जरा विचार करा, तुमच्याकडे एखाद्या स्किनकेअर उत्पादनाची कल्पना असेल आणि ते फक्त 3 महिन्यांत लॉन्च होईल. ना कारखाना उभारण्याची गरज पडली, ना संशोधन प्रयोगशाळेची. हेच मॉडेल दक्षिण कोरियाच्या सौंदर्य उद्योगाला (K-ब्यूटी) जागतिक पॉवरहाऊस बनवत आहे. याची व्यावसायिक रचना दिग्गज सेमीकंडक्टर कंपनी टीएसएमसीसारखी आहे. जसे टीएसएमसी इतरांच्या (उदा. ॲपल) डिझाइनवर चिप्स बनवते, तसेच ओडीएम (ओरिजिनल डिझाइन मॅन्युफॅक्चरर) कंपन्या नवीन ब्रँड्सच्या कल्पनांना उत्पादनांमध्ये रूपांतरित करत आहेत. या व्यवसाय मॉडेलच्या केंद्रस्थानी कोलमार कोरिया आणि कॉसमॅक्ससारख्या कंपन्या आहेत, ज्या स्वतःचा कोणताही ग्राहक ब्रँड विकत नाहीत. त्यांचे काम संशोधन, उत्पादन विकास आणि उत्पादन करण्यापुरते मर्यादित आहे. कोलमारने 2024 मध्ये अशी प्रणाली तयार केली, ज्यामुळे कल्पनेला तयार उत्पादनात बदलण्याचा वेळ 9-12 महिन्यांवरून फक्त 3 महिन्यांपर्यंत कमी झाला. त्यांच्याकडे नेहमी 150 हून अधिक अर्ध-तयार उत्पादनांची कॅटलॉग असते, ज्यामुळे नवीन उद्योजकांसाठी सुरुवातीचा खर्च आणि धोका कमी होतो. अनोख्या व्यवसाय मॉडेलमुळे दक्षिण कोरियामध्ये स्वतःची फॅक्टरी नसतानाही कॉस्मेटिक्सचा व्यवसाय करणाऱ्या कंपन्यांची संख्या २०२५ मध्ये वाढून २८,४१२ झाली. हे एका दशकापूर्वीच्या तुलनेत ४ पट जास्त आहे. मेडेका क्रीम आणि मॅन्यो सारख्या यशस्वी स्किनकेअर लाइन्स याच मॉडेलची देणगी आहेत. उत्पादनाची जबाबदारी बाहेरील कंपन्यांवर असल्यामुळे, नवीन ब्रँड्स पूर्ण लक्ष फक्त मार्केटिंग, ब्रँडिंग आणि विक्रीवर केंद्रित करू शकतात. या मॅन्युफॅक्चरिंग मॉडेलच्या जोरावर दक्षिण कोरियामध्ये कॉस्मेटिक्सचे उत्पादन १७.९ ट्रिलियन वॉन (१.१९ लाख कोटी रुपये) च्या विक्रमी पातळीवर पोहोचले. २०२५ मध्ये दक्षिण कोरियाची कॉस्मेटिक्स निर्यात १२% नी वाढून १ लाख कोटी रुपयांच्या वर गेली. यामुळे दक्षिण कोरियाने अमेरिकेला मागे टाकून फ्रान्सनंतर जगातील दुसरा सर्वात मोठा ब्युटी प्रोडक्ट निर्यातक देश बनला. तथापि, ‘के-ब्यूटी’च्या या जबरदस्त यशावर आता ‘सी-ब्यूटी’चे संकट घोंघावत आहे. चीनच्या कंपन्या दक्षिण कोरियाचेच करार उत्पादन मॉडेल अवलंबून वेगाने नवीन ब्रँड्स बाजारात आणत आहेत. ज्या सूत्राने कोरिया जागतिक नेता बनला, आता त्याच सूत्राची नक्कल करून चीन त्याच्यासमोर तीव्र स्पर्धा निर्माण करत आहे. सरकारच्या मदतीने विस्ताराचा मार्गही सोपा केवळ उत्पादनच नाही, तर दक्षिण कोरियाच्या सीजे ऑलिव्ह यंगसारख्या रिटेल नेटवर्क्सनेही नवीन ब्रँड्सना जागतिक व्यासपीठ दिले. याची १,४०० हून अधिक दुकाने पर्यटकांच्या आकर्षणाचे केंद्र आहेत, तर याचे ई-कॉमर्स व्यासपीठ ६० देशांमध्ये सेवा देत आहे. कोरियन सरकारही २०२० पासून सौंदर्यप्रसाधनांना सेमीकंडक्टर आणि मनोरंजनाप्रमाणे प्रमुख निर्यात क्षेत्र मानून सबसिडी आणि कर्ज देत आहे. यामुळे या क्षेत्रासाठी विस्ताराचा मार्ग सोपा झाला आहे.
Source link
दक्षिण कोरिया जगाचे ब्यूटी हब बनत आहे:लोकांच्या कल्पनांतून तयार झालेले उत्पादन केवळ तीन महिन्यांत प्रत्यक्षात आणताहेत उत्पादन कंपन्या
