Sonam wangchuk hunger strike abhijeet dipke father bhagwanrao dipke attack on pm narendra modi; नरेंद्र मोदींना मूलबाळ नाही, त्यामुळे त्यांना जनतेचं देणंघेणं नाही; दिपकेच्या वडिलांची घणाघाती टीका, उपोषणाबद्दल मोठी घोषणा

सुशील राऊत, छत्रपती संभाजीनगर: “लोकशाहीमध्ये ही भारतीय लोकांची चूक आहे की त्यांनी अशा व्यक्तीला निवडून दिलंय की ज्याला संसाराचा कुठलाही व्याप नाही, मूल नाही, कुटुंबात कोणत्या गोष्टी लागतात, याचं या व्यक्तीला काहीही देणंघेणं नाही. जो मोकाट सुटलेला सांड आहे, अशा माणसाला जनतेनं पंतप्रधानपदी बसवलं आहे. त्याचे परिणाम आता सगळा देश भोगत आहे,” असं म्हणत कॉक्रोच जनता पार्टीचा संस्थापक अभिजीत दिपके याचे वडील भगवानराव दिपके यांनी पंतप्रधान नरेंद्र मोदी यांच्यावर घणाघाती टीका केली. नीट पेपरफुटीच्या पार्श्वभूमीवर केंद्रीय शिक्षणमंत्री धमेंद्र प्रधान यांनी राजीनामा द्यावा, या मागणीसाठी दिल्लीतील जंतर मंतरवर उपोषण करणाऱ्या सोनम वांगचुक यांना पोलिसांनी जबरदस्तीने उपोषणस्थळाहून हटवल्यानंतर भगवानराव दिपके यांनी ही आक्रमक प्रतिक्रिया दिली आहे.

भगवानराव दिपके पुढे म्हणाले की, “मनुष्य प्राणी सर्वश्रेष्ठ आहे. गाढव, डुक्कर, कुत्रे या प्राण्यांपैकी एक, नरेंद्र मोदी या प्राण्याला परमेश्वराने सुबुद्धी द्यावी की या मुलांचे ऐकावे आणि धर्मेंद्र प्रधानांचा राजीनामा घ्यावा. आता माझी सर्व भीती मरून गेली आहे, मी कोणाच्या बापाला भरणार नाही. लोकशाही धोक्यात आली आहे आणि ही गुलामगिरीकडे चाललेली सुरुवात आहे. विद्यार्थ्यांच्या मागण्या मान्य कराव्या,” असे आवाहन दिपके यांनी केले. रविवारपासून ते स्वतः देखील मुलासोबत उपोषणाला बसणार आहेत.

“माझा मुलगा परदेशात मस्त सेटल झाला होता. त्याला कर्ज काढून शिकवले होते. पण, नीट पेपर लीक प्रकरणातील विद्यार्थ्यांच्या आत्महत्या पाहून तो भावनेच्या भरात भारतात आला. मी त्याला खूप विनंती केली होती की, इकडे येऊ नको, इथले सरकार आणि वातावरण चांगले नाही. पण, त्याने ऐकले नाही. आता तो उपोषणाला बसला आहे, त्याची आई-वडील म्हणून आम्हाला काळजी वाटणारच ना?” अशा शब्दांत अभिजीत दिपकेचे वडील भगवानराव दिपके यांनी आपल्या भावना व्यक्त केल्या. तर, त्याची आई अनिता दिपके यांनी, “सरकार निर्दयी झाले आहे. लहान मुलाने बिस्किटचा पुडा मागितला तरी आई-वडील देतात, पण हे सरकार मुलांच्या हक्कांकडे दुर्लक्ष करत आहे,” असा संतप्त आरोप केला.

“वांगचुक सरांसारखे अभिजीतला उचलले तर आम्ही काय करणार?”

अभिजीत दिपके याच्या आई अनिता दिपके यांनी सोनम वांगचुक यांच्या अटकेचा हवाला देत सरकारवर टीका केली. “सकाळी वांगचुक सरांना जसे पडदा टाकून गपचूप उचलून नेले, तसेच जर अभिजीतबाबत झाले तर आम्ही काय करणार? सरकारला कशाचा अहंकार आहे? त्यांनी दुसरा मंत्री दिला असता, तरी मुलांना वाटले असते की आपले ऐकले. माझा मुलगा महिनाभरापासून परेशान आहे, न खाता-पिता तिथे आहे. ज्यांना मुले-बाळे नाहीत, त्यांना लेकरांची किंमत नसते. आम्ही रविवारपासून त्याच्यासोबत उपोषणाला बसणार आहोत,” असे त्यांनी सांगितले.

“मी कर्ज काढून शिकवले, तो हट्टापोटी भारतात आला”

अभिजीतचे वडील भगवानराव दिपके यांनी मुलाच्या निर्णयावर आणि देशातील परिस्थितीवर भाष्य केले. “तो काही मुरलेला राजकारणी नाही, तो केवळ शिक्षण पूर्ण करून आलेला नागरिक आहे. विद्यार्थ्यांच्या हक्कासाठी त्याने ‘कॉक्रोच पार्टी’ काढली, जिला लाखो लोकांनी पाठिंबा दिला. मी त्याला इकडे येऊ नको असे सांगितले होते, कारण जी. डी. अगरवाल यांच्यासारख्या गंगा शुद्धीकरणासाठी लढणाऱ्या मोठ्या माणसांची काळजी कोणी घेतली नाही. आता त्याची भीती वाटतेय. भारतीय लोकांनी अशा व्यक्तीला पंतप्रधानपदी बसवले आहे की ज्याला कुटुंबाचे काही देणेघेणे नाही,” असा गंभीर आरोप त्यांनी केला.