गर्दीत हात उचलला, दिपकेंची पहिली प्रतिक्रिया; कॉक्रोच पार्टीचा नागपुरात एल्गार – abhijeet dipke first reaction after slap incident during jaipur protest

जयपूरमध्ये आंदोलन सुरू असताना काही अज्ञातांनी गर्दीचा फायदा घेत अभिजीत दिपके यांच्यावर थेट हात उचलला. आंदोलनादरम्यान जोरदार घोषणाबाजी सुरू होती, तर अभिजीत दिपके यांना त्यांच्या समर्थकांनी खांद्यावर घेतलं होतं. या आंदोलनालाही नागरिकांचा प्रचंड प्रतिसाद मिळाला होता, मोठ्या प्रमाणावर तरुण सहभागी झाले होते आणि मोठी गर्दी जमा झालेली. याच गर्दीत घुसून अज्ञात व्यक्ती दिपकेंच्या अंगावर धावून गेले आणि गर्दीचा फायदा घेऊन तिथून पळ काढला. या घटनेमुळे दिपके समर्थक चांगलेच आक्रमक झाले होते. पण त्यांना सोडून द्या, मारू नका असे आवाहन दिपकेंनी केले. या घटनेचा व्हिडिओ सोशल मिडियावर प्रचंड व्हायरल झाला. अनेकांनी या कृतीचा निषेध व्यक्त केला. दरम्यान यानंतर आज नागपुरात कॉक्रोच जनता पार्टीचे आंदोलन होत आहे. जयपूरमध्ये घडलेल्या प्रकारानंतर नागपुरात पोहोचताच दीपके यांनी आपली भूमिका स्पष्ट केली. आम्हाला घाबरवण्यासाठी हे सर्व सुरू आहे, पण आम्ही मागे हटणार नाही, यापुढेही आंदोलनावर ठाम राहणार, अशी भूमिका दिपके यांनी मांडली.