अमरावती शहरातील मुख्य आणि अंतर्गत रस्त्यांवर झाडांची छाटणी केल्यानंतर कचरा उचलण्याकडे महानगरपालिकेच्या कर्मचाऱ्यांकडून दुर्लक्ष होत आहे. यामुळे नागरिक त्रस्त झाले असून, रस्त्याच्या कडेला पडलेल्या डहाळ्या, पाने आणि फांद्यांमुळे वाहतुकीला अडथळा निर्माण होत आहे, तसेच अपघाताचा धोकाही वाढला आहे. पावसाळ्याच्या पार्श्वभूमीवर किंवा नियमित देखभालीचा भाग म्हणून मनपाच्या वृक्ष प्राधिकरणातर्फे रस्त्यांवरील झाडांच्या धोकादायक फांद्या छाटण्याचे काम हाती घेतले जाते. मात्र, झाडे किंवा फांद्या तोडल्यानंतर तो कचरा तात्काळ हटवणे आवश्यक असताना, मनपा कर्मचारी छाटलेली पाने-फांद्या रस्त्यावरच सोडून निघून जातात. पालिका कर्मचाऱ्यांच्या मते, झाडांच्या वाढलेल्या फांद्या तोडण्याचे काम एका यंत्रणेकडे आहे, तर तोडून झाल्यावर रस्त्यात साचणारा कचरा उचलण्याचे काम दुसऱ्या यंत्रणेकडे आहे. यामुळे फांद्या आणि पाने तोडल्यानंतर तयार झालेला कचरा लगेच उचलला जात नाही. गेल्या दोन-तीन दिवसांपासून अमरावती-बडनेरा मार्गासह रेल्वे स्टेशन चौक-एसटी स्टँड रस्त्याच्या दुभाजकांतील झाडांच्या फांद्या व पाने कापण्याचे काम सुरू आहे. मात्र, त्यातून निर्माण झालेला कचरा अद्यापही तसाच पडून आहे. झाडांची छाटणी करणे आवश्यक असले तरी, त्यासोबतच कचरा तात्काळ उचलण्याची जबाबदारीही महापालिकेची आहे, असे त्रस्त नागरिकांनी म्हटले आहे. काम अर्धवट सोडून दिल्याने नागरिकांनाच मनस्ताप सहन करावा लागत असून, मनपा प्रशासनाने याकडे गांभीर्याने लक्ष देऊन तात्काळ हा कचरा हटवावा, अशी मागणी त्यांनी केली आहे. रस्त्यांच्या कडेला पडून असलेल्या या फांद्यांमुळे आधीच अरुंद असलेले रस्ते अधिकच संकुचित झाले आहेत. रात्रीच्या वेळी पुरेसा प्रकाश नसल्यास दुचाकीचालक या फांद्यांवर आदळून अपघात होण्याच्या घटना घडत आहेत. तसेच वाळलेल्या पानांमुळे आणि फांद्यांमुळे पादचाऱ्यांना चालणेही कठीण झाले आहे. अनेक दिवस हा कचरा असाच पडून राहिल्याने तो कुजण्यास सुरुवात होते. यामुळे परिसरात दुर्गंधी पसरत असून, डासांचा प्रादुर्भाव वाढण्याची भीती व्यक्त केली जात आहे. पावसाच्या पाण्यात या फांद्या आणि पाने वाहून नाल्यांमध्ये अडकल्यास नाले तुंबून रस्त्यावर पाणी साचण्याच्या घटनांमध्येही वाढ होत आहे.
Source link
रस्त्यांवरील झाडांच्या छाटलेल्या फांद्या बेवारस:महापालिकेच्या दिरंगाईमुळे नागरिक त्रस्त
