काणकोण : गोव्यातील काणकोण तालुक्यातील पर्तगाळी येथील आदर्श धाममधील प्रभू श्रीरामांच्या 77 फूट उंच भव्य कांस्य मूर्तीची इंडिया बुक ऑफ रेकॉर्ड्समध्ये अधिकृत नोंद झाली आहे. भगवान श्रीरामांची सर्वात उंच स्थापित कांस्य मूर्ती म्हणून या मूर्तीला विक्रमी मान्यता मिळाली आहे.
पर्तगाळी येथील आदर्श धाम परिसरात उभारण्यात आलेली ही भव्य मूर्ती सध्या भाविक आणि पर्यटकांचे प्रमुख आकर्षण ठरत आहे. प्रभू श्रीरामांचे भव्य स्वरूप साकारण्यात आलेली ही कांस्य मूर्ती धार्मिक तसेच सांस्कृतिकदृष्ट्याही विशेष महत्त्वाची मानली जात आहे.
इंडिया बुक ऑफ रेकॉर्ड्सकडून या मूर्तीची अधिकृत नोंद झाल्याने पर्तगाळी येथील आदर्श धामच्या शिरपेचात मानाचा तुरा खोवला गेला आहे. या विक्रमी नोंदीमुळे आदर्श धामला देशभरात नवी ओळख मिळण्यास मदत होणार असून, गोव्यातील धार्मिक पर्यटनालाही चालना मिळण्याची शक्यता आहे.
77 फूट उंचीची ही भव्य कांस्य मूर्ती पाहण्यासाठी भाविक आणि पर्यटकांमध्ये उत्सुकता वाढली आहे. या विक्रमी मान्यतेमुळे आदर्श धामच्या लौकिकात भर पडली असून, पर्तगाळी हे गोव्यातील धार्मिक पर्यटनाचे आणखी एक महत्त्वाचे केंद्र म्हणून पुढे येण्याची शक्यता व्यक्त केली जात आहे.
