14 वर्षांचा संसार तुटला, सानिया थरथर कापू लागली; फराह खान शूट सोडून मदतीला धावली, त्यादिवशी नेमकं काय घडलं होतं?

टेनिस कोर्टवर आपल्या आक्रमक खेळाने भल्याभल्या प्रतिस्पर्ध्यांना घाम फोडणारी भारताची स्टार टेनिसपटू सानिया मिर्झा (Sania Mirza) हिने व्यावसायिक आयुष्यात यशाची अनेक शिखरं पादाक्रांत केली. आपल्या टेनिस रॅकेटच्या जोरावर तिने जगभरात भारताची मान उंचावली. मात्र, कोर्टवर अत्यंत खंबीर दिसणाऱ्या सानियाला वैयक्तिक आयुष्यात एका मोठ्या वादळाचा सामना करावा लागला. पाकिस्तानी क्रिकेटर शोएब मलिकसोबत (Shoaib Malik) १४ वर्षांचा संसार मोडल्यानंतर सानिया आतून पूर्णपणे कोलमडली होती. या कठीण काळाबद्दल आणि तिला आलेल्या ‘पॅनिक अटॅक’बद्दल सानियाने तिच्या शोमध्ये मनमोकळ्या गप्पा मारल्या होत्या.

सानियाने तिचा यूट्यूब शो ‘सर्व्हिंग इट अप विथ सानिया’ (Serving It Up With Sania) सुरू केलेला आहे. काही महिन्यांपूर्वी या शोमध्ये तिची खास मैत्रीण आणि प्रसिद्ध बॉलिवूड कोरिओग्राफर फराह खान (Farah Khan) हिने हजेरी लावली होती. या दोघींच्या संवादादरम्यान पडद्यामागचा एक अत्यंत भावनिक आणि हादरवून सोडणारा किस्सा समोर आला होता.

घटस्फोटानंतरचा काळ आणि व्यावसायिक काम यांच्यात समतोल राखताना सानियाची काय अवस्था झाली होती, हे सांगताना तिला अश्रू अनावर झालेले या शोमध्ये पाहायला मिळाले. एका लाईव्ह शोच्या आधी आलेल्या पॅनिक अटॅकची आठवण सांगताना सानिया म्हणाली, “खरंतर मला कॅमेऱ्यासमोर या गोष्टीचा उल्लेख करायचा नव्हता. पण तो माझ्या आयुष्यातील सर्वात वाईट आणि अंधकारमय क्षणांपैकी एक होता. मला एका लाईव्ह शोसाठी जायचं होतं, पण मी आतून इतकी तुटले होते की मी अक्षरशः थरथर कापत होते.” फराहचे आभार मानताना सानिया पुढे म्हणाली, “त्यावेळी फराह, तू माझ्या सेटवर आलीस. जर तू त्या दिवशी तिथे नसतीस, तर मी तो शो करूच शकले नसते. तू मला धीर दिलास आणि म्हणालीस की, काहीही झालं तरी तू हा शो करणार आहेस.”

सानियाची ती अवस्था पाहून फराह खानलाही मोठा धक्का बसला होता. त्या दिवसाची आठवण सांगताना फराह म्हणाली, “मी खूप घाबरले होते. मी तुला याआधी कधीही अशा अवस्थेत, पॅनिक अटॅक येताना पाहिलं नव्हतं. त्या दिवशी माझं स्वतःचं शूटिंग सुरू होतं, पण तुझी अवस्था समजताच मी माझं शूटिंग तिथेच सोडून दिलं आणि पायातल्या चप्पल अन् अंगावरच्या पायजम्यावरच थेट तुझ्या सेटवर धावत आले होते.”

या मनमोकळ्या संवादादरम्यान फराह खानने सानियाच्या खंबीरपणाला दाद दिली. फराहने नमूद केले की, “आज तू एक सिंगल मदर आहेस आणि या जगात एका सिंगल मदरपेक्षा कठीण दुसरं काहीही नाही. हे खूप आव्हानात्मक आहे, पण तू तुझा मुलगा इझानला अत्यंत उत्तम प्रकारे वाढवत आहेस. आपल्या सर्वांचा एक प्रवास असतो आणि जो मार्ग आपल्यासाठी सर्वात योग्य असतो, तोच आपल्याला निवडावा लागतो.”

दरम्यान, सानिया मिर्झा आणि पाकिस्तानी क्रिकेटपटू शोएब मलिक २०१० मध्ये विवाहबंधनात अडकले होते. या दोघांना इझान नावाचा एक मुलगा आहे. मात्र, १४ वर्षांच्या संसारानंतर त्यांनी कायदेशीररित्या वेगळे होण्याचा निर्णय घेतला. त्यानंतर शोएबने पाकिस्तानी अभिनेत्री सना जावेदशी तिसरा विवाह केला. या सर्व घडामोडींनंतर सानियाने स्वतःला अत्यंत खंबीरपणे सावरले असून, ती आता आपल्या मुलाच्या संगोपनावर आणि स्वतःच्या करिअरवर लक्ष केंद्रित करत आहे. सानियाच्या या खडतर प्रवासात फराह खानसोबतच्या घट्ट मैत्रीने तिला नैराश्यातून बाहेर काढण्यात मोठी भूमिका बजावली आहे.