Crime News: हॅलो, पोलीस स्टेशन! दागिन्यांच्या दुकानातून चोरांचा थेट पोलिसांना कॉल, चक्रावून टाकणारा प्रकार

दागिन्यांच्या दुकानात चोरी करण्यासाठी मध्यरात्रीच्या सुमारास दोघे जण शिरले होते. चोर शिरल्याचा सुगावा स्थानिकांना लावला. त्यांनी दुकानाचं शटर बाहेरून बंद करून घेतलं. त्यामुळे चोर दुकानातच अडकले. बाहेर असलेला जमाव आपली यथेच्छ धुलाई करेल, अशी भीती चोरट्यांना वाटत होती. त्यामुळे त्यांनी थेट पोलिसांनाच कॉल लावला.

पोलिसांनी दिलेल्या माहितीनुसार, उत्तर प्रदेशात राहणारा ३२ वर्षीय दिनेश सोनकर आणि २७ वर्षीय विपिन पाठक हे दोघे संजान येथील बी. आर. ज्वेलरी शॉपमध्ये शिरले. दिनेश पालघरमधील बोईसरमध्ये राहतो. तर त्याचा साथीदार विपिन नालासोपाऱ्यात वास्तव्यास आहे. दोघांनी चोरीची योजना आखून संजान गाठलं होतं.

पोलिसांनी दिलेल्या माहितीनुसार, ही घटना वलसाडच्या उमरगाम तालुक्यातील संजान भागात गुरुवारी मध्यरात्री तीनच्या सुमारास घडली. दोन्ही चोरांनी रात्रीच्या अंधारात दुकानाच्या शटरचं कुलूप कापून आत प्रवेश केला. यानंतर त्यांनी दुकानातील दागिने, मौल्यवान वस्तू आणि रोकड बॅगेत भरली. दुकानात होत असलेल्या आवाजानं आसपास राहणाऱ्यांची झोपमोड झाली.

याचवेळी परिसरातील वीज गेली. त्यामुळे बरेच स्थानिक लोक घराबाहेर पडले. दुकानाच्या आसपास बरीच वर्दळ सुरू झाली. दुकानातून आवाज येत असल्यानं सगळे सावध झाले. बघता बघता अनेक जण दुकानाच्या बाहेर जमले. दुकानात हालचाल सुरू असल्याचं लक्षात येताच लोकांनी शटर खाली ओढून गेलं. त्यामुळे चोरी आतच अडकले.

पुढच्या काही मिनिटांत दुकान मालक मनीष शर्मा घटनास्थळी पोहोचले. तोपर्यंत बाहेरची गर्दी बरीच वाढली होती. बाहेरच्या गर्दीचा अंदाज आल्यावर चोरटे घाबरले. दुकानाबाहेर पडल्यावर लोक बेदम मारतील, याची भीती त्यांना वाटू लागली. त्यामुळे दिनेश सोनकरनं स्वत: आपत्कालीन क्रमांक ११२ वर कॉल केला.

आपण एका दागिन्यांच्या दुकानात अडकलो आहोत आणि बाहेर बरीच गर्दी जमली आहे. तू लवकर या आणि आम्हाला वाचला, अशी कळकळीची विनंती सोनकरनं पोलीस नियंत्रण कक्षाकडे केली. यानंतर पोलीस घटनास्थळाकडे रवाना झाले. तेव्हा त्यांना स्थानिकांचेही कॉल आले. दागिन्यांच्या दुकानात चोर शिरल्याची माहिती त्यांना देण्यात आली. पोलीस घटनास्थळी पोहोचल्यावर आरोपींनी शटर उघडलं. पोलिसांनी त्यांना तातडीनं अटक केली. परिसरातील वीज पुरवठा खंडित झाल्यानं चोरीचा प्रयत्न फसला.