पणजी : E20 पेट्रोलच्या वापराबाबत गोव्यातील नागरिकांच्या तक्रारी जाणून घेण्यासाठी आम आदमी पक्षाचे राष्ट्रीय संयोजक अरविंद केजरीवाल यांनी विशेष व्हॉट्सॲप क्रमांक सुरू केला आहे. वाहनधारकांनी E20 इंधनामुळे उद्भवणाऱ्या समस्या आणि आपले अनुभव 76698 03441 या क्रमांकावर संदेशाद्वारे पाठवावेत, असे आवाहन त्यांनी केले आहे.
E20 पेट्रोलच्या मुद्द्यावरून केंद्र सरकारवर टीका करत केजरीवाल यांनी गोमंतकीयांना 25 ऑगस्ट रोजी दुपारी 3 वाजता पणजीतील विवांता येथे आयोजित टाऊनहॉलमध्ये सहभागी होण्याचे आवाहन केले. या कार्यक्रमात नागरिकांना आपल्या समस्या आणि तक्रारी थेट मांडता येणार आहेत.
‘हजारो नागरिकांकडून तक्रारी’
केजरीवाल यांच्या म्हणण्यानुसार, त्यांच्या यापूर्वीच्या गोवा दौऱ्यात त्यांनी E20 पेट्रोलमुळे वाहनधारकांना भेडसावणाऱ्या अडचणींचा मुद्दा उपस्थित केला होता. त्यानंतर नागरिकांना आपल्या तक्रारी पाठवण्याचे आवाहन करण्यात आले. त्याला प्रतिसाद देत गोमंतकीयांकडून मोठ्या प्रमाणात व्हॉट्सॲप संदेश आणि प्रतिक्रिया प्राप्त झाल्याचा दावा त्यांनी केला.
काही वाहनधारकांनी पूर्वीच्या तुलनेत वाहनांचे मायलेज कमी झाल्याची तक्रार केल्याचे केजरीवाल यांनी सांगितले. तसेच इंजिनची कार्यक्षमता, वाहनाचा पिकअप आणि इंधन टाकीशी संबंधित समस्यांच्याही तक्रारी आल्याचे त्यांनी नमूद केले.
‘महागडी दुरुस्ती करण्यापेक्षा शुद्ध पेट्रोल परवडेल’
E20 इंधनामुळे वाहनांच्या देखभालीचा खर्च वाढत असल्याचा दावा करत केजरीवाल यांनी पेट्रोलच्या दरवाढीवरही प्रश्न उपस्थित केले. वाहन दुरुस्तीवर मोठा खर्च करण्यापेक्षा अधिक पैसे देऊन कमी मिश्रणाचे किंवा शुद्ध पेट्रोल घेणे काही वाहनधारकांना परवडेल, अशी भूमिका त्यांनी मांडली.
इथेनॉल निर्मितीसाठी मोठ्या प्रमाणावर ऊस वळवण्यात आल्याने साखरेच्या दरावर परिणाम झाल्याचा दावाही त्यांनी केला. त्यांच्या मते, इथेनॉल धोरण लागू करण्यापूर्वी उत्पादन, अन्नधान्य आणि ग्राहकांवरील संभाव्य परिणामांचा पुरेसा विचार होणे आवश्यक होते.
केंद्र सरकारच्या धोरणावर टीका
इथेनॉल मिश्रणामुळे कच्च्या तेलाची आयात कमी होऊन परकीय चलनाची बचत होईल, असा सरकारचा युक्तिवाद आहे. मात्र, साखर किंवा इतर वस्तूंच्या आयातीची गरज वाढल्यास या बचतीचा अपेक्षित फायदा कमी होऊ शकतो, असा दावा केजरीवाल यांनी केला.
E20 नंतर भविष्यात E30, E40 आणि E85 सारख्या अधिक प्रमाणातील इथेनॉल मिश्रणाकडे जाण्याच्या धोरणावरही त्यांनी प्रश्न उपस्थित केला. वाहनांवर होणारे संभाव्य परिणाम लक्षात घेऊन पुरेशा वैज्ञानिक चाचण्या आणि अभ्यास केल्यानंतरच असे निर्णय घ्यावेत, अशी मागणी त्यांनी केली.
‘ऑटोमोबाईल उद्योगावर दबाव’
E20 इंधनाच्या समर्थनार्थ भूमिका मांडण्यासाठी ऑटोमोबाईल उद्योगातील संबंधित घटकांवर सरकारकडून दबाव आणला जात असल्याचा आरोप केजरीवाल यांनी केला. नागरिकांच्या समस्या ऐकून घेण्याऐवजी धोरणाला समर्थन मिळवण्यासाठी दबाव टाकला जात असल्याचा दावा त्यांनी केला.
E20 मुळे वाहनधारकांना येणाऱ्या समस्या दूर करण्याआधी आणि आवश्यक चाचण्या पूर्ण करण्यापूर्वी अधिक प्रमाणातील इथेनॉल मिश्रण लागू करण्याची घाई का केली जात आहे, असा सवाल त्यांनी उपस्थित केला.
नवीन वाहन घेणाऱ्यांना आवाहन
नवीन वाहन खरेदी करण्याचा विचार करणाऱ्या नागरिकांनी वाहन घेण्यापूर्वी सरकारच्या सध्याच्या आणि भविष्यातील इंधन धोरणाची माहिती घ्यावी, असे आवाहनही केजरीवाल यांनी केले.
दरम्यान, 25 ऑगस्ट रोजी दुपारी 3 वाजता विवांता, पणजी येथे होणाऱ्या टाऊनहॉलमध्ये गोमंतकीयांनी मोठ्या संख्येने सहभागी व्हावे, असे आवाहन करण्यात आले आहे. E20 पेट्रोलमुळे समस्या निर्माण झालेल्या वाहनधारकांनी आपले अनुभव 76698 03441 या व्हॉट्सॲप क्रमांकावर पाठवावेत, असेही आपकडून सांगण्यात आले आहे.
