66 वर टीम इंडिया अडखळली, पडिक्कलनं पुन्हा शतक ठोकलं; 8 वर्षांत कुणालाच जमलं नव्हतं ते कोलंबोत करून दाखवलं!

संयम, तंत्र अन् गिलची भक्कम साथ

दोन सामन्यांच्या या कसोटी मालिकेतील पहिल्या सामन्यात १६७ धावांची मॅरेथॉन खेळी करून सामनावीर ठरलेल्या पडिक्कलने दुसऱ्या सामन्यातही सुरुवातीपासूनच आपला दबदबा निर्माण केला. त्याने या डावात गजबचा संयम दाखवत कोणतीही घाई न करता १६८ चेंडूंचा सामना करत आपले शतक पूर्ण केले. विशेष म्हणजे, आपल्या या शतकी खेळीदरम्यान त्याने हवेत शॉट मारून कोणताही धोका पत्करला नाही. त्याने एकही षटकार न मारता १० सणसणीत चौकारांच्या मदतीने ही मजल मारली.

या सामन्यात टीम इंडियाने अवघ्या ६६ धावांवर आपले २ गडी गमावले होते. अशा नाजूक स्थितीत पडिक्कलने कर्णधार शुभमन गिलसोबत तिसऱ्या विकेटसाठी १२० धावांची अत्यंत महत्त्वपूर्ण भागीदारी रचली आणि भारतीय संघाला एका मजबूत स्थितीत आणून ठेवले.

टीम इंडियाची नंबर ३ ची डोकेदुखी अखेर संपली

गेल्या काही काळापासून भारतीय कसोटी संघाला नंबर ३ च्या जागेवर एका भरवशाच्या फलंदाजाची नितांत गरज होती. असा फलंदाज जो फिरकी आणि वेगवान या दोन्ही प्रकारच्या गोलंदाजीचा खंबीरपणे सामना करू शकेल. पडिक्कलने सलग दोन शतके ठोकून ही मोठी समस्या जवळपास पूर्णपणे सोडवली आहे. ज्या सहजतेने तो फिरकीपटू आणि वेगवान गोलंदाजांना खेळत आहे, ते पाहता त्याने कसोटी संघात तिसऱ्या क्रमांकावर आपली जागा जवळपास पक्की केली आहे.

पुजाराच्या रेकॉर्डची बरोबरी

दरम्यान, या शतकासह त्याने २०१८-१९ च्या बॉर्डर-गावस्कर ट्रॉफीमध्ये चेतेश्वर पुजाराने परदेशी भूमीवर केलेल्या सलग दोन कसोटी शतके मारण्याच्या विक्रमाची बरोबरी केली आहे.

साई सुदर्शनचे कमबॅक आता कठीण?

पडिक्कलच्या या सातत्यपूर्ण आणि धमाकेदार कामगिरीमुळे नंबर ३ च्या शर्यतीत असलेल्या इतर खेळाडूंचे मात्र धाबे दणाणले आहेत. यात सर्वात मोठे नाव आहे ते साई सुदर्शनचे. विशेष म्हणजे, साई सुदर्शनला दुखापत झाल्यामुळेच देवदत्त पडिक्कलला भारतीय कसोटी संघात सामील होण्याची अचानक संधी मिळाली होती. आता मिळालेल्या संधीचे पडिक्कलने ज्या प्रकारे सोने केले आहे, ते पाहता दुखापतीतून सावरल्यानंतर साई सुदर्शनला पुन्हा संघात ‘कमबॅक’ करणे आता अत्यंत मोठे आणि कठीण आव्हान असणार आहे.