पावसाचा जोर वाढणार, २५ जिल्ह्यांना यलो अलर्ट; कोकण ते विदर्भ कुठे किती बरसणार? IMDचा अंदाज समोर| Maharashtra Times

महामुंबई परिसरामध्ये मेघगर्जनेसह हलक्या ते मध्यम सरींचा इशारा दिलेला असला तरी अजूनही पावसाची एखादी सर येऊन दिवसभर उकाड्याचा ताप जाणवत आहे. दोन दिवसांच्या पावसामुळे मुंबईचे कमाल तापमान ३० अंशांखाली आले होते, मात्र २४ जूननंतर पुन्हा कमाल तापमानाचा पारा चढा असल्याची नोंद होत आहे. रविवारी जारी करण्यात आलेल्या पूर्वानुमानानुसार गुरुवारनंतर दक्षिण कोकणात पावसाचा ऑरेंज ॲलर्ट दिला आहे. तसेच, महामुंबई परिसरात तुरळक ठिकाणी मुसळधार पावसाची शक्यता वर्तवली आहे.

Maharashtra Rain : राज्यात 1 जुलैपासून पाऊस धुमाकूळ घालणार, पंजाबराव डख यांचा अंदाज

सोमवारी आणि मंगळवारी काय स्थिती असेल?

सिंधुदुर्गात १ आणि २ जुलै रोजी तुरळक ठिकाणी मुसळधार ते अति मुसळधार पावसाची शक्यता आहे. तर, रत्नागिरी आणि रायगड जिल्ह्यात २ जुलै रोजी तुरळक ठिकाणी मुसळधार ते अति मुसळधार पाऊस पडू शकेल. मुंबई, ठाणे आणि पालघर जिल्ह्यांमध्ये २ जुलै रोजी तुरळक ठिकाणी मुसळधार पावसाची शक्यता वर्तवण्यात आली आहे. या आठवड्यात सोमवारी आणि मंगळवारी दोन्ही दिवस मेघगर्जनेसह पावसाची शक्यता आहे. मुंबईमध्ये सोमवारी तुरळक ठिकाणी मेघगर्जनेसह मुसळधार पाऊस पडू शकेल. रायगड, रत्नागिरी येथेही तुरळक ठिकाणी मेघगर्जनेसह मुसळधार पावसाची शक्यता आहे. ठाणे, सिंधुदुर्ग येथे मात्र सोमवारी मेघगर्जनेसह हलक्या ते मध्यम सरींची शक्यता आहे.

कोसळधारेने कांचनगंगा नदीला पूर

बुलढाणा जिल्ह्यातील मेहकर तालुक्यातील डोणगाव परिसरात शनिवारी रात्री व रविवारी सकाळी दमदार पाऊस पडल्याने सर्वत्र जलमय वातावरण तयार झाले. डोणगावच्या कांचनगंगा नदीला पूर आल्याने मुंबई ते नागपूर राज्य महामार्ग रविवारी पहाटे साडेतीन वाजतापासून सकाळी साडेसहा वाजेपर्यंत बंद झाला होता. यामुळे वाहनधारक व प्रवाशांना ताटकळत पूर ओसरण्याची प्रतीक्षा करावी लागली.

मराठवाड्यात पावसाला सुरुवात

मराठवाड्यात पाऊस सक्रिय झाला असून, गेल्या २४ तासांत विभागात सरासरी ८.३ मिलिमीटर पावसाची नोंद झाली आहे. येत्या दोन जुलैपर्यंत लातूर जिल्ह्याचा अपवाद वगळता सर्वत्र विजांच्या कडकडाटासह जोरदार पावसाची शक्यता हवामान विभागाने वर्तवली आहे. प्रादेशिक हवामान खात्याच्या अंदाजानुसार मध्य महाराष्ट्र आणि मराठवाड्यात सोमवारी ताशी ४० तस ५० किमी वेगाने वाहणाऱ्या वाऱ्यांसह हलका ते मध्यम स्वरूपाचा पाऊस होण्याची शक्यता आहे. छत्रपती संभाजीनगर, जालना, परभणी, बीड, हिंगोली, नांदेड जिल्ह्यातही तुरळक ठिकाणी पाऊस पडेल.

नाशिकमध्ये पावसाची हजेरी

सलग पाच दिवसांच्या विश्रांतीनंतर रविवारी दुपारनंतर नाशिकमध्ये पावसाने पुन्हा हजेरी लावली. शहरात सायंकाळी साडेपाचपर्यंत अवघा एक मिलिमीटर पाऊस नोंदविला गेला. काही भागांत जोरदार सरी कोसळल्या, तर अनेक ठिकाणी हलका पाऊस झाल्याने उकाड्यापासून काहीसा दिलासा मिळाला. जिल्ह्यात सोमवार (दि. २९) आणि मंगळवारी (दि. ३०) यलो अलर्ट देण्यात आला आहे.

सोलापूर शहर, जिल्ह्यातपावसाची जोरदार हजेरी

सोलापूर शहर आणि जिल्ह्याच्या ग्रामीण भागात रविवारी दुपारनंतर सायंकाळपर्यंत पावसाने दमदार हजेरी लावली. सोलापूर शहरातील अनेक रस्ते पाण्याखाली गेले; तर काही भागातील परिसर जलमय झाल्यामुळे नागरिकांचे मोठे हाल झाले.

विदर्भात पावसाचा जोर वाढणार

संपूर्ण विदर्भातलही पावसाचा जोर वाढण्याची शक्यता आहे विजांच्या कडकडाटासह मुसळधार पावसाचा अंदाज वर्तवण्यात आला आहे. त्यामुळे अनेक भागांमध्ये यलो अलर्ट देण्यात आला आहे. चंद्रपूर, नागपूर, गडचिरोली, वाशिम, यवतमाळ, बुलढाणा, वर्धा, गोंदिया जिल्ह्यांमध्ये यलो अलर्ट जारी केला असून अमरावती जिल्ह्याला ऑरेंज अलर्ट देण्यात आला आहे.

पश्चिम महाराष्ट्रातही पावसाची दमदार हेजरी

पश्चिम महाराष्ट्रात पुणे, सातारा घाटमाथा परिसर आणि सांगली जिल्ह्यांमध्ये २९ जून रोजी वादळी वाऱ्यासह मुसळधार पावसाची शक्यता आहे. पुण्यासह घाटमाथा परिसरात पावसाचा जोर वाढेल. तसेच, कोल्हापूर आणि सोलापूर जिल्ह्यांमध्येही आज मुसळधार पावसाचा अंदाज आहे. सातारा, पुणे आणि सांगली जिल्ह्यांना यलो अलर्ट देण्यात आला आहे.