कोलकाता : दिल्ली कॅपिटल्स आणि बंगालचा युवा क्रिकेटपटू अभिषेक पोरेल याला बलात्काराच्या आरोपाप्रकरणी हुगळी जिल्ह्यातील मोगरा पोलिसांनी अटक केली आहे. एका तृतीय वर्षाच्या मेडिकल विद्यार्थिनीने पोरेलविरोधात तक्रार दाखल केली होती. या तक्रारीनंतर कलकत्ता उच्च न्यायालयाने पोरेलला अटक करण्याचे निर्देश पोलिसांना दिले होते. त्यानुसार ही कारवाई करण्यात आली.
लग्नाचे आमिष दाखवून शारीरिक संबंधांचा आरोप
तक्रारदार विद्यार्थिनीने पोरेलने लग्नाचे आश्वासन देऊन तिच्याशी शारीरिक संबंध प्रस्थापित केल्याचा आरोप केला आहे. तसेच तिचे खासगी फोटो आणि व्हिडीओ तयार करून ते सार्वजनिक करण्याची धमकी दिल्याचाही आरोप तिने केला आहे. या प्रकरणात बलात्कारासह धमकी आणि इतर गंभीर कलमांखाली गुन्हा दाखल करण्यात आला आहे. मात्र, या आरोपांची अद्याप न्यायालयीन पातळीवर पुष्टी झालेली नाही.
तक्रारदार तरुणीने पोलिसांकडून योग्य कारवाई होत नसल्याचा आरोप करत कलकत्ता उच्च न्यायालयात धाव घेतली होती. या प्रकरणाची सुनावणी करताना न्यायालयाने पोरेल आणि अन्य एका आरोपीला अटक करण्याचे निर्देश दिले. तसेच तक्रारदार महिलेचे खासगी फोटो किंवा व्हिडीओ प्रसारित होऊ नयेत, यासाठी आरोपींचे मोबाइल, लॅपटॉप आणि इतर इलेक्ट्रॉनिक उपकरणे जप्त करण्याचे आदेशही देण्यात आले. पोलिसांनी यापूर्वी एक पेनड्राइव्ह जप्त करून फॉरेन्सिक तपासणीसाठी पाठविल्याची माहिती न्यायालयाला दिली होती.
२०२३ पासून संपर्कात असल्याचा दावा
तक्रारीनुसार, पोरेल आणि संबंधित तरुणी २०२३ पासून संपर्कात होते. दोन्ही कुटुंबांमध्ये लग्नाबाबत चर्चाही झाल्याचा दावा करण्यात आला आहे. मात्र, २ एप्रिल २०२६ रोजी दिल्लीमध्ये आपल्यासोबत मारहाण करण्यात आली, तसेच आपल्याला वेगळे ठेवून त्रास देण्यात आला, असा आरोप तरुणीने केला आहे. या घटनेनंतर तिने पोलिसांत तक्रार केली होती.
क्रिकेट कारकिर्दीवर परिणाम होणार?
२३ वर्षीय अभिषेक पोरेल हा डावखुरा यष्टिरक्षक-फलंदाज असून तो आयपीएलमध्ये दिल्ली कॅपिटल्सकडून खेळतो. त्याने आतापर्यंत आयपीएलमध्ये ३५ सामने खेळून ७६९ धावा केल्या आहेत. त्याच्या नावावर चार अर्धशतके आहेत. बंगालकडून त्याने प्रथम श्रेणी, लिस्ट ए आणि टी-२० क्रिकेटमध्येही प्रतिनिधित्व केले आहे. अटकेनंतर या प्रकरणाचा त्याच्या क्रिकेट कारकिर्दीवर काय परिणाम होतो, याकडे क्रीडाविश्वाचे लक्ष लागले आहे.
दरम्यान, या प्रकरणात पोरेलविरोधातील आरोप अद्याप सिद्ध झालेले नाहीत. पोलिसांचा तपास आणि न्यायालयीन प्रक्रिया सुरू असून, पुढील सुनावणीत या प्रकरणातील घडामोडी स्पष्ट होणार आहेत.
