Vidit Aatrey Success Story; IAS परीक्षेत अपयश, पहिला व्यवसाय बुडाला; मग ॲमेझॉन अन् फ्लिपकार्टला घाम फोडून उभारला 95 हजार कोटींचा बिझनेस

मग काय, नोकरी सोडली अन् एक स्टार्टअप सुरू केला. पण दुर्दैवाने पहिला व्यवसाय काही महिन्यांतच सपशेल अपयशी ठरला. त्यानंतर आणखी एक धक्का बसला पण, त्याने हार मानली नाही आणि आपल्या चुकांमधून शिकून नवीन मार्ग अवलंबला. आपल्या भूतकाळातील घेतलेल्या धाडसी निर्णयामुळे 95000 कोटींची मोठी ई-कॉमर्स कंपनी उभी केली, जी आज ॲमेझॉन आणि फ्लिपकार्ट यांसारख्या जागतिक कंपन्यांनाही कडवी टक्कर देत आहे.

स्वप्न अन् अपयशाच्या या टप्प्यातून विदित आत्रेने यशाचा इतिहास घडवला, जे भारतातील सर्वात लोकप्रिय सोशल ई-कॉमर्स प्लॅटफॉर्म ‘मीशो’चे सह-संस्थापक आणि सीईओ आहेत. 2012 मध्ये विदितने आयआयटी दिल्लीमधून इलेक्ट्रिकल इंजिनिअरिंगमध्ये पदवी पूर्ण केल्यानंतर FMCG क्षेत्रातील दिग्गज कंपनी ITC मध्ये रुजू झाले आणि त्यानंतर लाइमरोड या ई-कॉमर्स प्लॅटफॉर्ममध्ये सामील झाले, जिथे त्याला भारतीय ई-कॉमर्स उद्योगाची सखोल माहिती मिळाली.

विदितने परदेशी कंपन्यांचे अनुसरण करण्याऐवजी भारतातील लहान शहरांमध्येव्यवसाय कसा चालतो? हे समजून घ्यायचा प्रयत्न केला. 2015 मध्ये विदितने आणि त्याचा आयआयटीमधील सहकारी संजीव बर्नवालने स्थानिक दुकानांमधील कपडे ऑनलाइन विकण्याच्या उद्देशाने फॅशनिअर नावाचे हायपरलोकल फॅशन ॲप सुरू केले, पण योग्य व्यवसाय मॉडेलचा अभाव आणि ग्राहकांच्या थंड प्रतिसादामुळे उपक्रम काही महिन्यांतच बंद पडला.

सुरुवातीच्या अपयशाने खचून जाण्याऐवजी विदित आणि संजीव यांनी जमिनीवरील वास्तवाचे पुनर्मूल्यांकन केले. या दरम्यान, त्यांच्या लक्षात आले की भारतातील लहान शहरांमधील गृहिणी आणि छोटे दुकानदार व्हॉट्सॲप व फेसबुकच्या माध्यमातून कपडे आणि वस्तूंची रिसेल करायचे. ही कल्पना मोठ्या प्रमाणावर राबवण्यासाठी डिसेंबर 2015 मध्ये मीशो (मेरी शॉप) चा पाया घातला आणि असे व्यासपीठ तयार केले, जिथे कोणीही शून्य गुंतवणुकीत आपला स्वतःचा resale व्यवसाय सुरू केला.

2016 मध्ये मीशोच्या आकर्षक कार्यपद्धतीला ओळखून प्रसिद्ध अमेरिकन सिलिकॉन व्हॅली ॲक्सिलरेटर, Y Combinator ने मीशोची mentorship program साठी निवड केली. त्यावेळी भारतातून निवड झालेल्या मोजक्या स्टार्टअप्सपैकी मीशो एक होता आणि त्यानंतर मीशोने मागे वळून पाहिले नाही. कंपनीच्या व्यवसाय मॉडेलने प्रभावित होऊन सॉफ्टबँक, मेटा, प्रोसस आणि सेक्वोया यांसारख्या आघाडीच्या जागतिक गुंतवणूकदारांनी लाखो डॉलर्सची गुंतवणूक केली.

• एकीकडे ॲमेझॉन आणि फ्लिपकार्टने मोठ्या महानगरांमधील श्रीमंत ग्राहकांना लक्ष्य केले, तर मीशोने छोटी शहरे, गावे आणि ग्रामीण भारतातील मध्यमवर्गाला लक्ष्य केले.
• मिशोने छोट्या दुकान किंवा विक्रेत्यांकडून कोणतेही कमिशन न आकारणीचे क्रांतिकारक धोरण अवलंबले, ज्यामुळे कमिशनच्या भीतीमुळे ऑनलाइन बाजारात येण्यास संकोच करणारे लाखो छोटे दुकानदार मीशोमध्ये सामील झाले.
• मीशोने लाखो घरगुती गृहिणींना resaleद्वारे कमाईचे व्यासपीठे उपलब्ध करून दिले, ज्यामुळे तळागाळापर्यंत ब्रँडची तोंडी प्रसिद्धी झाली.

अशाप्रकारे, आजच्या काळात मिशो केवळ रिसेलिंग ॲप नाही, तर मोठे डायरेक्ट-टू-कन्झ्युमर – D2C – ई-कॉमर्स मार्केटप्लेस बनले आहे. मिशोवर वार्षिक 15 कोटी सक्रिय व्यवहार वापरकर्ते असून मिशो देशातील 80% पेक्षा जास्त पिन कोडवर डिलिव्हरी करते. यासह कंपनीने 95000 कोटींहून अधिक मूल्यांकन प्राप्त केले आहे.