नात्यांमधली गंमत न्यारी
गेल्या काही काळामध्ये आलेल्या कौटुंबिक सीरिजचं वेगळेपण म्हणजे प्रत्येक कलाकृतीमध्ये नात्यांचे वेगवेगळे पदर उलगडून दाखवण्यात आले. नात्यांमधील गोडवा सांगता सांगता त्यातील दुरावे, प्रश्न मांडून ते सोडवण्याचा मार्गही दाखवण्यात आला,याचं उत्तम उदाहरण म्हणजे ‘परफेक्ट फॅमिली’ ही सीरिज होय. त्याचसोबत अलीकडे आलेल्या ‘अगं आई, अहो आई‘ या मराठी सीरिजमध्ये आई-लेक आणि सासू-सून या दोन्ही नात्यांमधील पदर अगदी सहजपणे उलगडवून दाखवण्यात आले.
‘फॅमिली ड्रामा’ ही धाटणी प्रेक्षकांच्या पसंतीस उतरण्याचं आणखी एक कारण म्हणजे त्या कलाकृतींमध्ये झळकणारे चेहरे प्रेक्षकांना आपलेसे वाटू लागतात. यात नेहमीच्या कलाकारांना प्राधान्य देण्यासह नव्या जोड्यांचा प्रयोगही केला जातो. ‘हे काय नवीन?’ या मराठी सीरिजमध्ये प्रिया बापट उमेश कामत ही लोकप्रिय जोडी चमकली तर ‘द आम आदमी फॅमिली’, ‘घर वापसी’, ‘फॅमिली किराना स्टोर’ यासारख्या कलाकृतींमध्ये वेगळा प्रयोग करण्यात आला. विशेष म्हणजे या सगळ्यांना प्रेक्षकांनी डोक्यावर घेतलं, कारण त्यांना ते त्यांच्यातले वाटले.
Tanushree Dutta : ‘सेटवरच्या काही लोकांनी मला एकटं पाडलं, बळीचा बकरा बनवलं’, तनुश्री दत्ताचा बॉलिवूडवर निशाणा; सांगितला कटू अनुभव
‘फील गूड’चा प्रत्यय
एखाद्या गावातील हमरस्त्यावर घडणारा प्रसंग असो वा जोडप्यांनी आशेनं सजवलेलं नवं घर असो, या सगळ्यातून ‘फील गूड फॅक्टर’ची अनुभूती प्रेक्षकांना दिली जाते. गावातील साधंसं घर ते शहरातील छोट्याशा फ्लॅटमध्ये घडणारी गोष्ट रंगवून सांगितली जाते, यामुळे प्रेक्षकांशी असलेला ‘कनेक्ट’ वाढवला जातो. ‘आपणही असंच घर सजवू या’ किंवा ‘आपलंही गावी एक कौलारू घर असायला हवं’, असे विचार रुजवले जातात आणि प्रेक्षकांना स्वप्नरंजन करण्यास भाग पाडलं जातं.
जुन्या कलाकृतींचा नव्यानं आस्वाद
सण-उत्सव किंवा सुट्टीच्या काळात संपूर्ण कुटुंब एकत्र जमलं की, ‘ये मेरी फॅमिली’, ‘गुल्लक’, ‘पंचायत’, ‘व्हॉट् द फोक्स’, ‘हॅपी फॅमिली कंडिशन्स अप्लाय’, ‘दुपहिया’ यासारख्या जुन्या सीरिज बिंज वॉच केल्या जातात. यामुळे बालपणीच्या आठवणींना उजळा, लुप्त झालेली एकत्र कुटुंब पद्धती आणि छोट्या-छोट्या प्रसंगांमधून घडणारी गंमत हे सगळं अनुभवायला मिळत असल्यामुळे ‘फॅमिली बिंज’कडे कल वाढतोय.
