बंगालच्या उपसागरात तयार झालेली द्रोणीय स्थिती आणि पश्चिम किनारपट्टीवर महाराष्ट्रापासून केरळपर्यंत किनारपट्टीला समांतर कमी दाबाचा पट्टा सध्या सक्रिय आहे. त्यामुळे मध्य महाराष्ट्र, सह्याद्री आणि कोकण पट्ट्यात सध्या पाऊस पडतो आहे. पुढील दोन दिवस पोषक वातावरण राहणार असल्याने पाऊसही सुरू राहणार असल्याचा अंदाज भारतीय हवामानशास्त्र विभागाने व्यक्त केला आहे.
पुणेकरांनी रविवारी सुटीच्या दिवशी दिवसभर संततधार आणि संध्याकाळी मुसळधार पाऊस अनुभवला. रात्रीनंतर पावसाचा जोर वाढत गेला आणि सोमवारी सकाळी १० वाजेपर्यंत मध्यम स्वरूपाचा पाऊस सुरूच होता. दुपारी एकच्या सुमारास संपूर्ण शहरात मोठी सर पडली. दिवसभर अधूनमधून हलक्या सरी पडतच राहिल्या. त्यामुळे मध्यवर्ती पुण्यासह उपनगरांमधील वाहतूक संथ झाली होती. रस्त्यावर ठिकठिकाणी साठलेले पाणी, खड्ड्यांमधून वाट काढताना नागरिकांची गैरसोय झाली. जिल्ह्याधिकाऱ्यांनी शाळांना सुट्ट्या दिल्या होत्या, त्यामुळे मुलांना पालकांनी घराबाहेर पाठवलेच नाही.
मुसळधार पावसाच्या पार्श्वभूमीवर महापौरांनी शहरातील विविध भागांत पाहणी केली. नागरिकांच्या तक्रारी ऐकून त्यांनी व्यवस्थापन कक्षाला भेट देऊन आढावा घेतला.
२४ तासांत झाडपडीच्या ८३ घटना
शहरात रविवारी सायंकाळनंतर झालेल्या मुसळधार पावसासह सोसाट्याच्या वाऱ्याने शहराच्या विविध भागांत अनेक झाडे आणि फांद्या कोसळल्या. अनेक ठिकाणी रस्ते काही काळ बंद ठेवावे लागले, तर झाडे हटविण्यासाठी अग्निशमन दल आणि महापालिकेच्या पथकांना धावपळ करावी लागली. महापालिकेच्या आपत्ती व्यवस्थापन विभागाच्या माहितीनुसार, रविवारी सायंकाळी पाच ते सोमवारी सायंकाळी पाच या २४ तासांत शहरात झाडपडीच्या ८३ घटना नोंदविण्यात आल्या. येरवडा, हडपसर, शिवाजीनगर, लोहगाव, पाषाण, कोथरूड, सेनापती बापट रस्ता, मार्केट यार्ड, सदाशिव पेठ, कसबा पेठ, विमाननगर, ताडीवाला रस्ता, कर्वेनगर, नारायण पेठ, वारजे-माळवाडी, एरंडवणे, नामदार गोपाळ कृष्ण गोखले रस्ता, जंगली महाराज रस्ता, बाणेर, बिबवेवाडी, बावधन, आंबेगाव, औंध, डेक्कन, वडगाव शेरी आणि कात्रज परिसरात झाडे किंवा मोठ्या फांद्या पडल्या.
या घटनांत १५ ते २० दुचाकी आणि सात ते आठ कारचे नुकसान झाले. सुदैवाने या घटनांमध्ये कोणतीही जीवितहानी झाल्याचे वृत्त नाही. झाडे पडल्याच्या घटनांची माहिती मिळताच महापालिकेचा आपत्ती व्यवस्थापन विभाग, अग्निशमन दल आणि संबंधित क्षेत्रीय कार्यालयांची पथके घटनास्थळी दाखल झाली. रस्त्यावर पडलेली झाडे आणि फांद्या तातडीने हटवून वाहतूक पूर्ववत करण्यात आली. पावसाळ्यात जोरदार वाऱ्यामुळे अशा घटनांची शक्यता कायम असल्याने नागरिकांनी मोठ्या झाडांखाली वाहने उभी न करण्याबरोबरच वादळी पावसाच्या वेळी आवश्यक खबरदारी घेण्याचे आवाहन प्रशासनाने केले आहे.
सोमवार पेठेतील धनगर गल्ली परिसरात एक दुमजली वाडा सोमवारी सायंकाळी कोसळला. हा वाडा साधारण तीन महिन्यांपूर्वी धोकादायक म्हणून रिकामा केला होता. त्यामुळे येथे कोणतीही जीवितहानी घडली नाही. नाना पेठेतील साखळीपीर तालीम परिसरात मुसळधार पावसामुळे एका परिसरातील भिंत अचानक कोसळली. भिंत कोसळताना तेथे उभ्या असलेल्या तीन दुचाकींचे नुकसान झाले. घटनेनंतर परिसरात काही काळ घबराट पसरली होती.
