भाजपचा तरुण मतदारांवर विशेष फोकस; ‘जेन-झी’शी संवादासाठी विशेष टीम, स्मृती इराणी, विनोद तावडेंकडे पुन्हा मोठी जबाबदारी

नवी दिल्ली : देशातील तरुण मतदारांशी संपर्क अधिक मजबूत करण्यासाठी भारतीय जनता पक्षाने विशेष तयारी सुरू केली आहे. नव्या पिढीतील तरुणांशी थेट संवाद साधण्यासाठी पक्षाकडून ‘जेन-झेड संपर्क अभियान’ राबवण्यात येणार असून, त्यासाठी स्वतंत्र पथकाची स्थापना करण्यात आली आहे. या पथकात पक्षाध्यक्ष नितीन नवीन, राष्ट्रीय सरचिटणीस स्मृती इराणी आणि विनोद तावडे, गुजरातचे मंत्री हर्ष संघवी, छत्तीसगडचे मंत्री ओ. पी. चौधरी यांच्यासह अन्य नेत्यांचा समावेश करण्यात आला आहे.

पक्षातील वरिष्ठ सूत्रांनी दिलेल्या माहितीनुसार, या अभियानाच्या माध्यमातून तरुणांच्या अपेक्षा, चिंता आणि प्रश्न समजून घेण्याचा प्रयत्न केला जाणार आहे. तसेच तरुणांना भाजपच्या नेत्यांशी थेट संवाद साधण्याची आणि विविध विषयांवर आपली मते मांडण्याची संधी उपलब्ध करून दिली जाणार आहे.

तरुण मतदारांशी थेट संवाद साधण्याचा प्रयत्न

‘जेन-झेड संपर्क अभियान’ लवकरच सुरू होण्याची शक्यता आहे. संवाद, चर्चा आणि विविध उपक्रमांच्या माध्यमातून तरुणांपर्यंत पोहोचण्याचा पक्षाचा प्रयत्न असणार आहे. तरुण मतदारांमध्ये पक्षाचा संपर्क वाढवणे आणि त्यांच्या प्रश्नांशी थेट जोडले जाणे हा या अभियानाचा प्रमुख उद्देश असल्याचे सांगण्यात येत आहे.

या पथकात संघटनात्मक अनुभव असलेल्या नेत्यांसोबतच युवा नेतृत्वाला स्थान देण्यात आल्याने भाजपने नव्या पिढीपर्यंत पोहोचण्यासाठी व्यापक रणनीती आखल्याचे स्पष्ट होत आहे.

नव्या राष्ट्रीय संघाची पहिली बैठक

दरम्यान, भाजपचे राष्ट्रीय अध्यक्ष नितीन नवीन यांच्या अध्यक्षतेखाली शनिवारी पक्षाच्या नव्याने गठित राष्ट्रीय पदाधिकाऱ्यांची पहिली परिचय बैठक पार पडली. राष्ट्रीय पदाधिकारी म्हणून नितीन नवीन यांच्या नव्या कार्यकाळाची ही औपचारिक सुरुवात मानली जात आहे.

बैठकीपूर्वी ‘वंदे मातरम्’ची सर्व सहा कडवी सामूहिकपणे सादर करण्यात आली.

‘मोदी@25’ अभियानावरही चर्चा

या बैठकीत पंतप्रधान नरेंद्र मोदी यांच्या सार्वजनिक जीवनातील 25 वर्षे पूर्ण झाल्याच्या निमित्ताने राबवण्यात येणाऱ्या ‘मोदी@25’ अभियानावर चर्चा झाली. तसेच प्रत्येक राष्ट्रीय पदाधिकाऱ्याला सोपवण्यात आलेल्या जबाबदाऱ्या आणि त्यांच्या कार्यक्षेत्राचा आढावाही घेण्यात आला.

याशिवाय पुढील वर्षी होणाऱ्या सात राज्यांच्या विधानसभा निवडणुका आणि 2029 मधील लोकसभा निवडणुकीची तयारी यावरही बैठकीत चर्चा झाल्याचे सांगण्यात आले. आगामी निवडणुकांच्या पार्श्वभूमीवर संघटनात्मक बळकटीकरण आणि पक्षाच्या पुढील प्राधान्यक्रमांवरही विचारविनिमय करण्यात आला.

तरुण मतदारांशी संवाद वाढवण्याच्या या नव्या उपक्रमामुळे भाजपच्या आगामी राजकीय रणनीतीत नव्या पिढीला किती महत्त्व दिले जाणार, याकडे आता राजकीय वर्तुळाचे लक्ष लागले आहे.