंत्री एकनाथ शिंदे यांनी या वेळी केली.
शेतकऱ्यांचे गैरसमज दूर करण्यासाठी प्रशासनाकडून प्रयत्न केले जातील, असेही त्यांनी सांगितले. चाकण, रांजणगाव आणि तळेगाव परिसरातील रस्त्यांसाठी गेल्या वर्षभरात ४१० कोटी रुपये मंजूर करण्यात आले आहेत. उर्वरित १४ किलोमीटर रस्त्यांच्या कामांचे नियोजन स्थानिक नागरिक आणि उद्योजकांच्या मागणीनुसार जिल्हाधिकाऱ्यांकडून करण्यात येणार असल्याचेही त्यांनी स्पष्ट केले.
‘क्लस्टर हाउसिंग’
चाकण औद्योगिक परिसरात काम करणाऱ्या हजारो कामगारांना पुणे शहर आणि परिसरातून रोज मोठा प्रवास करावा लागतो. हा प्रवासाचा वेळ कमी करण्यासाठी उद्योजकांनी ‘क्लस्टर’ पद्धतीने पुढाकार घेतल्यास त्यांच्या कामगार आणि अधिकाऱ्यांसाठी गृहप्रकल्प उभारण्यासाठी ‘एमआयडीसी’कडून जागा उपलब्ध करून देण्याचे धोरण जाहीर केले आहे. हे धोरण केवळ पुण्यापुरते मर्यादित न ठेवता संपूर्ण महाराष्ट्रात लागू करण्यात येणार असल्याचे सामंत यांनी सांगितले.
‘भगवी पत्रिका’
कंपन्या बंद पडल्याच्या आकडेवारीवरून होत असलेल्या टीकेला उत्तर देताना सामंत यांनी कंपनी कायदा २०१३ मधील तांत्रिक तरतुदी आणि केंद्राच्या‘ स्वच्छता मोहिमे’मुळे निष्क्रिय कंपन्यांची नोंदणी रद्द करण्यात आल्याचा दावा केला. त्याच कालावधीत राज्यात तीन लाख नव्या कंपन्या सुरू झाल्याचे त्यांनी सांगितले. दावोस येथे झालेल्या गुंतवणूक करारांपैकी सर्वाधिक करारांची अंमलबजावणी राज्यात झाल्याचा दावा करीत त्यांनी विरोधकांना उत्तर देण्यासाठी सरकार लवकरच वस्तुस्थितीदर्शक ‘भगवी पत्रिका’ प्रसिद्ध करणार असल्याचेही सामंत यांनी सांगितले.
लेखकाबद्दलअनिश बेंद्रेअनिश बेंद्रे हे महाराष्ट्र टाइम्स ऑनलाइनमध्ये सहाय्यक वृत्त संपादक या पदावर कार्यरत आहेत. ते मटा ऑनलाईनमध्ये २०२२ पासून कार्यरत आहेत. टीव्ही आणि डिजिटल अशा दोन्ही माध्यमांचा एकत्रित १३ वर्षांचा अनुभव त्यांच्या गाठीशी आहे. त्यांना राजकारण, समाजकारण यासोबतच मनोरंजन, गुन्हेगारी यासारख्या विविध विषयांवरील बातम्यांचे लेखन करण्याचा अनुभव आहे.
