घरगुती LPG गॅस सिलिंडर वापरणाऱ्या करोडो ग्राहकांसाठी एक अत्यंत महत्त्वाची आणि तातडीची अपडेट आहे. केंद्र सरकारने गॅस कनेक्शनसाठी आधार आधारित e-KYC अनिवार्य केले असून, यासाठी 16 ऑगस्ट 2026 ही शेवटची तारीख दिली आहे. ही प्रक्रिया वेळेत पूर्ण न केल्यास गॅस सिलिंडर बुकिंग आणि बँक खात्यात येणारी सबसिडी बंद होऊ शकते. चला तर मग याविषयीची माहिती पुढे जाणून घेऊया.
तुमच्या घरात इंडियन, भारत गॅस किंवा एचपी गॅस चे घरगुती गॅस कनेक्शन असेल,तर ही बातमी तुमच्यासाठी अत्यंत महत्त्वाची आहे. या मुदतीपूर्वी केवायसी पूर्ण न केल्यास आगामी काळात गॅस सिलिंडरची डिलिव्हरी, बुकिंग आणि विशेषतः प्रधानमंत्री उज्ज्वला योजनेची सबसिडी मिळण्यात मोठ्या अडचणी येऊ शकतात.
कुठेही जाण्याची गरज नाही, घरबसल्या होईल काम
अनेक ग्राहकांमध्ये असा गैरसमज आहे की केवायसी करण्यासाठी गॅस एजन्सीच्या फेऱ्या माराव्या लागतील आणि रांगेत उभे राहावे लागेल. परंतु, तेल कंपन्यांनी ग्राहकांच्या सोयीसाठी ही संपूर्ण डिजिटल प्रक्रिया ऑनलाइन उपलब्ध करून दिली आहे. ग्राहक आपल्या मोबाईलवरून अवघ्या 5 मिनिटांत ही प्रक्रिया पूर्ण करू शकतात. यासाठी ग्राहकाकडे त्याचा गॅस कनेक्शनशी लिंक असलेला मोबाईल नंबर आणि आधार कार्ड असणे आवश्यक आहे.
ऑनलाइन e-KYC करण्याची प्रोसेस
- ॲप डाउनलोड करा: सर्वात आधी तुमच्या गॅस कंपनीचे अधिकृत मोबाईल ॲप (उदा. IndianOil ONE, Hello BPCL, किंवा HP Pay) गुगल प्ले स्टोअरवरून डाउनलोड करा.
- पार्श्वभूमी ॲप आवश्यक: चेहरा स्कॅन करण्यासाठी गुगल प्ले स्टोअरवरून UIDAI चे अधिकृत ‘Aadhaar FaceRD’ हे ॲप देखील मोबाईलमध्ये इन्स्टॉल करून ठेवा.
- लॉगिन करा: गॅस कंपनीच्या ॲपमध्ये तुमच्या लिंक असलेल्या मोबाईल नंबरद्वारे लॉगिन करा.
- केवायसी पर्याय: ॲपमधील ‘My Profile’ किंवा ‘LPG Section’ मध्ये जाऊन ‘e-KYC’ किंवा ‘Aadhaar Authentication’ या पर्यायावर क्लिक करा.
- फेस स्कॅन: तुमचा 12 अंकी आधार क्रमांक टाकून संमती द्या. त्यानंतर मोबाईलचा फ्रंट कॅमेरा ऑन होईल. कॅमेऱ्यासमोर चेहरा सरळ ठेवून 2-3 वेळा डोळे मिचकावा (Blink), ज्यामुळे लाइव्ह फेस व्हेरिफिकेशन यशस्वी होईल.
- सबमिट करा: चेहरा यशस्वीरीत्या स्कॅन झाल्यावर स्क्रीनवर ‘Confirmation’ मेसेज दिसेल. त्यानंतर 24 ते 48 तासांत तुमच्या केवायसीची पडताळणी पूर्ण होते.
कोणाला KYC करण्याची गरज नाही?
पेट्रोलियम मंत्रालयाने स्पष्ट केले आहे की, ज्या ग्राहकांनी आधीच आपली आधार आधारित बायोमेट्रिक पडताळणी पूर्ण केली आहे, त्यांना पुन्हा e-KYC करण्याची अजिबात आवश्यकता नाही. ही मोहीम केवळ अशाच ग्राहकांसाठी आहे ज्यांचे आधार गॅस कनेक्शनशी पडताळलेले नाही किंवा ज्यांची केवायसी प्रलंबित असल्याचे मेसेज कंपन्यांकडून पाठवले जात आहेत.
फसवणुकीपासून दूर राहा
अंतिम मुदत जवळ आल्यामुळे बाजारात सायबर फसवणुकीचे प्रकार वाढू शकतात. कोणत्याही अज्ञात व्यक्तीने पाठवलेल्या लिंकवर क्लिक करून केवायसी करू नका, तसेच केवायसीच्या नावावर कोणाशीही बँक तपशील किंवा ओटीपी शेअर करू नका. अधिकृत ॲप्स किंवा थेट तुमच्या गॅस एजन्सीमध्ये जाऊनच ही प्रक्रिया पूर्ण करा.
लेखकाबद्दलशुभम कुलकर्णीशुभम कुलकर्णी जवळपास 6 वर्षांपासून मराठी माध्यमांमध्ये काम करतोय. आकाशवाणी (छत्रपती संभाजीनगर) पासून माध्यम क्षेत्रात कामाला सुरुवात केली. एका मुखपत्रासह मुंबईतील नामांकित मराठी वृत्तवाहिन्यांमध्ये ‘बुलेटिन प्रोड्यूसर’ म्हणून जबाबदारी सांभाळली. शुभमला राजधानी दिल्लीतही बातमीवर संस्कार करण्याची संधी मिळाली. राजकारण, व्यापार-उद्योग, क्रीडा, तंत्रज्ञान, ऑटो या विषयावर लिहायला त्याला आवडतं. निसर्गाच्या सानिध्यात बसायला, फावल्या वेळेत चित्रपट, वेब सिरीज पाहाण्याचा शुभमचा छंद आहे.… आणखी वाचा
