नागपूर विमानतळाचा जागतिक दर्जाच्या प्रवेशद्वारात कायापालट होणार;विमानतळालगत विकासभरारीची कामे सुरू

विमानतळालगतच्या २७१ हेक्टर जमिनीच्या आर्थिक मूल्यवर्धनाची प्रक्रिया सुरू

डॉ. बाबासाहेब आंबेडकर आंतरराष्ट्रीय विमानतळाच्या आधुनिकीकरणाला गती मिळाली असतानाच आता विमानतळालगतच्या २७१ हेक्टर जमिनीच्या आर्थिक मूल्यवर्धनाची (मॉनिटायझेशन) प्रक्रिया सुरू झाली आहे. मिहान इंडिया लिमिटेडने या जमिनीचा नियोजनबद्ध वापर करण्यासाठी तज्ज्ञ सल्लागार संस्थांकडून निविदा मागवल्या आहेत. या निर्णयामुळे विमानतळ परिसरातील व्यावसायिक, औद्योगिक, निवासी आणि विमान वाहतुकीशी संबंधित विकासाला चालना मिळण्याची शक्यता आहे.

नागपूर विमानतळाचा जागतिक दर्जाच्या दृष्टीकोनातून कायापालट

नागपूर विमानतळाचा जागतिक दर्जाच्या प्रवेशद्वारात कायापालट करण्याच्या दृष्टीने आधुनिकीकरणाचे काम सुरू आहे. त्याच पार्श्वभूमीवर विमानतळ परिसरातील उपलब्ध जमिनीचा अधिक परिणामकारक वापर करून उत्पन्ननिर्मिती करण्याचा विचार पुढे आला आहे. यामुळे विमानतळाभोवतीच्या भागात भविष्यात नवे व्यावसायिक केंद्र, लॉजिस्टिक सुविधा, सेवा उद्योग, निवासी प्रकल्प आणि विमान वाहतुकीशी संबंधित पूरक सुविधा विकसित होऊ शकतात.

विकासाचे नियोजनही स्पष्ट होणार

मिहान इंडिया लिमिटेडतर्फे नियुक्त होणारी सल्लागार संस्था बाजारातील मागणी, वाहतुकीची सुविधा, उपलब्ध पायाभूत व्यवस्था आणि जमिनीच्या वापराचे धोरण यांचा सखोल अभ्यास करणार आहे. या अभ्यासाच्या आधारे व्यावसायिक, औद्योगिक, निवासी तसेच विमान वाहतुकीशी संबंधित विकासाचा सर्वसमावेशक आराखडा तयार केला जाणार आहे. त्यामुळे विमानतळाच्या आधुनिकीकरणासोबतच परिसराच्या दीर्घकालीन विकासाचे नियोजनही स्पष्ट होणार आहे.

Mumbai Local Update: विकेंडला मुंबईकरांचे हाल! मध्य, हार्बर रेल्वेमार्गावर मेगाब्लॉक; कोणत्या लोकल रद्द? पाहा वेळापत्रक

जमिनीच्या विकासाचा आराखडा तयार केला जाणार

मूल्यवर्धनासाठी निश्चित करण्यात आलेल्या २७१ हेक्टर जमिनीपैकी १२२ हेक्टर जमीन भारतीय विमानतळ प्राधिकरणाची आहे, तर १४९ हेक्टर जमीन महाराष्ट्र विमानतळ विकास कंपनी लिमिटेडची आहे. ही जमीन विमानतळाच्या मूळ कामकाजासाठी असलेल्या ९०० हेक्टर आणि जीएमआरला व्यावसायिक विकासासाठी देण्यात आलेल्या १०० हेक्टर जमिनीव्यतिरिक्त आहे. त्यामुळे विमानतळाच्या नियमित कामकाजावर परिणाम न होता स्वतंत्रपणे या जमिनीच्या विकासाचा आराखडा तयार केला जाणार आहे.

जागतिक दर्जाचे प्रवेशद्वार बनवण्याच्या दृष्टीने काम

केंद्रीय मंत्रिमंडळाने मे महिन्यात भारतीय विमानतळ प्राधिकरणाच्या जमिनीचा मिहान इंडिया लिमिटेडला दिलेला भाडेपट्टा कालावधी वाढवण्यास मान्यता दिली होती. हा कालावधी आता जीएमआर नागपूर इंटरनॅशनल एअरपोर्ट लिमिटेडला दिलेल्या ३० वर्षांच्या कराराशी जोडण्यात आला आहे. जीएमआर कंपनी व्यावसायिक कामकाज सुरू झाल्यानंतर नागपूर विमानतळाचा कायापालट करून त्याला जागतिक दर्जाचे प्रवेशद्वारबनवण्याच्या दृष्टीने काम करीत आहे.

विमानतळ प्रवासी हाताळणी क्षमता तीन कोटींपर्यंत वाढवण्याचे उद्दिष्ट

आधुनिकीकरणातून नागपूर विमानतळाची वार्षिक प्रवासी हाताळणी क्षमता तीन कोटींपर्यंत वाढवण्याचे उद्दिष्ट ठेवण्यात आले आहे. प्रवासी क्षमता वाढली, तर विमानतळ परिसरात पूरक सेवा, हॉटेल, कार्यालयीन जागा, वाहतूक, लॉजिस्टिक आणि इतर व्यावसायिक गरजा वाढण्याची शक्यता आहे. त्यामुळे या २७१ हेक्टर जमिनीच्या मूल्यवर्धनाला नागपूरच्या भविष्यातील शहरी आणि आर्थिक विकासाच्या दृष्टीने महत्त्व प्राप्त झाले आहे.

Nagpur News: पाम सिटीच्या बिल्डरला महारेराचा दणका; ५६.२५ लाख रुपये व्याजासह परत करण्याचे आदेश

जमिनीच्या मूल्यवर्धनाची प्रक्रिया

याबाबत विमानतळाचे वरिष्ठ संचालक आबिद रुही म्हणाले, ‘सध्या निविदा प्रक्रिया अंतिम टप्प्यात आहे. सल्लागार कंपनी निश्चित झाल्यानंतर जमिनीच्या मूल्यवर्धनाची प्रक्रिया पुढे जाईल.’