पत्रकारितेतील अनुभव
अनिश बेंद्रे यांनी टीव्ही माध्यमातून पत्रकारितेला सुरुवात केली. एबीपी माझा वृत्तवाहिनीत सर्वप्रथम त्यांना प्रॉडक्शन आणि टिकर विभागात काम करण्याची संधी मिळाली. मराठी भाषेवरील प्रभुत्वामुळे त्यांनी लिहिलेल्या आकर्षक हेडलाईन्स सहकाऱ्यांसह प्रेक्षकांची वाहवा मिळवून गेल्या. त्यानंतर २०१५ मध्ये एबीपी माझा वृत्तवाहिनीच्याच वेब टीमसोबत त्यांनी डिजिटल विश्वात कामाचा श्रीगणेशा केला. डिजिटल माध्यमासाठी लेखन करण्याचं आव्हान पेलताना त्यांनी लक्षवेधी मथळे लिहिण्याचं कसब आत्मसात केलं. एबीपी समुहासोबत जवळपास ६ वर्षांच्या कार्यकाळात त्यांनी विविध जबाबदाऱ्या पार पाडल्या. ट्रेनी, असिस्टंट प्रोड्युसर पदापासून प्रोड्युसरपर्यंत संधी मिळवली. मराठी भाषा दिवस, आंतरराष्ट्रीय पुरुष दिन, विवाहबाह्य संबंधावरील सुप्रीम कोर्टाचा निर्णय, वर्ल्ड टीव्ही डे यासारख्या विषयांवर त्यांनी केलेल्या डॉक्युमेंट्रीही विशेष गाजल्या.
पुढे टीव्ही९ मराठी वृत्तवाहिनीच्या वेबसाईटसोबत त्यांनी चार वर्ष काम केलं. यावेळी त्यांच्यातील नेतृत्व गुणांना वाव मिळाला. मॉर्निंग शिफ्ट इन्चार्ज म्हणून काम करताना बातमी लेखनाचं तंत्र शिकवण्यासोबतच त्यांनी सहकाऱ्यांना वेळोवेळी मार्गदर्शन केले. टीमसोबत समन्वय राखणे, प्रत्येकातील गुण हेरुन त्यानुसार कामाची विभागणी करणे यामध्ये त्यांचा हातखंडा आहे. कारकिर्दीच्या १३ वर्षांपैकी दहाहून अधिक वर्ष त्यांनी डिजिटल विश्वात काम केलं आहे. या काळात लोकसभा-विधानसभा-महापालिका यासारख्या विविध निवडणुकांचा त्यांनी बारकाईने अभ्यास केला आहे.
अनिश बेंद्रे २०२२ पासून महाराष्ट्र टाइम्स ऑनलाईनसोबत काम करत आहेत. सुरुवातीपासूनच मॉर्निंग शिफ्ट इन्चार्ज म्हणून काम करताना त्यांनी सहाय्यक वृत्त संपादक पदापर्यंत उन्नती मिळवली आहे. बातम्यांच्या सखोल विश्लेषणासोबतच बातमीमागील बातमी जाणून घेण्यात त्यांना रस आहे. बातमीचे विविध पैलू जाणून घेत सोप्या भाषेत ते प्रेक्षकांपर्यंत पोहोचवण्याचा त्यांचा प्रयत्न असतो. मानसशास्त्र विषयातील अभ्यासामुळे गुन्हेगारी बातम्या उलगडून सांगण्यात त्यांना मदत होते. याशिवाय मटा मॉर्निंग बुलेटिनच्या सूत्रसंचालनाची जबाबदारी त्यांनी स्वीकारली होती. तसंच मटा पत्रकार परिषद या निवडणूक विषयक कार्यक्रमाची संकल्पना-संयोजन आणि सूत्रसंचालनही त्यांनी केले होते. निवडणुकांच्या निमित्ताने त्यांनी विविध मान्यवरांच्या मुलाखती घेतल्या, सखोल राजकीय विश्लेषण केले, तसेच सामान्य नागरिकांशी संवाद साधणारे काही कार्यक्रमही व्हिडिओ टीमसोबत केले.
शैक्षणिक पात्रता
अनिश बेंद्रे यांनी २०१२ मध्ये रुपारेल महाविद्यालयातून मानसशास्त्र विषयात पदवी संपादन केली. त्यानंतर झेवियर्स महाविद्यालयातून मास कम्युनिकेशन विषयात पदव्युत्तर शिक्षण घेतले. मराठीसोबतच हिंदी, इंग्रजी, संस्कृत आणि जपानी भाषेचाही त्यांनी अभ्यास केला आहे.… आणखी वाचा
